5
Ita utudida lanit ivavan ini, tevek torang Yesus Kristus
1 Tamata iki watan norang ne, Yesus yai Raja i ntevut dida salasilan ra, na tamata yai, Ubu yanan roak ia. Wean i tlobang tamata isa yaman a, na tlobang vali tamata yai. 2 Ita tkaꞌa ne tlobang roak Ubu yanan ra, wean i tlobang Ubu ovu tot-orang afa ovi nfareta roak verin ita ma totu ra. 3 Wean i tlobang Ubu, na tot-orang afa ovi nfareta roak verin ita ma totu ra. Afa ovi nfareta ma totu ra wol aleman ma tfabana. 4 Tamata iki watan yaman Ubu, na utun roak afa sian ovi rnaꞌa lanit ivavan ini. Ita utudida roak afa sian avyai, tevek dida inorang verin Yesus. 5 Tamata iki utun afa sian ovi rnaꞌa lanit ivavan ini? Tamata ovi rorang ne, Yesus yai Ubu Yanan Ia, na ira aꞌuk saꞌi uturira lanit ivavan ini.
Yesus Kristus saꞌi nala vavaꞌat kakiwal verin tamata ovi rorang Ia
6 Yesus Kristus nma lanit ivavan ini. Yohanes i nbaptis tamata ra nbaptis Ia ovu wear, ovu vali rbaku Ia naꞌa aa walwalur ma laran a nvoat. Yesus wol nma ma Yohanes nbaptis watan Ia, naꞌuk nma ma nala tenan ma rfedan Ia, ma laran nvoat. Ubu Ni Roh nfalyawang ne, afa avyai kena lahir, tevek afa ovi nfalak ra kena lalawatan.*5:6 Vai Yunani (secara harfiah naꞌa Vaidida) nfalak ne, Yesus Kristus saꞌi nma ovu wear ovu lara. Ia wol nma ovu wear watan, naꞌuk wear ovu lara. Tafsiran boku rfalak ne, wear ovu lara ihin a ne, Yohanes nbaptis Yesus, ovu Ia nmata. Boku vali rfalak ne, wear ovu lara ihin a ne, wear ovu lara i nvoat tali nelan a naꞌut i rbaku Ia naꞌa aa walwalur. Boku vali rfalak ne, wear ovu lara ihin a ne, wean vaivatul kamkuma ma al nfamalik tamata inorang rbaptis tamata ra, ovu renu anggur ovu raꞌan roti ma al rfangnanang Ni matmatan. 7 Ubu Ni Roh nfalak vali ne, afa avyai kena urun. [Yamadida, ovu Ubu Ni vaivatul ra ovu vali Ni Roh a rfamalik naꞌa lanit ratan ne, irtelu ikisa watan ira.†5:7 Naꞌa naskah asli etal dawan a, vaivatul ovi rnaꞌa tanda kurung ralan a, wol rnaꞌa. 8 Irtelu rfaivar naꞌa lanit ivavan ini ne]: Ubu Ni Roh a, ovu wear i al rbaptis a, ovu vali Yesus Kristus laran a; irtelu ini, wean watan isa ma rfamalik Yesus Kristus naꞌa lanit ivavan ini.‡5:8 Ita tkaꞌa lahir Yesus, tevek Ubu Ni Roh nfalyawang Ia naꞌa raladida ra. Ita tkaꞌa vali Ia, tevek Yohanes nbaptis Ia ovu wear, ovu vali nmata ma laran nvoat. 9 Wean i tamata ra rfamalik afa ovi rkaꞌa ra verin ita, na torang watan. Naꞌuk afa ovi Ubu nfalak verin ita kena rahi lia munuk tamata rira afa ovi rfalak ra, tevek Ia nfamalik Yanan a. 10 Tamata iki watan norang Ubu Yanan a, na ia nkaꞌa roak naꞌa ralan ne, afa ovi Ubu nfalak ra kena urun. Tamata iki watan wol norang Ubu, na tamata yai nfalak roak ne, Ubu nsiklabir, tevek wol norang Ubu Ni Ivar i nfamalik Yanan a.
11 Ubu Ni Ivar yai wean ini: Ia nala roak vavaꞌat kakiwal verin ita. Vavaꞌat kakiwal yai ntali aꞌuk Yanan a. 12 Tamata ovi Ubu Yanan a nleal ralarira ra, rira vavaꞌat kakiwal, naꞌuk tamata ovi Yanan a wol nleal ralarira ra, wol rira vavaꞌat kakiwal.
Wean inba ma dida vavaꞌat kakiwal
13 Utulis surat ini verin mia, tamata ovi myorang Ubu Yanan a, boma mkyaꞌa lahir ne, bira vavaꞌat kakiwal roak. 14 Raladida dawan ma taflurut verin Ubu, tevek tkaꞌa ne, Ia nrenar afa ovi tera verin Ia, wean i tera verin Ia ma kena ovu ralan a. 15 Wean i tkaꞌa ne, Ubu nrenar roak dida falurut ra, na ita tkaꞌa vali ne, nala roak afa ovi tera tali Ia.
16 Wean i tamata isa nsiꞌik ne, teran a valin notu salasilan, na salasilan yai wol nala matmatan verin ia, na ia musti naflurut verin Ubu, boma nala vavaꞌat verin ia. Afa i ufalak ini nkena tamata ovi rotu salasilan ra, naꞌuk wol rvua matmatan verin ira. Salasilan boku vali rvua matmatan. Yaꞌa wol ufalak ma musti miflurut verin tamata ovi rotu salasilan avyai.§5:16 Tafsiran boku rfalak ne, salasilan ovi rvua matmatan ihin a ne, tamata ovi rafena ma rahil ma rtalik tali rira salasilan ra. Ira wol warira roak ovu Ubu, ba wol rira vavaꞌat kakiwal. 17 Afa sian ovi totu roak yai, ihin a ne, salasilan, naꞌuk salasilan boku wol rvua matmatan.
18 Ita tkaꞌa roak ne, tamata ovi Ubu nala roak ira ma reluk yanan ra wol rotu roak salasilan ra, tevek Ubu Yanan a nwanar ma lolin ira, ovu nitdawan i notu afa ovi sian ra munuk wol nweang nala ira. 19 Ita tkaꞌa roak ne, yamadida verin Ubu, ovu vali nitdawan nweang nala munuk roak tamata ovi wol rorang Ubu naꞌa lanit ivavan ini. 20 Ita tkaꞌa roak ne, Ubu Yanan a nma ma nfalyawang verin ita naꞌa raladida ra, boma tkaꞌa Ubu i mngaꞌun a. Ita raladida isa roak ovu Ubu, ovu vali Yanan a Yesus Kristus. Ia Ubu mngaꞌun Ia, ovu Ia saꞌi nala vavaꞌat kakiwal verin tamata ra.
21 Yanak averi, msyiꞌik wabira ma lolin ma deka myorang ubu liak ra. Ning surat a lawan watan ini.
Salam tali yaꞌa, Yohanes
*5:6 5:6 Vai Yunani (secara harfiah naꞌa Vaidida) nfalak ne, Yesus Kristus saꞌi nma ovu wear ovu lara. Ia wol nma ovu wear watan, naꞌuk wear ovu lara. Tafsiran boku rfalak ne, wear ovu lara ihin a ne, Yohanes nbaptis Yesus, ovu Ia nmata. Boku vali rfalak ne, wear ovu lara ihin a ne, wear ovu lara i nvoat tali nelan a naꞌut i rbaku Ia naꞌa aa walwalur. Boku vali rfalak ne, wear ovu lara ihin a ne, wean vaivatul kamkuma ma al nfamalik tamata inorang rbaptis tamata ra, ovu renu anggur ovu raꞌan roti ma al rfangnanang Ni matmatan.
†5:7 5:7 Naꞌa naskah asli etal dawan a, vaivatul ovi rnaꞌa tanda kurung ralan a, wol rnaꞌa.
‡5:8 5:8 Ita tkaꞌa lahir Yesus, tevek Ubu Ni Roh nfalyawang Ia naꞌa raladida ra. Ita tkaꞌa vali Ia, tevek Yohanes nbaptis Ia ovu wear, ovu vali nmata ma laran nvoat.
§5:16 5:16 Tafsiran boku rfalak ne, salasilan ovi rvua matmatan ihin a ne, tamata ovi rafena ma rahil ma rtalik tali rira salasilan ra. Ira wol warira roak ovu Ubu, ba wol rira vavaꞌat kakiwal.