Yohanes ni surat i norang surat i ntulis lan a
Tbas afa ovi veki
Yohanes ntulis surat ini ma nfangrebat tamata ovi rorang Yesus ralarira ra, ma rsilobang ira (1:6). Ia nfalak vali verin ira ma rsiꞌik warira ma lolin, naꞌa guru siklabir ovi rair afa ovi wol kena ra (1:7, 9).
Yohanes wol ntulis naran naꞌa surat ini. Ia ntulis ne, “Yaꞌa eluk dawan kareda, ma utulis surat ini...” Ia nkirim surat ini verin itvata isa ovu yanan a (1:1). Tamata rivun ovi rair Surat Ralan a rfalak ne, ia wol nkirim surat ini verin vata isa. Ira rfalak ne, ini vaivatul kamkuma watan verin tamata ovi rorang Yesus rira sidovung a. Naꞌuk tamata boku vali rfalak ne, Yohanes nkirim urun surat ini verin vata isa ovu yanan a.
1
Vaivatul situli
1 Yaꞌa eluk dawan kareda* 1:1 Dawan kareda, naꞌa ayat ini nfaturu penatua watan. Vai Yunani npake vaivatul presbuterous naꞌa ayat ini. Msiꞌik vali Kisah 11:30. ma utulis surat ini verin itvata i Ubu nfili a, ovu yanan ovi ulobang urun ira.† 1:1 Tafsiran rivun rfalak ne, itvata ovu yanan ra, ihin a ne, tamata ovi rorang Yesus rira sidovung a ovu tamata ovi rnaꞌa sidovung yai ralan a. Wol mane aksa yaꞌa watan ulobang mia, naꞌuk tamata ovi rkaꞌa roak afa ovi kena ra, ira munuk lahir‡ 1:1 Afa ovi kena ra ihin a ne, Ubu Ni vaivatul ra. rlobang vali mia, 2 tevek afa ovi kena ra, inyai Ubu Ni vaivatul ra, rleal roak raladida ra, ovu veka rovun ita, nata ti wol ni wahan. 3 Uflurut verin Yamadida Ubilaꞌa, ovu Yanan a Yesus Kristus ma fara nala Ni rala lolin ovu nfaturu Ni silobang verin ita, ovu notu ma raladida ra malinan watan, tevek torang afa ovi kena ra, ovu tsilobang ita.
Tsilobang ita ovu tsiꞌik wadida ma lolin naꞌa afa ovi tamata rair ra
4 Yaꞌa ralang lolin urun, tevek urenar ne, yanam boku rot-orang afa ovi kena ra naꞌa rira vavaꞌat ra, wean lahir afa ovi Yamadida Ubilaꞌa nfalak roak verin ita ma totu ra. 5 Ba era verin oa ta titi, ma tsilobang ita. Ufalak lahir verin mia ma myot-orang afa ovi ufalak ini, ovu wol mane betfasa ma mryenar. Ita trenar roak afa ovi ufalak ini tali amar i beti torang Yesus.§ 1:5 Ba era verin oa ta titi ma tsilobang ita ihin a ne, Yohanes nera verin tamata ovi rorang Yesus ma rsilobang ira. 6 Ita dida silobang ihin a ne, tot-orang afa ovi Ubu nfareta ma totu ra. Mia mryenar roak ne, tali amar i beti myorang Yesus, na Ubu nfareta mia ma msyilobang mia.
7 Utulis surat ini verin mia, tevek tamata siweang rivun rban-talik bira sidovung ma rti wan liak. Ira wol rtorung ne, Yesus Kristus neluk tamata ma nma roak lanit ivavan ini. Tamata avyai rsiklabir sian, ovu rangal Kristus. 8 Msyiꞌik wabira ma lolin, betane karya ovi amotu roak verin mia yai wol ihirira. Ivaꞌubira, boma Ubu naval mia naꞌa bira rala lolin ra.
9 Tamata iki watan wean i nban-tamuri Kristus ma wol not-orang afa ovi nair ra, na tamata yai Ubu wol yanan ia. Tamata ovi baꞌi rot-orang afa ovi Kristus nair ra, na ira ralarira isa roak ovu Yamadida Ubilaꞌa ovu vali Yanan a. 10 Ba wean i tamata boku rma rtuan mia ma rair afa ovi rangal Kristus Ni afa ovi nair ra, na deka mtyorung ma rti bira rahan ralan ra, ovu deka mtyuli ira. 11 Tevek wean i mtyuli ira, na weabira lahir tamata avyai ma myovu vali ira naꞌa rira afa sian ovi rotu ra.
Vaivatul situli naꞌa surat ni wahan a
12 Velik ne mane utulis snurak rivun ilaꞌa verin mia, naꞌuk wol ufadoku naꞌa surat ini. Naꞌuk inak ma ti ulola mia, ma tfamalik afa avyai, boma did tinemun inad lolin. 13 Ba aꞌam i Ubu nfili roak a, yanan ra rala salam vali verin oa.* 1:13 Yohanes nala vaivatul kamkuma naꞌa ayat 1 ovu ayat ini, ba ia ntulis aꞌam, na ihin a ne, kareda te tamata ovi rorang Yesus rira sidovung. Ning surat i utulis ini, lawan watan ini.
Ya'a Yohanes, ala salam verin mia
*1:1 1:1 Dawan kareda, naꞌa ayat ini nfaturu penatua watan. Vai Yunani npake vaivatul presbuterous naꞌa ayat ini. Msiꞌik vali Kisah 11:30.
†1:1 1:1 Tafsiran rivun rfalak ne, itvata ovu yanan ra, ihin a ne, tamata ovi rorang Yesus rira sidovung a ovu tamata ovi rnaꞌa sidovung yai ralan a.
‡1:1 1:1 Afa ovi kena ra ihin a ne, Ubu Ni vaivatul ra.
§1:5 1:5 Ba era verin oa ta titi ma tsilobang ita ihin a ne, Yohanes nera verin tamata ovi rorang Yesus ma rsilobang ira.
*1:13 1:13 Yohanes nala vaivatul kamkuma naꞌa ayat 1 ovu ayat ini, ba ia ntulis aꞌam, na ihin a ne, kareda te tamata ovi rorang Yesus rira sidovung.