4
Yahudi rira mela falurut ra ovu rira dawan ra ranovak mane rukun Petrus irua Yohanes
1 Naꞌut i Petrus irua Yohanes rangrihi nulu tamata rivun avyai obin, na Yahudi rira mela falurut ra ovu tamata i nfareta suldadu ovi rwanar Yahudi rira Rahan Dawan Falurut a, ovu vali tamata boku tali Yahudi rira sidovung isa naran Saduki, rma ma rtuan ira.
2 Tamata dawan avyai rangrova urun, tevek irua rair tamata ra ovu rfalak ne, Ubu veka nfavaꞌat ewal tamata ovi rmata ra, wean i nfavaꞌat roak Yesus tali matmatan. 3 Ba ira rtaha Petrus ovu Yohanes ma ti rvatuk ira naꞌa buꞌi ralan. Ovan roak, ba rtahang teri ira naꞌa inyai ma ti naran ilyan. 4 Naꞌuk tali tamata rivun ovi rarenar afa ovi rair ra, na rivun ilaꞌa rorang Yesus. Ira rarekan brana ra, na kaꞌa bi rivun ilima rorang roak Yesus.
5 Ni ilyan ana, Yahudi rira dawan ovi rair Musa ni inukun ra, ovu dawan Yahudi ra ovu dawan ovi rban-ulu verin ira, rasdovu ira naꞌa Yahudi rira sidovung dawan naꞌa Yerusalem. 6 Rira Mela Falurut Ilaꞌa naran Hanas, ovu Kayafas, Yohanes, Aleksander, ovu ni tiniman liak ra munuk rdoku sidovung dawan yai.*4:6 Yahudi ra rfili Hanas ma ndoku rira Mela Falurut Ilaꞌa naꞌut varat ilima (Masehi). Mela falurut ilaꞌa ndoku ti naran nmata, beti rkati ia, naꞌuk fareta Roma ra rfaleka ia naꞌut varat vutu rahin ilima (Masehi). Ba Yahudi ra rfili Hanas ni ranetan Kayafas ma ndoku Mela Falurut Ilaꞌa, naꞌuk ralang ma dawan Hanas obin. Snain Hanas ni tiniman verin Yohanes irua Aleksander vali. 7 Ira rovun Petrus irua Yohanes ma rdiri waharira ralan ra, ma rorat ira ne, “Mia myotu ma lolin brana laklukut yai ovu ngrebat tali iki, ovu myala iki naran a ma myotu afa ini?”
8 Ubu Ni Roh nsoru lahir Petrus ralan a ma nfalak ne, “Dawan Yahudi averi ovu dawan ovi byan-ulu verin ami! 9 Amar ini myera ma amfamalik naꞌa i wean inba ma amlobang tamata laklukut yai, ovu vali wean inbinimi tamata yai lolin roak ia. 10 Mane ufalyawang verin mia ovu vali Israel ra munuk ma mkyaꞌa ne, Yesus Kristus i ntali ahu Nazaret nala ngrebat verin ami ma amotu ma lolin tamata ini ma ndiri wahabira ralan ra. Mia myotu ma rbaku Yesus naꞌa aa walwalur, naꞌuk Ubu nfavaꞌat ewal Ia. 11 Rtulis roak naꞌa Surat Ralan ne, Yesus wean vatu i tukan ra rvatuk. Mia wean tukan ovi rvatuk vatu yai:
‘Naꞌuk Ubu nala vatu i byatuk yai ma notu ma wean vatu i fyawan lia munuk ma al nfangrebat rahan yai.’†4:11 Mazmur 118:22
12 Yesus aꞌuk saꞌi nsikat ita tali dida salasilan ra, ma dida vavaꞌat kakiwal. Ubu wol nfili tamata liak isa vali naꞌa lanit ivavan ini ma nsikat ita tali dida salasilan ra.”
13 Tamata ovi rnaꞌa sidovung dawan yai rsiꞌik roak ne, Petrus irua Yohanes rabrahi, ovu rkaꞌa vali ne, irua wol raskola, ba rtalkaka. Ira rkaꞌa ne, tamata irua ini rorang lalawatan Yesus. 14 Naꞌuk tamata avyai wol bisma rfalak afakataka, tevek tamata i Petrus irua Yohanes beti rotu ma lolin ia yai ndir-ebang ira. 15 Ba rfareta Petrus ovu Yohanes ma rti sidovung dawan murin a, boma tamata avyai rfamalik ewal ira. 16 Ba rsiorat ira ne, “Ita veka totu aka verin tamata irua ini? Tamata ra munuk naꞌa Yerusalem rkaꞌa roak ne, tamata irua yai rotu mujizat i betfasa tamata ra rarea, ba rtalkaka. Wol talak nala roak ita naꞌa mujizat yai. 17 Naꞌuk totu ma tamata liak wol rarenar mujizat i rfamalik yai, ba eka tfalak teri ira, boma deka rfamalik Yesus verin tamata ra.”
18 Ba rera ewal Petrus irua Yohanes ma rti ralan, ma rfareta ira boma deka rfamalik te rair ewal Yesus verin tamata ra. 19 Naꞌuk Petrus irua Yohanes rfalak ne, “Eka fyanovak watan naꞌa ralabira ra ne, afaka kena naꞌa Ubu wahan ralan a: ami amorang afa ovi fyalak ra, te amorang Ia. 20 Ami wol bisma amtalik ma amfamalik afa ovi amsiꞌik ovu amrea roak.”
21 Ira wol rdav-nala lingaꞌan mane rukun Petrus irua Yohanes, tevek tamata ra munuk naꞌa inyai rfadawang Ubu naꞌa afa i tamata irua ini rotu a. Ba ral-ewal vaivatul aleman al rfabobar ira, beti rfatalik ira. 22 Tamata ra munuk rkaꞌa roak ne, Ubu notu mujizat, tevek tamata laklukut i beti rotu ma lolin ia ini, ni varat vutfaꞌat rahin roak.
Tamata ovi rorang Yesus rera ma Ubu nfangrebat tenarira ra
23 Ti ma rfatalik roak Petrus irua Yohanes, na rewal ira rti ma rtuan rira kida ra. Ba rfamalik munuk afa ovi Yahudi rira dawan mela falurut ra ovu dawan Yahudi ra rfalak verin ira. 24 Ti ma rira kida ra rarenar afa ovi rfalak ra, na irmunuk ralarira isa ma rera verin Ubu ne, “Duilaꞌa, Oa saꞌi fwareta afakataka munuk. Oa motu lanit ivavan a ovu lanit ratan. Oa motu vali tahat ovu afa ovi rnaꞌa ralan. 25 Ubumam-nusimami Raja Daud nkarya verin Oa, ba lalan ana, fwalak ma Mu Roh notu ma Daud nfalak ne,
‘Notu afakinimi bangsa ovi wol Yahudi ra rangrova ma dawan i? Afaka notu ma tamata ra rvolan ma rotu afa ovi wol ihir lahir?
26 Raja ovi rnaꞌa lanit ivavan rasusan warira mane rotu rihi, ovu vali mela dawan ra rasdovu ira ma raꞌan vai isa ma rangal Duilaꞌa ovu Ni Raja i ntevut dida salasilan ra.’‡4:26 Eka msiꞌik Mazmur 2:1, 2
27 Daud nfalak kena, tevek Raja Herodes irua gubernur Pontius Pilatus rasdovu roak tamata Israel ra ovu ovi wol Israel ra naꞌa Yerusalem, mane rangal Yesus, Mu Sansinir i nmerat urun. Oa fwili roak Ia ma neluk Raja i ntevut dida salasilan ra. 28 Duilaꞌa, Oa saꞌi mungrebat, ba ira rot-nala watan afa ovi ralam nfalak roak ma rotu. Oa bwolan roak ma rotu afa avyai. 29 Duilaꞌa, amera verin Oa ma mrenar ovu msiꞌik ira! Ira rworuk-rwak ami, ba mlobang ami, boma ralamami dawan ma amfamalik ma lolin Mu vaivatul ra, tevek amkarya verin Oa. 30 Mala Mu ngrebat, boma tamata ovi rira suhut ra veka lolin ewal ira. Fara motu wean inyai, tevek Yesus, Mu sansinir i nmerat urun a, veka notu ma amotu vali mujizat ra ovu faneak ovi tamata ra wol rot-nala.”
31 Ti ma raflurut munuk, na ruru naꞌa wan i rasdovu ira naꞌa yai. Ubu Ni Roh nsoru lahir ralarira ra, ba wol rbobar ma rfamalik Ubu Ni vaivatul ra.
Tamata ovi rorang Yesus rsilobang ira
32 Tamata ovi rorang Yesus munuk ralarira isa, ba wol tamata isa tali ira nafena ma nala ni metan ra verin rira sidovung. 33 Ubu nala ngrebat dawan verin rasul ra ma rfamalik ne, Ia nfavaꞌat ewal Duilaꞌa Yesus tali matmatan, ba Ubu naflahar ma dawan tamata ovi rorang Ia. 34 Wol tamata isa tali ira kasian ia, tevek amar boku, na tamata ra rfedi rira rahan te lanun ra ma rala kubang avyai 35 verin rasul ra. Nata rtanang kubang avyai ma inovan ovu afa ovi tamata ra rperlu.
36 Tamata isa naran Yusuf wean vali inyai. Rasul ra rfanara ia ne Barnabas, ihin a tamata i baꞌi nfangrebat tamata ralarira ra. Ubun nusin ra rtali Yahudi rira arun dawan isa naran Lewi. Rarali ia naꞌa nuhu isa naran Siprus. 37 Ia nfedi ni vaꞌi isa ma nala kubang avyai verin rasul ra.
*4:6 4:6 Yahudi ra rfili Hanas ma ndoku rira Mela Falurut Ilaꞌa naꞌut varat ilima (Masehi). Mela falurut ilaꞌa ndoku ti naran nmata, beti rkati ia, naꞌuk fareta Roma ra rfaleka ia naꞌut varat vutu rahin ilima (Masehi). Ba Yahudi ra rfili Hanas ni ranetan Kayafas ma ndoku Mela Falurut Ilaꞌa, naꞌuk ralang ma dawan Hanas obin. Snain Hanas ni tiniman verin Yohanes irua Aleksander vali.
†4:11 4:11 Mazmur 118:22
‡4:26 4:26 Eka msiꞌik Mazmur 2:1, 2