1 Brana isa naran Ananias, awan a naran Safira. Irua rfedi rira lanun boku. 2 Ia nfonak lanun yai fyawan a, ma boku verin ia, na teran ntaha ti verin rasul ra. Ia awan nkaꞌa vali afa i notu yai.

3 Ba Petrus nfalak ne, “Ananias, afakinimi mtorung ma nitdawan nleal lahir ralam a, ma mlabir Ubu Ni Roh ma fwonak kubang boku tali lanun i fwedi yai? 4 Wol fwedi lanun yai obin, na oa mu lanun a. Ti ma fwedi roak, na oa mu lanun fyawan yai obin. Afakinimi munovak naꞌa ralam a wean inyai? Oa wol mlabir tamata, naꞌuk mlabir roak Ubu.”

5 Ti ma Ananias nrenar munuk afa i Petrus nfalak yai, na nmata lahir ma nleka nsuta lanun. Ba tamata ovi rarenar ivar yai rbobar urun. 6 Varverun boku rma ma rkuma ia, ma rvara ia rti murin ma roving ia.

7 Kaꞌa bi jam itelu nelak roak, na Ananias awan nma vali. Naꞌuk ia wol nkaꞌa ne, awan nmata roak. 8 Petrus norat ia ne, “Eka fwalak verin yaꞌa. Lanun i mirua awam a fyedi yai, fyawan a veran ini?”

Ananias awan nfalak ne, “Oꞌu ta baba, fyawan veran inyai.”

9 Petrus nfalak verin ia ne, “Afakinimi mirua awam ralabira isa ma mlyabir teman Ubu Ni Roh i? Eka msiꞌik! Tamata ovi beti rti roving awam a rewal roak ira ma rdiri falfolat ngoran a, ba veka rvara vali oa ma ti roving oa.”

10 Ti ma Ananias awan nrenar munuk afa i Petrus nfalak yai, na nmata lahir ma nleka nsuta ntuba Petrus wahan ralan a. Varverun avyai rti rahan ralan ma rsiꞌik, na nmata roak, ba rvara ia ma ti roving ia nebang awan a. 11 Ba tamata ovi rorang Yesus*5:11 Tamata ovi rorang Yesus ihin a ne, sidovung tamata ovi rorang Yesus naꞌa Yerusalem watan. ovu tamata liak ovi rarenar afa ini, irmunuk rbobar urun.

12 Rasul ra rotu mujizat rivun, ovu vali rotu faneak ovi tamata ra wol rot-nala, naꞌa tamata rivun waharira ralan ra. Tamata ovi rorang Yesus ralarira isa ma baꞌi rasdovu ira naꞌa wan isa naran Salomo ni abelus i naꞌa Yahudi rira Rahan Dawan Falurut. 13 Tamata liak wol rabrahi ma rdoku ovu ira, velik ne tamata ra ralang ma dawan ira. 14 Naꞌuk amar nkati amar, na sidovung tamata ovi rorang Duilaꞌa Yesus ntafal lalawatan. Ba vata ovu brana rivun rorang Ia. 15 Rasul ra rotu mujizat ra, ba tamata ra rsikat tamata ovi rira suhut ra ma rfanuba ira naꞌa koꞌi te dari naꞌa lingaꞌan, boma wean i Petrus nbana nahu inyai ma molan nkena watan ira, na lolin lahir ira. 16 Tamata rivun ilaꞌa rtali ahu ovi rfaseri Yerusalem rma vali ma rovun rira tamata ovi rira suhut ra ovu tamata ovi nait sian ra rleal ira, ba ira munuk lolin ewal ira.

17 Ti nata Yahudi rira Mela Falurut Ilaꞌa ovu ni tamata ovi rnaꞌa sidovung Saduki ralarira sian urun, tevek tamata rivun rorang rasul ra. 18 Ba rtaha rasul ra rma ma raꞌabuꞌi ira. 19 Naꞌuk lervava yai, na Ubu Ni sansinir isa tali lanit ratan nma ma nvadil buꞌi ni falfolat ra ma novun ira rti murin, ma nfalak verin ira ne, 20 “Miti Rahan Dawan Falurut ni lean ma mdyiri ineri, ma fyamalik munuk vaivatul ovi rala vavaꞌat ngorvaꞌan a verin tamata rivun.”

21 Ira rot-orang snurak i sansinir tali lanit ratan yai nfalak a, ba varverak sumatan, na rti Rahan Dawan Falurut yai ni lean ma rsiair naꞌa inyai.

Naꞌut inyai vali, na Yahudi rira Mela Falurut Ilaꞌa ovu ni tamata ovi rorang ia rma, ma rera Israel rira dawan ovi rdoku rira sidovung dawan ma rasdovu munuk ira. Nata rsinir tamata ra ma rovun rasul ra ti verin ira. 22 Naꞌuk tamata avyai rti raran buꞌi, na rasul ra wol rleal roak, ba rewal watan ira ma rfalak verin sidovung dawan yai ne, 23 “Ti amaran buꞌi yai, na amsiꞌik falfolat ra ratkusi ma lolin watan, ma tamata ovi rwanar falfolat ra rdiri falfolat ngoran ra. Naꞌuk ti amvadil falfolat ra, na wol amrea tamata isa vali naꞌa ralan.”

24 Ti ma tamata i nfareta suldadu ovi rwanar Yahudi rira Rahan Dawan Falurut a, ovu Yahudi rira dawan mela falurut ra rarenar ivar yai, na ralar raruan ma rsiorat ira ne, ilyan te ravrua veka wean inba?

25 Nata tamata isa nma ma nfalak ne, “Baba averi, eka msyiꞌik! Tamata ovi myaꞌabuꞌi ira yai rdiri Rahan Dawan Falurut ni lean ma rair tamata ra!”

26 Ba tamata i nfareta suldadu ovi rwanar Rahan Dawan Falurut ovu ni suldadu ra rti ma rala rasul irua yai. Ira rala rasul irua yai ovu lolin watan, tevek wean i rotu sian ira, na rbobar beta ne tamata rivun rteva ira. 27 Ira rovun rasul irua yai ma rti rdiri tamata ovi rnaꞌa sidovung dawan yai waharira ralan ra, boma Mela Falurut Ilaꞌa norat afa tali ira. 28 Ia nfalak ne, “Amfalak teri roak ma deka fyamalik Tamata yai verin tamata ra. Naꞌuk fyamalik roak Ia ma ti nsoru roak wan ovi rnaꞌa Yerusalem. Mia fyalak vali ne, ami amotu ma Tamata yai nmata!”

29 Petrus ovu rasul liak ra rfalak ne, “Ami musti amot-orang aꞌuk afa ovi Ubu nfalak ra. Ami wol amot-orang afa ovi tamata ra rfalak. 30 Mia fyakloꞌi Yesus naꞌa aa walwalur ma fyedan Ia. Naꞌuk Ubu i ubud-nusid ra baꞌi raraning a, notu ma Ia nvaꞌat ewal tali matmatan. 31 Ubu nalang ma dawan Yesus, ba novun Ia nrata lanit ratan ma ndoku Ni lihir mela, ma nala ngrebat verin Ia ma nfareta tamata ra, ovu nsikat ira tali rira salasilan ra. Ubu notu wean inyai, boma tamata Israel ra rahil ma rtalik tali rira salasilan ra, ovu naꞌi vatuk rira salasilan ra. 32 Ami amrea ma amfamalik afa avyai munuk, ovu Ubu Ni Roh nrea nkaꞌa vali afa ovi Yesus notu ra. Ubu nala Ni Roh verin tamata ovi rot-orang afa ovi nfalak ra.”

33 Dawan ovi rdoku sidovung dawan yai rarenar afa avyai, na rangrova urun i lahir, ba mane rfedan rasul avyai. 34 Naꞌuk tamata Farisi isa naran Gamaliel†5:34 Gamaliel nair Yahudi rira inukun ra, ba tamata ra munuk ralang ia. Ia ndoku vali Yahudi rira sidovung dawan naꞌa Yerusalem, ovu neluk tuan guru verin Paulus. naꞌa vali sidovung dawan yai. Ia nair vali Yahudi rira inukun ra, ba tamata ra munuk ralang ia. Ia ndiri ma nsinir tamata ovi rwanar rasul ra ma rovun ira rti murin, naꞌuk wol mnanat. 35 Nata nfalak verin ira ne, “Hei, tamata Israel averi! Minovak ma lolin naꞌa afa i mane myotu verin tamata ovi! 36 Varat ifira nti roak veli, na tamata isa naran Teudas nma ma nfalak verin tamata ra ne, tamata dawan ia, ba kaꞌa bi tamata ratut ifaꞌat rorang ia. Naꞌuk rfedan ia ma tamata ovi rorang ia rban-talik munuk ia, ba rira sidovung namaꞌar ma wol rot-nala akataka lahir. 37 Afa avyai kena munuk roak, beti Roma rira fareta nfalak ma rtulis tamata ra munuk nararira ra naꞌa daftar. Naꞌut inyai, na tamata Galilea isa naran Yudas nma vali ma notu ma tamata rivun rorang ia, ma rotu rihi ovu Roma ra. Naꞌuk rfedan vali ia, ba rira sidovung namaꞌar ma tamata ovi rorang ia rban-talik ia. 38 Ba mane usurak mia ne, deka mtyeri ira naꞌa afa ovi rotu ra, ba fyatalik watan ira! Wean i tamata ra rvolan ma rotu afa avyai, na ira veka wol rot-nala.‡5:38 Gamaliel ni maksud ne, rasul ra wol rot-nala vali, wean lan a Teudas ovu Yudas wol rot-nala ma rira sidovung ra ramaꞌar watan (msiꞌik ayat 36 ovu 37). 39 Naꞌuk wean i Ubu nsinir ira ma rair tamata ra, na mia veka wol fyalek-nala ira, tevek wean inyai, na mia veka myangal Ubu.” Ba ira rorang Gamaliel ni snurak yai.

40 Ira rera rasul ra rma ma rasveva ira. Nata rfalak teri ma deka rfamalik Yesus verin tamata ra, beti rfatalik ira. 41 Rasul ra rban-talik sidovung dawan yai ovu inar lolin, tevek Ubu nfili ira ma tamata ra rotu sian ira ovu rfalak sian ira, tevek rorang Yesus. 42 Lokat amar, na rti Rahan Dawan Falurut ni lean ovu naꞌa tamata rira rahan ra ma rair lalawatan ira. Ira rfamalik lalawatan Ubu Ni Ivar Lolin verin tamata ra ne, Yesus yai Raja i ntevut dida salasilan ra.