2
Deka tafla talik dida inorang a
1 Ba terang a valing averi, wean inyai bi musti tsiꞌik wadida ma lolin ma torang urun Ubu Ni Ivar Lolin i trenar roak a, boma deka tafla talik dida inorang a. 2 Ubu Ni vaivatul ovi Ni sansinir ra tali lanit ratan rfamalik verin ubud-nusid ra tali lalan, kena lalawatan. Ba tamata ovi wol rot-orang vaivatul avyai rtuan roak inukun i inovan ovu afa sala ovi rotu ra.*2:2 Tafsiran etal dawan rfalak ne, vaivatul ovi Ubu Ni sansinir ra tali lanit ratan rfamalik, inyai inukun ovi Ubu nala verin Musa, ma ti nfamalik verin tamata Yahudi ra. 3 Ubu nsikat roak ita tali dida salasilan ra, ma dida vavaꞌat kakiwal. Afa i Ubu notu yai lolin urun, ba tamata ovi wol rkamlabir afa yai, na Ia veka nukun ira ma ntafal ma aleman. Duilaꞌa Yesus kaꞌi nfamalik lan Ubu Ni Ivar Lolin a. Nata tamata ovi rarenar lan roak Ivar yai tali Yesus, ti rfamalik vali verin ita ma tkaꞌa ne, Ivar yai kena lahir. 4 Ubu nfaturu ne, tamata ovi rfamalik Ivar yai rira afa ovi rfalak ra kena. Ia notu wean inyai nahu Ni faneak ovu mujizat ra, ma nfaturu Ni ngrebat a ma tamata ra rtalkaka. Ubu Ni Roh a nala Ni ngrebat a verin tamata ovi rorang Yesus, wean lahir ralan nfalak a.
Yesus neluk lingaꞌan ma tamata ra lolin ewal ovu Ubu
5 Lanit ivavan ngorvaꞌan i tfamalik a veka nma. Naꞌut inyai, na Ubu veka wol nala ngrebat verin Ni sansinir ra naꞌa lanit ratan ma rfareta. 6 Ita tkaꞌa afa yai, tevek rfalak roak naꞌa Surat Ralan ne,
“Ubu, notu afakinimi mungnanang tamata ra?
Tamata ovi rnaꞌa lanit ivavan ini tamata watan ira, na afakinimi msiꞌik tamata yanan a?†2:6 Tafsiran etal dawan ra rfalak ne, tamata yanan naꞌa ayat ini, wol nfamalik Yesus. Nfamalik tamata ovi rnaꞌa lanit ivavan a. Naꞌuk Yesus Ubu Yanan mngaꞌun Ia, ba nrata lanit ratan ma nfareta munuk afakataka.
7 Oa motu ma Mu sansinir ovi rnaꞌa lanit ratan rira dawan nlia kedan ia watan, naꞌuk wol mnanat.‡2:7 Tafsiran etal dawan ra rfalak ne, ia naꞌa ayat ini, ihin a ne, tamata ra. Sama vali ovu ayat 8.
Ba Oa fwakaratat ia ovu malang ma dawan ia.
8 Oa mala ngrebat verin ia ma nfareta munuk afakataka, ma wean lahir i rsoak nulu ia.”§2:8 Mazmur 8:5-7
Beti tbas ne, ia nfareta munuk afakataka. Ihin a ne, wol afa isa vali ma tamata ra wol rfareta. Fiang ini wol trea obin ne, tamata ra rfareta afakataka munuk. 9 Naꞌuk ita tkaꞌa roak ne, Yesus Ni ngrebat ma nfareta afakataka munuk! Naꞌut i Ia nleal lanit ivavan ini, na Ubu notu ma Ni sansinir ovi rnaꞌa lanit ratan rira dawan nlia kedan Ia watan, naꞌuk wol mnanat. Fiang ini Ubu nfakaratat Ia ovu nalang ma dawan Ia, tevek ntuan susa dawan ma nmata. Ubu Ni rala lolin a, bi Yesus nmata ma al nakvanak tamata ra munuk tali rira salasilan ra.
10 Ubu notu afakataka munuk, ovu Ia notu ma tamata ra munuk rfadawang Ia. Ia nfadoku roak ma Yesus ntuan susa rivun ma neluk Raja i wol Ni salasilan, ma nsikat tamata ra tali rira salasilan ra. Ba afa i nfadoku roak yai kena urun! Ba tali Yesus Ni susa avyai, na Ubu nasusan roak lingaꞌan ma nala tamata rivun ma reluk yanan ra, ma Ni dawan nvotuk naꞌa ira vali. 11 Yesus naꞌi vatuk roak dida salasilan ra, ba Ia notu ma dida vavaꞌat ra rmerat urun. Yesus ovu ita tamata ovi notu roak ma dida vavaꞌat ra rmerat urun a, Yamadida isa watan. Wean inyai bi, Yesus wol nmaꞌit ma nfalak ne, Ni tiniman ita. 12 Yesus nfalak roak verin Ubu ne,
“Yaꞌa veka ufamalik naram a verin Ning tiniman ra,
ovu veka udedang verin Oa ma ufadawang Oa naꞌa rira sidovung a.”*2:12 Mazmur 22:23
13 Yesus nfalak vali ne,
“Yaꞌa veka ufakloꞌi aꞌuk Ning vavaꞌat a verin Oa ta Ubu.”
Ia nfalak vali ne,
“Ini Yaꞌa ovu yanak ovi Ubu mala roak verin Yaꞌa.”†2:13 Yesaya 8:17-18
14 Ubu yanan ra tamata vali ira, ba amar isa veka rmata. Wean inyai bi, Yesus neluk tamata ma nvaꞌat wean ita, boma tali Ni matmatan a, na not-visal nitdawan i ni ngrebat ma nfareta matmatan a. 15 Lan a, tamata ra munuk rvaꞌat wean watan wol rira akataka, tevek rbobar lalawatan matmatan. Naꞌuk Yesus nfatalik ita tali matmatan ni ngrebat a, boma wol tbobar roak matmatan a.‡2:15 Vai Yunani nfalak ne, tamata ra rbobar matmatan ihin naꞌa vai Yunani ne, babobar yai nfareta ira, wean tamata isa nfareta ni sansinir a. 16 Ba terang a valing averi, lyawan urun ne, Yesus wol nlobang Ubu Ni sansinir ovi rnaꞌa lanit ratan ra. Naꞌuk Ia nlobang ita, tamata ovi Abraham ubun-nusin ra. 17 Wean inyai bi, Yesus musti neluk tamata ma wean lahir ita, tamata ovi tnaꞌa lanit ivavan ini, ma ntuan susa vali wean susa ovi baꞌi tatuan ra, boma Ia neluk dida Mela Falurut Ilaꞌa.§2:17 Yahudi rira Mela Falurut Ilaꞌa isa watan. Ia nfareta mela falurut ra munuk. Ia saꞌi nti ruang i nmerat rahi lia munuk naꞌa rira Rahan Dawan Falurut ralan a. Lokat varat, na tamata Yahudi rtaha rira afwatan ra ma rala verin mela falurut ra ma rfedan ira, beti Mela Falurut Ilaꞌa ntaha afwatan avyai lararira ra nti ruang yai ralan a. Notu wean inyai, fasa watan naꞌa varat isa ralan a, ma naflurut verin Ubu ma naꞌi vatuk rira salasilan ra. Yesus nvaꞌat ewal ma neluk dida Mela Falurut Ilaꞌa, tevek laran nvoat ma ntevut ita, ba wol tperlu ma tala afwatan roak ma neluk dida korban verin Ubu. Naꞌa Ni karya ma neluk Mela Falurut Ilaꞌa, na nfaturu Ni rala lolin verin tamata ra ovu notu lalawatan afa ovi Ubu nfalak ra. Tali Ni karya yai bi naꞌi vatuk tamata rira salasilan ra munuk.*2:17 Yesus neluk tamata ma wean lahir ita, naꞌuk wol notu salasilan. Nitdawan nlabir teman Ia, wean nlabir teman tamata ra vali. 18 Tevek Yesus ntuan susa dawan naꞌut i nitdawan a nlabir teman Ia, ba Ia bisma nlobang vali ita, naꞌut i nitdawan a nweang ita.

*2:2 2:2 Tafsiran etal dawan rfalak ne, vaivatul ovi Ubu Ni sansinir ra tali lanit ratan rfamalik, inyai inukun ovi Ubu nala verin Musa, ma ti nfamalik verin tamata Yahudi ra.

†2:6 2:6 Tafsiran etal dawan ra rfalak ne, tamata yanan naꞌa ayat ini, wol nfamalik Yesus. Nfamalik tamata ovi rnaꞌa lanit ivavan a. Naꞌuk Yesus Ubu Yanan mngaꞌun Ia, ba nrata lanit ratan ma nfareta munuk afakataka.

‡2:7 2:7 Tafsiran etal dawan ra rfalak ne, ia naꞌa ayat ini, ihin a ne, tamata ra. Sama vali ovu ayat 8.

§2:8 2:8 Mazmur 8:5-7

*2:12 2:12 Mazmur 22:23

†2:13 2:13 Yesaya 8:17-18

‡2:15 2:15 Vai Yunani nfalak ne, tamata ra rbobar matmatan ihin naꞌa vai Yunani ne, babobar yai nfareta ira, wean tamata isa nfareta ni sansinir a.

§2:17 2:17 Yahudi rira Mela Falurut Ilaꞌa isa watan. Ia nfareta mela falurut ra munuk. Ia saꞌi nti ruang i nmerat rahi lia munuk naꞌa rira Rahan Dawan Falurut ralan a. Lokat varat, na tamata Yahudi rtaha rira afwatan ra ma rala verin mela falurut ra ma rfedan ira, beti Mela Falurut Ilaꞌa ntaha afwatan avyai lararira ra nti ruang yai ralan a. Notu wean inyai, fasa watan naꞌa varat isa ralan a, ma naflurut verin Ubu ma naꞌi vatuk rira salasilan ra. Yesus nvaꞌat ewal ma neluk dida Mela Falurut Ilaꞌa, tevek laran nvoat ma ntevut ita, ba wol tperlu ma tala afwatan roak ma neluk dida korban verin Ubu.

*2:17 2:17 Yesus neluk tamata ma wean lahir ita, naꞌuk wol notu salasilan. Nitdawan nlabir teman Ia, wean nlabir teman tamata ra vali.

© 2018 WBT