3
Yesus Ni dawan nlia Musa
1 Ba terang a valing ovi myorang Ubu, bira vavaꞌat ra rmalola, ovu Ubu nfili roak mia ma veka ti mnyaꞌa lanit ratan. Fara minovak ma lolin naꞌa Yesus. Ita torang ne, Ia neluk Ubu Ni rasul, ovu neluk Mela Falurut Ilaꞌa verin ita. 2 Ia not-orang lalawatan Ubu i nfili Ia, Ni afa ovi nfalak ra. Musa notu vali wean inyai ma not-orang lalawatan afa ovi Ubu nfalak ra, ma nsiꞌik ma lolin Ubu Ni rahan a. Ihin a ne, ia nsiꞌik ma lolin Ubu Ni tamata ra. 3 Naꞌuk inovan ma tfadawang ovu talang Yesus nlia tali Musa. Inyai wean lahir i tamata ra rfadawang tamata i notu rahan, nlia tali rahan i notu yai. 4 Rahan ra munuk tamata ra rfadiri ira, naꞌuk Ubu aꞌuk saꞌi notu munuk afaka watan. 5 Musa neluk tamata sansinir ma not-orang lalawatan afa ovi Ubu nfalak ra naꞌa ni karya verin Ubu Ni tamata ra. Ia ni karya ma nfalyawang naꞌa afa ovi Ubu veka nfavotuk naꞌa amar ovi veka rma ini. 6 Naꞌuk Kristus, Ubu Yanan Ia. Ia not-orang lalawatan afa ovi Ubu nfalak ra, ovu nfareta munuk afakataka naꞌa Ubu Ni Rahan a. Ita tamata ovi torang Yesus weadida lahir Ubu Ni Rahan a, wean i raladida ra wol kakoꞌu ovu dida inorang a nangrebat, ma tfakloꞌi aꞌuk dida vavaꞌat ra verin Ia.
Ubu nfangnanang tamata ovi wol rot-orang afa ovi nfalak ra
7 Ba terang a valing averi, fara myorang afa ovi Ubu Ni Roh nfalak a wean ini,
“Amar ini*3:7 Amar ini ihin a ne, amar ovi Ubu nala verin tamata ra ma rahil ma rtalik tali rira salasilan ra, ovu rorang Ia, boma nsikat ira tali rira salasilan ra, ma rira vavaꞌat kakiwal. Msiꞌik ayat 13 vali., wean i mryenar Ubu vain a,
8 na deka fyangrebat ralabira ra wean ububir-nusibira ra.
Lalan ana, ira rangal Ubu, ovu rlabir teman Ia naꞌa wan lean vu dawan.†3:8 Ayat ini nsurak tamata ra ma deka wearira Yahudi uburir-nusirira ra. Naꞌut lalan ana, Musa novun ira ma rti rtalik Mesir, naꞌuk rafena ma rorang Ubu, ba rbana naꞌa wan lean vu dawan ma naran varat vutfaꞌat. Bilangan 14:1-35; Keluaran 17:1-7.
9 Ubu nfalak ne, ‘Ira rlabir teman Yaꞌa,
velik ne rsiꞌik munuk roak afa ovi otu ra naꞌa varat vutfaꞌat ralan a.
10 Afa avyai rotu ma ungrova, ba ufalak ne,
ira rangal lalawatan Yaꞌa naꞌa ralarira ra,
ovu rafena ma rot-orang Ning vaivatul ra.
11 Ungrova, ba ufwaba lahir ne,
ira veka wol rti ma ryari ira ovu Yaꞌa naꞌa wan i utorung roak ma ala verin ira.’ ”‡3:11 Ayat ini ihin a ne, tamata ovi rangal Ubu veka wol ryari ira ovu Ia naꞌa wan i ntorung roak verin tamata ovi rorang Ia. Mazmur 95:7-11
12 Ba terang a valing averi, msyiꞌik wabira ma lolin, boma deka tamata isa vali tali bir tinemun ralan sian ovu inan ma notu watan salasilan ra, ma ti naran i nafla talik Ubu i nvaꞌat a ma wol norang roak Ia. 13 Naꞌuk msyifangrebat ralabira ra lokat amar, boma ralabira ra deka wean vatu, tevek salasilan ni siweang a. Ba msyifangrebat ralabira ra naꞌa amar ovi tamata ra rfalak obin ne, “amar ini.” 14 Tevek dida vavaꞌat isa roak ovu Kristus, ovu veka dida munuk afa lolin ovi Ubu nala roak verin Ia. Naꞌuk musti tot-orang lalawatan afa ovi Ubu nfalak ra, tali amar i beti torang Ia ma ti naran i wol dida amar roak. 15 Mingnanang afa ovi rtulis roak naꞌa Surat Ralan wean ini,
“Amar ini, wean i mryenar Ubu vain a, na deka fyangrebat ralabira ra wean ububir-nusibira ra.
Naꞌut lalan a, na ira rangal Ubu, ma rafena ma rot-orang afa ovi Ia nfalak ra.”§3:15 Mazmur 95:7-8
16 Tamata aba rarenar Ubu Ni vaivatul ra, naꞌuk rangal Ia obin? Tamata avyai, tamata ovi Musa novun roak ira ma rban-talik Mesir. 17 Ubu nangrova tamata aba, ti naran varat vutfaꞌat? Ia nangrova tamata ovi Musa novun roak ira ma rban-talik Mesir. Tamata avyai rmata naꞌa wan lean vu dawan, tevek rotu salasilan.*3:17-18 Bilangan 14:1-35 18 Naꞌut inyai, na Ubu near nfasoba ira wean ini, “Mia veka wol ti mnyaꞌa wan i utorung roak verin tamata ovi rorang Yaꞌa ma ryari ira ovu Yaꞌa!” Ia nfalak verin aba? Ia nfalak wean inyai verin tamata ovi rafena ma rorang Ia. 19 Ba misusan ralabira ra ma lolin, tevek tkaꞌa roak ne, tamata avyai veka wol ryari ira ovu Ubu naꞌa wan i ntorung roak, tevek wol rorang Ia.
*3:7 3:7 Amar ini ihin a ne, amar ovi Ubu nala verin tamata ra ma rahil ma rtalik tali rira salasilan ra, ovu rorang Ia, boma nsikat ira tali rira salasilan ra, ma rira vavaꞌat kakiwal. Msiꞌik ayat 13 vali.
†3:8 3:8 Ayat ini nsurak tamata ra ma deka wearira Yahudi uburir-nusirira ra. Naꞌut lalan ana, Musa novun ira ma rti rtalik Mesir, naꞌuk rafena ma rorang Ubu, ba rbana naꞌa wan lean vu dawan ma naran varat vutfaꞌat. Bilangan 14:1-35; Keluaran 17:1-7.
‡3:11 3:11 Ayat ini ihin a ne, tamata ovi rangal Ubu veka wol ryari ira ovu Ia naꞌa wan i ntorung roak verin tamata ovi rorang Ia. Mazmur 95:7-11
§3:15 3:15 Mazmur 95:7-8
*3:17 3:17-18 Bilangan 14:1-35