1 اٜ رٜعِرْدٜ بَنْدِرَاٻٜ، اٜ مِنْ تٛرٛوعٛنْ، نغَمْ يٜىٰسُ جٛومِرَاوٛ، نغَطٜىٰ جٛنْدٜ کَانُندٜ ندٜ اَللَّه نَنَتَ بٜلْطُمْ مَيْرٜ، نٛنْ نٛ اٜکِّتِيطٛنْ تٛ اَمِنْ، نٛنْ نٛ نجٛوطٛرِيطٛنْ جٛونِ؞ ٻٜيْدٜىٰ جٛوطٛرَاکِ نٛنْ؞ 2 نغَمْ اٛنْ اَنْدِ مِنْ مبِعِيعٛنْ کٛ يٜىٰسُ جٛومِرَاوٛ وِعِ نغَطٛنْ؞ 3 نغَمْ اَللَّه اٜ يِطِ نغَرْتٛنْ شٜنِيٻٜ، نغٛطِّتٛوطٛنْ وَطُکِ نجٜىٰنُ؞ 4 کٛو مٛيٜ مٛوطٛنْ اٜکِّتٛو نٛ سُرِرْتَ ٻَنْدُ مُوطُمْ ندٜرْ سٜنَاکِ اٜ مَنْغُ، 5 نَاع ندٜرْ سُونٛ نغٛ وٛوطَا نٛنْ نٛ حٜىٰفٜرْٻٜ ٻٜ اَنْدَا اَللَّه نغَطَتَ؞ 6 دٛوْ فِي طُعُمْ، تٛع غٛطّٛ حَلَّنَ بَنْدِرَاوٛ مُوطُمْ کٛو وَطَنَمٛ کٛ وٛوطَا؞ مِنْ مبِعِيعٛنْ کَ دَغَ اَرَنْدٜ، مِنْ مبَغِّنِيعٛنْ وِيکِ، جٛومِرَاوٛ وَاتَنَيْ غَطٛووٛ نٛنْ اٜ بٛنٜ؞ 7 اَللَّه نٛدَّايِعٜنْ نغَمْ نغَرْتٜنْ ٻٜ شٜنَاکِ، اَمَّا اٛ نٛدُّعٜنْ نغَطٜنْ جٛنْدٜ شٜنِيندٜ؞ 8 نغَمْ نٛنْ، فُو غَݧُطٛ اٜکِّتِنٛلْ نغٛعٛلْ، نَاع نٜطّٛ اٛ وَݧِ، اَللَّه اٛ وَݧِ، کٛکّٛووٛعٛنْ رُوحُ مَاکٛ؞

9 دٛوْ نٛ حَانِ نغِطِنْدِرٛنْ بٛو، نَاع سٜيْ تٛ غٛطّٛ وِنْدَنِيعٛنْ، نغَمْ اٛنٛنْ اٜ کٛعٜ مٛوطٛنْ اَللَّه اٜکِّتِنِيعٛنْ نغِطِنْدِرٛنْ؞ 10 مِنْ تَبِّتِنِي اٛنْ نغِطِ فُو بَنْدِرَاٻٜ مٜىٰطٜنْ وٛنْٻٜ لٜيْدِ مَکِدٛونِيَ؞ فُو اٜ نٛنْ بَنْدِرَاٻٜ، اٜ مِنْ ٻٜيْدَ وِيکِعٛنْ، ٻٜيْدٜىٰ وَطُکِ نٛنْ؞ 11 نغَطٜىٰ کٛ مبَاوٛتٛنْ وَطُکِ نغَطٛنْ جٛنْدٜ جَمْ، ڤَامَنٜىٰ کٛ وٛنِ يٜىٰسٛ مٛوطٛنْ تَنْ، اٛنْ کُوتِرَ جُوطٜ مٛوطٛنْ نٛنْ نٛ مِنْ مبِعِعٛنْ نغَطٛنْ؞ 12 نٛنْ وَطَيْ ٻٜ تٛکَّايِ يٜىٰسُ ندَرْدَعٛنْ اٜ مَنْغُ، ندٜنْ اٛنْ نجٛوَتَا کَمُّندٜ مٛوطٛنْ دٛوْ کٛو مٛيٜ نغَمْ کٛ نغِطّٛنْ؞

13 بَنْدِرَاٻٜ، اٜ مِنْ نغِطِ اَنْدٛنْ غٛونغَ دٛوْ ٻٜنْ طٛنْ تٛکُّٻٜ يٜىٰسُ مَيْٻٜ نغَمْ تٛع نغَطٛنْ کَ وَنُّکِ بٛ يِمْٻٜ حٛرِيٻٜ ٻٜ نغَلَا کَمُّندٜ؞ 14 ندٜ اٜنْ نجَٻِي يٜىٰسُ مَايِي اُمَّکٜ، نٛنْ مَا اٜنْ نجَٻِي اَللَّه وَدَّيْ تٛکُّٻٜ يٜىٰسُ مَيْٻٜ حَوْتِ اٜ يٜىٰسُ؞

15 اٜ مِنْ مبِعَعٛنْ دٛوْ کٛ وٛلْدٜ جٛومِرَاوٛ وِعِ، شَرٜلْ نغٜلْ جٛومِرَاوٛ وَرْتَتَ، غٛونغَ اٜنٜنْ غٛودُٻٜ يٛنْکِ اٜنْ اَرْتَتَا تٛکُّٻٜ يٜىٰسُ مَيْٻٜ يَاکِ دٛوْ؞ 16 نغَمْ جٛومِرَاوٛ اٜ حٛورٜ مُوطُمْ جِڤّٛيْتٛ دَغَ دٛوْ اٜ نٛدّٛلْ شٜمْبِنْغٛلْ، اٜ حٛنٛنْدٜ مَلَاعِکَاجٛ مَوْطٛ، اٜ دُودٛلْ لُوَلْ اَللَّه؞ مَيْٻٜ اٜ تٛکِّ اَلْمَسِيحُ کَمْٻٜ اَرْتَتَ اُمَّاکِ؞ 17 ندٜنْ اٜنٜنْ تٛکُّٻٜ يٜىٰسُ غٛودُٻٜ يٛنْکِ اٜ شَرٜلْ نغٜلْ طُمْ حٛشَّيْعٜنْ حَوْتِ اٜ مَٻّٜ ندٜرْ دُولٜ نغَمْ کَوْرٜنْ اٜ جٛومِرَاوٛ اٜ نجَيْرِ دٛوْ؞ غَطَ طٛنْ اٜنْ نجٛوطٛدٛتٛ اٜ مَاکٛ حَا اَبَدَا؞ 18 نغَمْ نٛنْ، شٜمْبِطِنٜىٰ بَنْدِرَاٻٜ مٛوطٛنْ اٜ حَالَ کَعَ؞