1 اٛنٛنْ بَنْدِرَاٻٜ، دٛوْ شَرٜلْ اٜ ݧَلْندٜ ندٜ فُو فِي طُعُمْ وَطَتَ، نَاع سٜيْ تٛ طُمْ وِنْدَنِيعٛنْ؞ 2 نغَمْ اٛنٛنْ اٜ کٛعٜ مٛوطٛنْ اٛنْ اَنْدِ بٛطُّمْ ݧَلْندٜ جٛومِرَاوٛ وَرَيْ نٛ غُجّٛ وَرْدَتَ جٜمَّ؞ 3 شَرٜلْ نغٜلْ يِمْٻٜ مبِعَتَ، ‏«‏اٜ وٛودِ جٛنْدٜ جَمْ، ندٜنْ ٻٜرْندٜ اٜ وَلْتِي،»‏ ندٜنْ طٛنْ اٜ طٛنْ سٜيْ حَلْکٜرٜ يَنٛنٛيَٻٜ؞ ندٜ وَرَنَيْٻٜ نٛ دَݧْنغٛلْ وَرَنْتَ دٜبّٛ غٛودُطٛ رٜىٰدُ، ٻٜ کٜٻَتَا لَاوٛلْ حِسُکِ؞ 4 اَمَّا اٛنٛنْ بَنْدِرَاٻٜ، نَاع ندٜرْ ݧِوْرٜ نغٛنْطٛنْ، حَکّٛ ݧَلْندٜ ندٜنْ طٛنْ اُدّٛوعٛنْ بٛ غُجّٛ؞ 5 نغَمْ اٛنٛنْ اٛنْ فُو اٛنْ ٻِٻّٜ جَيْنغٛلْ، اٛنْ ٻِٻّٜ ݧَلَوْمَ؞ اٜنٜنْ نَاع اٜنْ يِمْٻٜ جٜمَّ کٛو يِمْٻٜ ݧِوْرٜ؞ 6 نغَمْ نٛنْ، تٛع اٜنْ طَانٛ نٛ وٛٻّٜ نغَطَتَ، اَمَّا اٜنْ نجٛوطٛ اٜنْ شِرْيِي، اٜنْ شُرِ کٛعٜ مٜىٰطٜنْ؞ 7 نغَمْ طَانٛتٛوٻٜ، جٜمَّ ٻٜ طَانٛتٛو، ندٜنْ جَرٛوٻٜ نجَرُ نغِلْتٛو مَا، جٜمَّ ٻٜ نجَرَتَ ٻٜ نغِلْتٛو؞ 8 اَمَّا اٜنٜنْ، ندٜ اٜنْ يِمْٻٜ ݧَلَوْمَ، سٜيْ ڤَامَنٜنْ کٛعٜ مٜىٰطٜنْ؞ اٜنْ ٻٛرْنٛ حٛولَارٜ اٜ يِدّٜ ندٜ وَرْتَ بٛ تٛغّٛورٜ نجَمْندِ مٜىٰطٜنْ ندٜ کٛنُ، وَطُکِ ٻٜرْطٜ مٜىٰطٜنْ دٛوْ حٜٻُکِ کِسْندَمْ وَرْتَ بٛ حُمْنٜىٰرٜ نجَمْندِ ندٜ کٛنُ مٜىٰطٜنْ؞ 9 اَللَّه سُٻَايِ نجَرٜنْ مٛنّٜرٜ مُوطُمْ، اَمَّا اٛ سُٻَنِيعٜنْ حٜٻُکِ کِسْندَمْ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞ 10 کَنْکٛ مَايِ نغَمْ مٜىٰطٜنْ، نغَمْ کٛو اٜنْ نغٛودِ يٛنْکِ کٛو اٜنْ مَايِي، اٜنْ نجٛوطٛدٛتٛ اٜ مَاکٛ؞ 11 نغَمْ نٛنْ، شٜمْبِطِنْدِرٜىٰ مبَلِّندِرٜىٰ نٛنْ نٛ نغَطٛتٛنْ؞

12 اَمَّا اٜ مِ تٛرٛوعٛنْ بَنْدِرَاٻٜ، کٛکّٜىٰ کُوٛوٻٜ ندٜرْ مٛوطٛنْ مَنْغُ، وَاتٛ اَرْدِيٻٜعٛنْ ندٜرْ کُوغَلْ جٛومِرَاوٛ وَغِّنٛوٻٜعٛنْ؞ 13 کٛکّٜىٰٻٜ مَنْغُ نَاع سٜطَّ ندٜرْ يِدّٜ نغَمْ کُوغَلْ مَٻّٜ؞ نجٛوطٜىٰ جَمْ حَکُّندٜ مٛوطٛنْ؞

14 طٛنْمَا اٜ مِنْ تٛرٛوعٛنْ بَنْدِرَاٻٜ، کَٻَنٜىٰ ٻٜ نغِطَا کُوغَلْ، شٜمْبِطِنٜىٰ غٜوْرُٻٜ، مبَلّٜىٰ ٻٜ شٜمْبِطَا، نغَادٜىٰ مُݧَلْ اٜ کٛو مٛيٜ؞ 15 تَبِّتِنٜىٰ تٛع غٛطّٛ وَاتٛ حَلّٜىٰندٜ اٜ حَلّٜىٰندٜ؞ اَمَّا کٛو ندٜيٜ طَٻِّتٜىٰ وَطُکِ کٛ وٛوطِ حَکُّندٜ مٛوطٛنْ؞ نغَطَنٜىٰ کٛو مٛيٜ نٛنْ؞

16 نَنٜىٰ وٜلْوٜلٛ ندٜرْ ٻٜرْطٜ مٛوطٛنْ کٛو ندٜيٜ؞ 17 نغَطٜىٰ کَ وَطُکِ دٛعَارٜ؞ 18 ندٜرْ فُو کٛ حٜٻِعٛنْ نغٜتّٜىٰ اَللَّه، نغَمْ کَنْجُمْ وٛنِ کٛ اَللَّه يِطِ نغَطٛنْ ندٜرْ تٛکُّکِ يٜىٰسُ اَلْمَسِيحُ؞

19 تٛع اٛنْ کَطُ کُوغَلْ رُوحُ اَللَّه؞ 20 تٛع اٛنْ نجَوَنْ اَنَّبَاکُ، 21 اَمَّا ڤٛوندٜىٰ کٛو طُمٜ، نجٛغٛوطٛنْ کٛ وٛوطِ؞ 22 نغٛطِّتٜىٰ کٛو اِرِ ندٜيٜ حَلّٜىٰندٜ؞

23 اَللَّه جٛومُ جَمْ اٜ حٛورٜ مُوطُمْ وَرْتِرَعٛنْ لَاٻُٻٜ غَطَ اٜ يٜىٰسٛ؞ اٛ سُرَ يٛنْکِيجِ مٛوطٛنْ اٜ ٻٜرْطٜ مٛوطٛنْ اٜ ٻَلِّ مٛوطٛنْ بٛطُّمْ، نغَرْتٛنْ ٻٜ نغَلَا غٛطُّمْ کٛ وٛوطَا ݧَلْندٜ وَرْتُکِ جٛومِرَاوٛ مٜىٰطٜنْ يٜىٰسُ اَلْمَسِيحُ؞ 24 اٛنْ طٛنْ نٛدُّطٛعٛنْ، اٛ وَطَيْطُمْ نغَمْ اٛ غَطٛووٛ کٛ اٛ وِعِ؞

25 بَنْدِرَاٻٜ، نغَطَنٜىٰمِنْ دٛعَارٜ؞

26 کٛوْنٛنْ فُو بَنْدِرَاٻٜ اٜ حٛوْنِرْکِ حِغَاکُ؞

27 اٜ مِ وِعَعٛنْ نغَمْ جٛومِرَاوٛ طُمْ جَنْغَنَ فُو بَنْدِرَاٻٜ طٜرٜوٛلْ نغٛعٛلْ؞

28 جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞