1 دٛوْ غَرْتٛلْ جٛومِرَاوٛ مٜىٰطٜنْ يٜىٰسُ اَلْمَسِيحُ اٜ حَوْرُتُکِ مٜىٰطٜنْ اٜ مَاکٛ، اٜ مِنْ تٛرٛوعٛنْ بَنْدِرَاٻٜ، 2 تٛع حَکِّيلٛ مٛوطٛنْ اُمِّلَوٛو کٛو نغَنّٛنْ دٛوْ يِمْٻٜ بِعٛوٻٜ ݧَلْندٜ ندٜ جٛومِرَاوٛ وَرْتٛيْتَ وَرِي؞ طُمْ غَطٛتٛوطُمْ ٻٜ مبِعَ مِنٛنْ مبِعِ نٛنْ ندٜرْ اَنَّبَاکُ، کٛو ندٜرْ وَعَجِنْکِ، کٛو بٛو ندٜرْ طٜرٜوٛلْ مِنْ مبِنْدِطُمْ؞ 3 تٛع اٛنْ نجَٻُ غٛطّٛ مَجِّنَعٛنْ اٜ کٛو نغٛلٜ لَاوٛلْ؞ نغَمْ ندٜنْ طٛنْ ݧَلْندٜ وَرٛيْتَا نَا وٛنْغٜلْ شَرٜلْ وَطِي نغٜلْ يِمْٻٜ طُطْٻٜ نغَݧَتَ اَللَّه؞ اٜ شَرٜلْ نغٜلْ، کَلُّطٛ وَنْغَيْ، مٛ طُمْ سِرْيَنِي حَلْکٜرٜ ندٜ حَا اَبَدَا؞ 4 اٛ وَݧَيْ کٛو طُمٜ کٛ يِمْٻٜ نٛدَّتَ اَلَّح کٛو بٛو کٛ ٻٜ مَوْنِنْتَ، اٛ مَوْنِنَ حٛورٜ مَاکٛ دٛوْ مَاجُمْ؞ حَا مَا اٛ نَتَّيْ وُرٛ شٜنِينغٛ نغٛ اَللَّه، اٛ جٛوطٛو، اٛ وِعَ کَنْکٛ وٛنِ اَللَّه؞

5 اٛنْ شِفْتٛرَايِ کٛ نغٛنْدُنٛومِ اٜ مٛوطٛنْ مِ وِعِيعٛنْ طُعُمْ؟ 6 جٛونِ اٛنْ اَنْدِ کٛ حَطِ کَلُّطٛ اٛعٛ وَرْکِ؞ تٛ شَرٜلْ کَانُنغٜلْ وَطِي، طُمْ وَنْغِنَيْمٛ؞ 7 نغَمْ بَوْطٜ کَلُّطٛ اٛنْ طٛنْ يَادَکٜ فُطِّي حُوُکِ اٜ سُوطٜ؞ اَمَّا اٛنْ طٛنْ تَٻّٛتٛوطٛطٜ، اٛ وَطَيْ کَ تَٻَّاکِطٜ نَا اٛ حٛشَّامَ؞ 8 غَطَ طٛنْ طُمْ وَنْغِنَيْ کَلُّطٛ اٛنْ، سٜيْ يٜىٰسُ جٛومِرَاوٛ وَرِرَمٛ اٜ فٛوفَانغٛ حٛنْدُکٛ مُوطُمْ، ندٜنْ حَلْکِرَمٛ تٜدُّنغَلْ وَرْتُکِ مُوطُمْ؞ 9 کَلُّطٛ اٛنْ وَرْدَيْ اٜ بَوْطٜ شٜيْطَنْ، اٛ وَطَيْ اَلَامَاجِ اٜ کَيْطِنِيطُمْ اٜ کُلْنِيطُمْ فٜىٰرٜ‑فٜىٰرٜ طُمْ فٜوْرٜ، 10 اٜ کٛو اِرِ طٜيٜ کُوطٜ کَلُّطٜ پٛيْرَيْطٜ يِمْٻٜ کَلْکَيْٻٜ؞ يِمْٻٜ ٻٜنْ کَلْکَيْ نغَمْ ٻٜ نغَݧِي ٻٜ نغِطَ غٛونغَ ٻٜ کِسَ؞ 11 نغَمْ نٛنْ، اَللَّه لِلْدَنَيْٻٜ وٜمْبٜرٜ مَوْندٜ نغَمْ ٻٜ نجَٻَ فٜوْرٜ، 12 نغَمْ طُمْ تَپَ کِيتَ دٛوْ فُو ٻٜ نجَٻَايِ غٛونغَ نَنٛوٻٜ بٜلْطُمْ حَلّٜىٰندٜ؞

13 اٛنٛنْ بَنْدِرَاٻٜ اَمِنْ ٻٜ جٛومِرَاوٛ يِطِ، اٜ حَانِ مِنْ نغَطَ کَ يٜتُّکِ اَللَّه نغَمْ مٛوطٛنْ کٛو ندٜيٜ؞ نغَمْ دَغَ اَرَنْدٜ اَللَّه سُٻِيعٛنْ نغَمْ کِسٛنْ بَرْکَ لَاٻِنْکِ کِ رُوحُ مَاکٛ وَطَتَ اٜ جَٻُکِ غٛونغَ؞ 14 نغَمْ مَاجُمْ اَللَّه نٛدِّعٛنْ بَرْکَ حَبَرُ بٜلْطُمْ طُمْ مِنْ نغَعَجِنَنِعٛنْ؞ اٛ نٛدُّعٛنْ نغَمْ کٜٻٛنْ نَتُّکِ تٜدُّنغَلْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ 15 نغَمْ نٛنْ بَنْدِرَاٻٜ، ندَرٜىٰ بٛطُّمْ نجٛغٜىٰ اٜکِّتِنٛلْ نغٛلْ مِنْ اٜکِّتِنِعٛنْ ندٜرْ مٜتٛ اَمِنْ کٛو ندٜرْ طٜرٜوٛلْ نغٛلْ مِنْ مبِنْدَنِعٛنْ؞

16 جٛومِرَاوٛ مٜىٰطٜنْ يٜىٰسُ اَلْمَسِيحُ اٜ حٛورٜ مُوطُمْ، اٜ اَللَّه ݧَاکٛ مٜىٰطٜنْ مٛ دٛوْ، غِطّٛعٜنْ شٜمْبِطِنْطٛعٜنْ سٜمْبِطِنْکِ کِ رٜعَتَا کٛکُّطٛعٜنْ کَمُّندٜ بٛنْدٜ بَرْکَ يِدّٜ مَاکٛ، 17 اٛ فُکِّنَنَعٛنْ ٻٜرْطٜ، اٛ سٜمْبِطِنَعٛنْ ندٜرْ کٛو نغَلٜ کُوغَلْ بٛنْغَلْ اٜ وٛلْدٜ بٛنْدٜ؞