1 بَنْدِرَاٻٜ اَمِنْ، کٛ سَکِتِي وٛنِ نغَطَنٜىٰمِنْ دٛعَارٜ نغَمْ حَبَرُ جٛومِرَاوٛ سَنْکِتٛو جَوْطُمْ طُمْ مَوْنِنٜىٰ نٛنْ نٛ مَوْنِنِرْطٛنْطُمْ؞ 2 کَدِنْ نغَطَنٜىٰمِنْ دٛعَارٜ نغَمْ جٛومِرَاوٛ حِسْنَمِنْ دَغَ يِمْٻٜ کَلُّٻٜ، نغَمْ نَاع کٛو مٛيٜ حٛولِي يٜىٰسُ؞

3 اَمَّا جٛومِرَاوٛ اٛ غَطٛووٛ کٛ اٛ وِعِ، اٛ سٜمْبِطِنَيْعٛنْ، اٛ رٜىٰنَيْعٛنْ دَغَ اٛنْ طٛنْ کَلُّطٛ؞ 4 اٜ مِنْ کٛولِي جٛومِرَاوٛ، مِنْ تَبِّتِنِي اٛنْ نغَطَ کٛ مِنْ مبِعِعٛنْ نغَطٛنْ، اٛنْ نغَطَيْ بٛو کَ وَطُکِطُمْ؞

5 جٛومِرَاوٛ وَطَ ٻٜيْدٛنْ اَنْدُکِ يِدّٜ اَللَّه اٛ وَطَعٛنْ مُݧٛنْ ندٜرْ تٛرَّاجِ طِ نجَرٛتٛنْ نٛنْ نٛ يٜىٰسُ مُݧِرِ ندٜرْ تٛرَّاجِ کَلُّطِ طِ اٛ يَرِ؞

6 بَنْدِرَاٻٜ، اٜ مِنْ مبِعَعٛنْ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ، دٛولٜ نغٛطِّتٛوطٛنْ کٛو مٛيٜ دَکِّيطٛ تٛکُّطٛ يٜىٰسُ مٛ تٛکَّتَا کٛ مِنْ اٜکِّتِنِعٛنْ؞ 7 نغَمْ اٛنٛنْ اٜ کٛعٜ مٛوطٛنْ اٛنْ اَنْدِ اٜ حَانِ نغَطٛنْ کَ اٜکِّتَاکِ اِرِ جٛنْدٜ اَمِنْ؞ نَاع مِنْ دَکِّيٻٜ شَرٜلْ کٛ مِنْ نجٛوطٛدِي اٜ مٛوطٛنْ؞ 8 نٛنْ مَا، فُو مٛ مِنْ ݧَامَنِ ݧَمْندُ مِنْ نجٛٻِيمٛ؞ مِنْ کُوِي نَاع سٜطَّ جٜمَّ اٜ ݧَلَوْمَ نغَمْ تٛع مِنْ نجٛوَنَ غٛطّٛ مٛوطٛنْ تٜدّٛرَلْ؞ 9 مِنْ نغَطُ نٛنْ نَاع نغَمْ مِنْ مبَاوَتَا طَٻُّتُکِ بَلَّلْ مٛوطٛنْ، اَمَّا نغَمْ مِنْ نغَطَ غٛطُّمْ کٛ اٜکِّتٛتٛوطٛنْ؞ 10 نغَمْ کٛو شَرٜلْ کٛ مِنْ نغٛنْدُنٛو اٜ مٛوطٛنْ، رَا کٛ مِنْ مبِعِعٛنْ نغَطٛنْ، ‏«‏تٛ نٜطّٛ وَݧِي حُوَ، تٛع اٛنْ کٛکُّمٛ ݧَمْندُ؞»‏

11 نغَمْ مِنْ نَنِي حَبَرُ وٛٻّٜ مٛوطٛنْ ٻٜ دَکِّيٻٜ، ٻٜ کُوَتَا؞ اٜ ٻٜ نَتَّ حَالَ کَ يَالَايِٻٜ؞ 12 اٜ مِنْ مبِعَ اِرِ يِمْٻٜ ٻٜعٜ اٜ مِنْ مبَغِّنَٻٜ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ ٻٜ نغَطَ جٛنْدٜ بٛنْدٜ ٻٜ کُوَ ٻٜ کٜٻَنَ کٛعٜ مَٻّٜ کٛ ٻٜ ݧَامَتَ؞

13 اٛنٛنْ بٛو بَنْدِرَاٻٜ اَمِنْ، تٛع اٛنْ شٛمُ وَطُکِ کٛ حَانِ؞ 14 تٛ غٛطّٛ وَݧِي تٛکُّکِ کٛ مِنْ مبِعِ ندٜرْ طٜرٜوٛلْ نغٛعٛلْ، ڤَامَنٜىٰمٛ بٛطُّمْ؞ تٛع اٛنْ کَوْتُ حٛورٜ اٜ مَاکٛ نغَمْ اٛ نَنَ شٜمْتُطُمْ اٛ مٛعِّنَ نغِکُّ مَاکٛ؞ 15 فُو اٜ نٛنْ، تٛع اٛنْ کٛشُّمٛ بٛ غَݧٛ مٛوطٛنْ، اَمَّا مبَغِّنٜىٰمٛ نٛ مبَغِّنِرْتٛنْ تٛکُّطٛ يٜىٰسُ؞

16 جٛومِرَاوٛ جٛومُ جَمْ اٜ حٛورٜ مُوطُمْ حٛکَّعٛنْ جَمْ کٛو ندٜيٜ ندٜرْ کٛو طُمٜ؞ جٛومِرَاوٛ وٛنْدَ اٜ مٛوطٛنْ اٛنْ فُو؞

17 مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ اٜ مِ وِنْدَ طُعُمْ ندٜرْ فُو طٜرٜىٰجِ طِ مبِنْدُمِ نغَمْ طُمْ حٛلَّ مِنْ وِنْدِطِ؞ نٛنْ مبِنْدِرَيْمِ؞

18 جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ اٛنْ فُو؞