1 تٛو، ندٜ بُلُسْ اٜ بَرْنَبَ نجٛتِّي اِکٛونِيَ، ٻٜ نَتِّ ندٜرْ سُودُ دٛعَارٜ نٛنْ نٛ ٻٜ مبٛووِ وَطُکِ؞ ٻٜ نغَعَجِنِ حَا طُطْٻٜ ندٜرْ يَحُودَنْکٛعٜنْ اٜ غٛطِّ لٜپِّ کٛولِي يٜىٰسُ؞ 2 اَمَّا يَحُودَنْکٛعٜنْ غَݧُٻٜ کٛولٛو يٜىٰسُ اُمِّنِ ٻٜرْطٜ يِمْٻٜ نَاع يَحُودَنْکٛعٜنْ نغَمْ ٻٜ نغَݧَ تٛکُّٻٜ يٜىٰسُ؞ 3 فُو اٜ نٛنْ بُلُسْ اٜ بَرْنَبَ نٜىٰٻِ تٛنْ، اٜ ٻٜ نغَعَجِنَ ٻٜرْندٜ غٛعٛ دٛوْ جٛومِرَاوٛ کٛلُّطٛ کٛ ٻٜ نغَعَجِنْتَ طُمْ غٛونغَ ندٜ اٛ حٛکِّٻٜ بَوْطٜ وَطُکِ اَلَامَاجِ اٜ کُوطٜ کَيْطِنِيطٜ؞ 4 اَمَّا يِمْٻٜ اِکٛونِيَ شٜنْدِي طِطِ؞ وٛٻّٜ تٛکِّ يَحُودَنْکٛعٜنْ، وٛٻّٜ بٛو تٛکِّ لِلَاٻٜ ٻٜنْ؞

5 سٜيْ يِمْٻٜ نَاع يَحُودَنْکٛعٜنْ اٜ يَحُودَنْکٛعٜنْ اٜ اَرْدِيٻٜ مَٻّٜ فُو ٻٜ کَوْتِ حٛنْدُکٛ ٻٜ اُمَّنٛو لِلَاٻٜ ٻٜ کُبٛرٛوٻٜ اٜ کَاپٜ حَا ٻٜ مبَرَٻٜ؞ 6 ندٜ لِلَاٻٜ ٻٜنْ نَنِ نٛنْ، سٜيْ ٻٜ ندٛغِّ يَاکِ غَرِيرِ لِسْتِرَ اٜ غَرِيرِ دَرْبٜ ندٜرْ لٜيْدِ لِکٛونِيَ، اٜ لَدّٜ غَرِيجٜ طٜنْ؞ 7 تٛنْ ٻٜ نغَعَجِنِ حَبَرُ بٜلْطُمْ؞

8 ندٜرْ غَرِيرِ لِسْتِرَ اٜ وٛودِ غٛطّٛ جَرَاطٛ؞ دَغَ اٛ دَݧَا اٛ مٜىٰطَايِ دَرٛرَاکِ کٛيْطٜ مَاکٛ؞ 9 وٛنْدٜ ݧَلْندٜ اٜ مٛ حٜتِّندَنٛو وَعَجِنْکِ بُلُسْ، سٜيْ بُلُسْ سُتِيمٛ، يِعِ اٜ مٛ وٛودِ حٛولَارٜ کٜوْتُندٜ اٛ يَمْطِتِنٜىٰ؞ 10 سٜيْ اٛ وِعِ اٜ سٜمْبٜ، ‏«‏اُمَّ ندَرٛطَا!‏»‏ طٛنْ اٜ طٛنْ نٜطّٛ اٛنْ اُمِّي فُطِّ يَادُ؞ 11 ندٜ يِمْٻٜ حَوْرُتُٻٜ نغِعِ کٛ بُلُسْ وَطِ، ٻٜ مبِعِ سٜمْبٜىٰ ندٜرْ طٜمْنغَلْ مَٻّٜ نغَلْ لِکٛونِيَارٜ، ‏«‏اَلَّاجِ نجِڤَّنَکٜعٜنْ ندٜرْ نَنْدِ يِمْٻٜ!‏»‏ 12 ٻٜ نٛدِّرِ بَرْنَبَ جٜىٰوُسْ، ٻٜ نٛدِّرِ بُلُسْ حٜرْمٜسْ، نغَمْ کَنْکٛ وٛنِ ٻُرْطٛ مٜتُکِ؞ 13 وُرٛ تٛ طُمْ مَوْنِنْتَ اَلَّح مَٻّٜ بِعٜتٜىٰطُمْ جٜىٰوُسْ تٛ دَمُّغَلْ غَرِيرِ ندِنْ نغٛ وٛنِ؞ سٜيْ اَرْدِيطٛ دِينَ جٜىٰوُسْ وَدِّ غَعِ اٜ ڤِنْدِ تٛ دَمُّغَلْ نغَلْ؞ کَنْکٛ اٜ حَوْرُتُٻٜ طُطْٻٜ اٜ ٻٜ نغِطِ سَکَّنْکِ لِلَاٻٜ ٻٜنْ شَکِّرِ؞

14 اَمَّا ندٜ بَرْنَبَ اٜ بُلُسْ نَنِ نٛنْ، ٻٜ شٜىٰکِ کٛلْتٜ مَٻّٜ نغَمْ ٻٜ نغَنِّي؞ ٻٜ کَٻْتِي ٻٜ نَتِّ ندٜرْ يِمْٻٜ ٻٜنْ، ٻٜ مبِعِ اٜ سٜمْبٜ، 15 ‏«‏نغَمْ طُمٜ نغَطٛتٛنْ نِحِ؟ مِنٛنْ يِمْٻٜ بٛ مٛوطٛنْ؞ اٜ مِنْ نغَعَجِنَنَعٛنْ حَبَرُ بٜلْطُمْ نغَمْ تُوبٛنْ، اَلٛنْ طٜعٜ کُوطٜ مٜىٰرٜ، نغَيْلِتٛيٛوطٛنْ تٛ اَللَّه مٛ يٛنْکِ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ؞ 16 ندٜرْ جَامَنُوجِ پَٻِّيطِ اَللَّه اَلِي لٜپِّ دُونِيَارُ فُو تٛکَّ طَتٜ طٜ نغِطِ؞ 17 فُو اٜ نٛنْ، اٛ اَلَايِ حٛلُّکِ يِمْٻٜ حٛورٜ مَاکٛ ندٜرْ کُوطٜ بٛطّٜ طٜ اٛ وَطَتَ؞ اٜ مٛ حٛکَّعٛنْ ندِيَمْ دَغَ دٛوْ، اٜ مٛ ٻٜنْدِنَنَعٛنْ غٜسٜ ندٜرْ شَرٜلْ کَانُنغٜلْ، اٜ مٛ حٛکَّعٛنْ ݧَمْندُ، اٜ مٛ وٜلْنَ ٻٜرْطٜ مٛوطٛنْ؞»‏ 18 اَمَّا فُو اٜ بٛلِيطٜ طٜعٜ، لِلَاٻٜ ٻٜنْ تٛرَّکٜ کٛ کَطَ يِمْٻٜ ٻٜنْ حِرْسَنْکِٻٜ شَکِّرِ؞

19 غَطَ مَاجُمْ يَحُودَنْکٛعٜنْ نغَرِ دَغَ اَنْتَاکِيَ اٜ اِکٛونِيَ؞ ٻٜ ڤٛوطِ حَکِّيلٛ يِمْٻٜ، حَا ٻٜ کُبٛرِي بُلُسْ اٜ کَاپٜ؞ سٜيْ ٻٜ ندَسِمٛ ٻٜ نجَارِمٛ غَطَ غَرِيرِ، نغَمْ اٜ ٻٜ کَمِّي اٛ مَايِي؞ 20 اَمَّا ندٜ تٛکُّٻٜ يٜىٰسُ نغَرِ ڤِلِيمٛ، اٛ اُمِّي، اٛ نَتِّ ندٜرْ غَرِيرِ؞ ندٜ فِنِ، اٛ دِلِّدِ اٜ بَرْنَبَ غَرِيرِ دَرْبٜ؞

21 بُلُسْ اٜ بَرْنَبَ نغَعَجِنِ حَبَرُ بٜلْطُمْ تٛنْ دَرْبٜ، ٻٜ کٜٻِ تٛکُّٻٜ يٜىٰسُ طُطْٻٜ؞ غَطَ مَاجُمْ ٻٜ شٛعِّي لِسْتِرَ اٜ اِکٛونِيَ اٜ اَنْتَاکِيَ؞ 22 اٜ ٻٜ شٜمْبِطِنَ ٻٜرْطٜ تٛکُّٻٜ يٜىٰسُ، اٜ ٻٜ مبَغِّنَٻٜ ٻٜ ندَرٛو اٜ سٜمْبٜ ندٜرْ تٛکُّکِ يٜىٰسُ؞ ٻٜ مبِعِٻٜ، ‏«‏سٜيْ اٜ تٛرَّاجِ طُطِّ کٜٻٜتٜنْ نَتُّکِ لَامُ اَللَّه؞»‏ 23 ندٜرْ کٛو نغَلٜ کَوْتَلْ تٛکُّٻٜ يٜىٰسُ، ٻٜ شُٻَنِٻٜ مَوْٻٜ؞ ندٜرْ سُومَيٜىٰرٜ اٜ دٛعَارٜ، ٻٜ نغَطِ شُٻَاٻٜ ٻٜنْ ندٜرْ جُنْغٛ جٛومِرَاوٛ مٛ ٻٜ کٛولِي؞

24 ندٜ ٻٜ کُولِ لٜيْدِ بِسِيدِيَ، ٻٜ نغَرِ لٜيْدِ بَمْفِيلِيَ؞ 25 ندٜ ٻٜ نغَعَجِنِ وٛلْدٜ اَللَّه ندٜرْ غَرِيرِ فٜرْغَ، سٜيْ ٻٜ ندِلِّرِ غَرِيرِ اَتَالِيَ؞ 26 دَغَ تٛنْ ٻٜ نَتِّ کٛمِوَلْ، ٻٜ کٛوتِ اَنْتَاکِيَ، نغَمْ ٻٜ نجٛتِّنِي کُوغَلْ نغَلْ ٻٜ نغِطِ وَطُکِ ندٜرْ يَادُ ندُنْ؞ اَنْتَاکِيَ وٛنِ غَرِيرِ ندِ تٛکُّٻٜ يٜىٰسُ نغٛنِ غَطَنْٻٜٻٜ دٛعَارٜ اَللَّه بَرْکِطِنَٻٜ وَلَّٻٜ ندٜرْ يَادُ ندُنْ؞

27 ندٜ ٻٜ نجٛتِّي، ٻٜ کَوْرِتِ کَوْتَلْ تٛکُّٻٜ يٜىٰسُ، ٻٜ طِيوِتَنِٻٜ کٛ اَللَّه وَطِ لَاوٛلْ مَٻّٜ، اٜ نٛ اٛ مَٻِّتِرَنِ لٜپِّ طِ نَاع يَحُودَنْکٛعٜنْ دَمُّغَلْ حٛولَاکِ يٜىٰسُ؞ 28 ٻٜ مبَالِ بَلْطٜ طُطّٜ تٛنْ ندٜرْ تٛکُّٻٜ يٜىٰسُ ٻٜنْ؞