2
نٛ اَلْمَسِيحُ لٜسْتِنِرِ حٛورٜ
ندٜ سُمْڤٛوتِرْکِ اٜ اَلْمَسِيحُ اٜ سٜمْبِطِنَعٛنْ، ندٜ يِدّٜ مَاکٛ اٜ وَلْتِنَ ٻٜرْطٜ مٛوطٛنْ، ندٜ اٛنْ شُمْڤٛوتِرَ اٜ رُوحُ اَللَّه، ندٜ اٛنْ نغٛودِ يِدّٜ اٜ يُرْمٜىٰندٜ، نٛ مبٜلْنِرَنْتٛنْيَمْ ٻٜرْندٜ وٛنِ ݧُمٛ مٛوطٛنْ وَرْتَ غٛعٛ، اٛنْ نغِطِندِرَ، اٛنْ کَوْتِ کٛعٜ؞ تٛع اٛنْ نغَطُ کٛو طُمٜ ندٜرْ يِدّٜ حٛورٜ کٛو ندٜرْ مَنْغُ حٛورٜ، اَمَّا ندٜرْ لٜسْنُکِ حٛورٜ کٛو مٛيٜ حٛشَّ بَنْدِرَاوٛ مُوطُمْ ٻُرِيمٛ؞ تٛع کٛو مٛيٜ مٛوطٛنْ يِطَ کٛ نَفَنْتَ حٛورٜ مُوطُمْ تَنْ، اَمَّا اٛ يِطَ کٛ نَفَنْتَ وٛٻّٜ مَا؞ نغِکُّ مٛوطٛنْ وَرْتَ اِرِ طُمْ يٜىٰسُ اَلْمَسِيحُ؞
کٛو ندٜ ندٜرْ کٛو طُمٜ اٛ غٛعٛ اٜ اَللَّه، اٛ حٛشَّايِ فٛتُّدُکِ اٜ اَللَّه غٛطُّمْ کٛ اٛ جٛغٛتٛو؞
اَمَّا اٛ وَرْتِرِي حٛورٜ مَاکٛ نَاع اٛ غٛطّٛ، اٛ وَرْتِ مَشُّطٛ، اٛ دَݧَا ندٜرْ نَنْدِ نٜطّٛ؞
غَطَ اٛ دَݧَامَ ندٜرْ نَنْدِ نٜطّٛ، اٛ لٜسْتِنِ حٛورٜ مَاکٛ اٛ وَطِ کٛ طُمْ وِعِمٛ حَا اٛ مَايِ
مَيْدٜ دٛوْ غَافَانغَلْ؞
نغَمْ نٛنْ، اَللَّه حٛکِّمٛ مَنْغُ ٻُرْطُمْ طُمْ کٛو مٛيٜ،
ندٜنْ حٛکِّمٛ اِنْدٜ ٻُرْندٜ کٛو ندٜيٜ اِنْدٜ؞
10 نغَمْ کٛو طُمٜ کٛ وٛنِ اٜ دٛوْ، اٜ کٛ وٛنِ اٜ دُونِيَارُ، اٜ کٛو طُمٜ کٛ وٛنِ اٜ لَاحِرَ، طُمْ دِشَّنْتٛ يٜىٰسُ؞
11 ندٜنْ يٜىٰسٛ کٛو طُمٜ کٛو نغَلٜ طٜمْنغَلْ وِعَيْ يٜىٰسُ اَلْمَسِيحُ اٛ جٛومِرَاوٛ،
نغَمْ مَوْنِنْکِ اَللَّه ݧَاکٛ مٛ دٛوْ؞
نغَرْتٜىٰ جَيْنغٛلْ ندٜرْ دُونِيَارُ
12 نغَمْ نٛنْ اٛنٛنْ ٻٜ نغِطُمِ، کٛو ندٜيٜ اٛنْ نغَطَ کٛ طُمْ وِعِعٛنْ شَرٜلْ کٛ نغٛنْدُنٛومِ اٜ مٛوطٛنْ؞ جٛونِ مَا ندٜ مِ وَلَا طٛنْ، ٻٜيْدٜىٰ وَطُکِ کٛ طُمْ وِعِعٛنْ؞ نغَطٜىٰ کَ حُوُکِ کُوغَلْ کِسْندَمْ مٛوطٛنْ ندٜرْ کُلٛلْ اَللَّه؞ 13 نغَمْ اَللَّه اٜ حُوَ ندٜرْ ٻٜرْطٜ مٛوطٛنْ نغَمْ اٛ وَطَعٛنْ نغِطٛنْ وَطُکِ کٛ اٛ يِطِ، مبَاوٛنْ وَطُکِطُمْ؞
14 فُو کٛ نغَطٛتٛنْ، تٛع اٛنْ نغَطُطُمْ ندٜرْ مٜتِتَاکِ، کٛو ندٜرْ غٜدِّ، 15 نغَمْ نغَرْتٛنْ وَلَا کٛ طُمْ حُطِرْتَعٛنْ، لَاٻُٻٜ، ٻِٻّٜ اَللَّه ٻٜ نغَلَا حَلّٜىٰندٜ ندٜرْ جَامَنُ يِمْٻٜ ٻٜ نغَلَا غٛونغَ کَلُّٻٜ، نغَرْتٛنْ جَيْنٛتٛوٻٜ ندٜرْ مَٻّٜ بٛ فِتِلَاجِ اٜ دُونِيَارُ، 16 ندٜرْ حٛکُّکِ حَبَرُ وٛلْدٜ کٛکَّيْندٜ يٛنْکِ؞ تٛ اٛنْ نغَطِي نٛنْ، ݧَلْندٜ وَرْتُکِ اَلْمَسِيحُ مِ مَنْتِتٛتٛ، نغَمْ کُوغَلْ اَمْ اٜ حَٻْدُکِ اَمْ وَرْتَايِ مٜىٰرٜ؞
17 کُوطٜ طٜ کُوٛتٛنْ نغَمْ اٛنْ کٛولَکٜ جٛومِرَاوٛ، بٛ شَکِّرِ طٜ نغٛنِ تٛ مَاکٛ؞ کٛو تٛ طُمْ رُفَيْ پِيپَمْ اَمْ دٛوْ شَکِّرِ ندِنْ، مِ نَنَيْ بٜلْطُمْ، مبٜلْمبٜلْتٜنْ اٜنْ فُو؞ 18 نٛنْ اٛنٛنْ مَا، اٜ حَانِ نَنٛنْ بٜلْطُمْ، مبٜلْمبٜلْتٜنْ؞
تِمٛوتِ اٜ اَبَافٛرٛدِتُسْ
19 اٜ مِ کَمِّي، تٛ يٜىٰسُ جٛومِرَاوٛ جَٻِي، مِ لِلْدٛنٛيَيْعٛنْ تِمٛوتِ نَاع کٛ نٜىٰٻِ نغَمْ مِ نَنَ حَبَرُ مٛوطٛنْ طُمْ سٜمْبِطِنَيَمْ؞ 20 مِ وَلَا غٛطّٛ غَنُّطٛ اٜ مٛوطٛنْ بٛ مَاکٛ؞ 21 حٛرِيٻٜ ٻٜنْ کٛو مٛيٜ کٛ وٛنِ يٜىٰسٛ مُوطُمْ تَنْ وَنِّمٛ، نَاع کٛ يٜىٰسُ اَلْمَسِيحُ يِطِ؞ 22 اَمَّا اٛنْ اَنْدِ نٛ تِمٛوتِ حٛلِّرِ نَفُکِ مُوطُمْ، اٛ حُودِي اٜ اَمْ ندٜرْ کُوغَلْ حٛکُّکِ حَبَرُ بٜلْطُمْ بٛ ٻِطّٛ اٜ ݧَاکٛ مُوطُمْ؞ 23 نغَمْ نٛنْ، کَنْکٛ نغِطُمِ لِلٛيْکِ تٛ مٛوطٛنْ نٛ نَنِرْمِ کٛ حٜٻَتَيَمْ؞ 24 ندٜنْ مِ تَبِّتِنِي، تٛ جٛومِرَاوٛ جَٻِي، مِنْ مَا مِ وَرَيْ نَاع کٛ نٜىٰٻِ؞
25 مِ يِعِي اٜ حَانِ مِ لِلٛنٛيَعٛنْ بَنْدِرَاوٛ اَمْ اَبَافٛرٛدِتُسْ حِغٛ کُوغَلْ اَمْ، حِغٛ تٛرَّ اَمْ طٛنْمَا، مٛ لِلٛيْطٛنْ وَلَّيَمْ؞ 26 نغَمْ اٛ حَاٻِي اٛ يِعَعٛنْ اٛنْ فُو، اٛ وَنِّي نغَمْ اٛنْ نَنِي اٛ يَمْطَا؞ 27 غٛونغَ اٛ وَطِي شِيَ نجَمُ حَا اٛ ٻَدَکٜ اٛ مَايَ؞ اَمَّا اَللَّه يُرْمِنَنِيمٛ، نَاع کَنْکٛ تَنْ، حَا اٜ مِنْ، نغَمْ تٛع وَنَّارٜ طُوطَنَيَمْ؞ 28 کَنْجُمْ وَطِ کَاٻُمِ نَاع سٜطَّ مِ لِلٛيَمٛ تٛ مٛوطٛنْ نغَمْ ڤُطِّتٛنْ نغِعٛنْمٛ نَنٛنْ بٜلْطُمْ، ندٜنْ وَنَّارٜ اَمْ اُسْتٛو؞ 29 نغَمْ نٛنْ، نجَٻّٜىٰمٛ ندٜرْ وٜلْوٜلٛ طُطْنغٛ نغَمْ جٛومِرَاوٛ، ندٜنْ کٛکّٜىٰ اِرِ مَاکٛ مَنْغُ نٛ حَانِ؞ 30 نغَمْ ندٜنّٛ اٛ ٻَدَکٜ اٛ مَايَ دٛوْ کُوغَلْ اَلْمَسِيحُ؞ اٛ سٛورِي يٛنْکِ مَاکٛ نغَمْ اٛ حُوَ کُوغَلْ وَلُّکِيَمْ نغَلْ اٛنْ مبَاوَتَا حُوُکِ؞