1 شِفْتٛرَنَا تٛکُّٻٜ يٜىٰسُ ٻٜ تٛکَّ لَامِيٻٜ اٜ اَرْدِيٻٜ ٻٜ نغَطَ کٛ ٻٜ مبِعِ، ٻٜ شِرْيٛو نغَمْ حُوُکِ کٛو اِرِ نغَلٜ کُوغَلْ بٛنْغَلْ؞ 2 وِعُٻٜ تٛع ٻٜ مٜتَ حَالَ کَلُّکَ دٛوْ غٛطّٛ، تٛع ٻٜ نغَرْتَ طَٻِّتٛوٻٜ حَوْرٜ، تٛع ٻٜ نغَرْتَ ٻٜ ٻٜرْطٜ شَطّٜ؞ سٜيْ نِ ٻٜ کٛلَّ کٛو مٛيٜ نغِکُّ بٛطُّمْ؞ 3 نغَمْ اٜنٜنْ مَا ندٜنّٛ اٜنْ اَنْدَانٛ کٛ نغَطٜتٜنْ، اٜنْ تٛکَّتَا کٛ طُمْ وِعِعٜنْ، اٜنْ مَجِّنَامَ؞ سُونٛ دُونِيَارُ حَٻِّيعٜنْ، اٜنْ نغِطِ کٛو اِرِ طُمٜ فِي کَلُّطُمْ؞ اٜنْ نغَطِي جٛنْدٜ مٜىٰطٜنْ ندٜرْ حَلّٜىٰندٜ اٜ لَوْلِيرُ، يِمْٻٜ نغَݧِيعٜنْ، اٜنٜنْ مَا اٜنْ نغَݧِيٻٜ؞ 4 اَمَّا ندٜ اَللَّه کِسْنٛووٛعٜنْ وَنْغِنِ يُرْمٜىٰندٜ اٜ يِدّٜ مُوطُمْ، 5 اٛ حِسْنِيعٜنْ، نَاع نغَمْ کُوطٜ بٛطّٜ طٜ نغَطُطٜنْ، اَمَّا نغَمْ يُرْمٜىٰندٜ مَاکٛ؞ اٛ حِسْنُعٜنْ بَرْکَ لٛوتُکِ ٻٜرْطٜ مٜىٰطٜنْ کِ رُوحُ مَاکٛ وَطِ وَرْتِرِيعٜنْ يِمْٻٜ حٜسْٻٜ؞ 6 اٛ حٛکِّعٜنْ رُوحُ مَاکٛ بَرْکَ يٜىٰسُ اَلْمَسِيحُ کِسْنٛووٛ مٜىٰطٜنْ؞ 7 تٛو، ندٜ يِدّٜ مَاکٛ وَرْتِرِيعٜنْ ٻٜ نغَلَا حَکّٜ يٜىٰسٛ مَاکٛ، جٛونِ اٜ مٛ يِطِ نغَرْتٜنْ دٛنٛوٻٜ يٛنْکِ کِ رٜعَتَا کِ نغَطّٜنْ ٻٜرْطٜ اٜنْ کٜٻَيْ؞ 8 فِي طُعُمْ طُمْ مبِيمَامِ طُمْ غٛونغَ؞ اٜ مِ يِطِ شٜمْبِطِنَا حٛرِيٻٜ دٛوْ مَاجُمْ نغَمْ کٛولِيٻٜ اَللَّه نغَاتَ حَکِّيلٛ مَٻّٜ دٛوْ وَطُکِ کُوطٜ بٛطّٜ؞ فُو فِي طُعُمْ اٜ وٛوطِ طُمْ نَفَنَيْ کٛو مٛيٜ؞ 9 اَمَّا اَنْ، وٛطِّتَ غٜدِّ مٜىٰرٜ اٜ فٜىٰرٛوتِرْکِ لٜݧٛلْ اٜ يِدّٜ حَوْرٜ اٜ يٜدّٛوتِرْکِ دٛوْ اَتَّوْرَ، نغَمْ وَلَا کٛ طُمْ نَفِ، طُمْ فِي مٜىٰرٜ؞ 10 تٛ غٛطّٛ اٜ وَدَّ فٜىٰرٛوتِرٛلْ حَکُّندٜ مٛوطٛنْ، تٛ اٛ وَݧِي وَغِّنٛلْ مَاطَ اَرَنْدٜوٛلْ اٜ طِطَٻٛلْ، دٛغُّمٛ؞ 11 اَ اَنْدِ اِرِ مَاکٛ اٛ غَݧُطٛ غٛونغَ، غَطٛووٛ کٛ وٛوطَا؞ کُوطٜ کَلُّطٜ طٜ اٛ وَطَتَ اٜ کٛلَّ اٛ وٛوطَا؞

12 تٛ مِ لِلٛيِي اَرْتٜمَسْ کٛو تِيکِکُسْ تٛ مَاطَ، سٜيْ نجَوْطٛطَا نغَرَا تٛ اَمْ اٜ غَرِيرِ نِکَفٛلِسْ نغَمْ اٜ مِ يِطِ مِ رُومَ تٛنْ؞ 13 وَطُ کٛ مبَاوَتَا وَطُکِ مبَلَّا جٜنَسْ لَوْيَاجٛ اٜ اَفٛولٛسْ ندٜرْ يَادُ مَٻّٜ، تَبِّتِنَا وَلَا کٛ ٻٜ ندُلِّ؞ 14 دٛولٜ يِمْٻٜ مٜىٰطٜنْ اٜکِّتٛو وَطُکِ کُوطٜ بٛطّٜ، نغَمْ ٻٜ مبَاوَ وَلُّکِ حَانُٻٜ وَلّٜىٰکِ ندٜنْ نغَمْ تٛع ٻٜ نجٛوطٛو جٛنْدٜ مٜىٰرٜ؞

15 فُو غٛنْدُٻٜ اٜ اَمْ اٜ کٛوْنُمَا؞ کٛوْنَنَايَمْ غِطْٻٜعٜنْ کٛولِيٻٜ يٜىٰسُ؞

اَللَّه بَرْکِطِنَعٛنْ اٛنْ فُو؞