31
Kolbaan Israa'elii Gara Biyya Ifii Deebite
1 Mootiin Waan Maraa «Bara san ani fira Israa'elii maraaf Waaqa hin te'a; isaanille kolbaa tiyya hin te'an. 2 Kolbaan shallaagaa jalaa hatte, goomolee keessatti fudhatama hin dhaggatti; ani foora Israa'elii kenniisaaf hin dhufa» jedha. 3 Mootiin Waan Maraa fagoo irraa natti mudhatee, «Ani Jaalala bara baraatiin si jaaladheera; tanaaf gadhi laafummaa tiyya sitti mudhiseera. 4 Ee kolbaa Israa'elii ani deebisee isin hin ijaara; isinille deebitanee hin ijaarantan; ammalle dibbee teessan qabattanee worra burraaqu woliin hin burraaxxan. 5 Ammalle isin gaara Samaariya'aa irratti muka woyni'ii hin dhaabbatan; worri isii dhaabe midhaan isi'ii hin nyaata. 6 Guyyaan Eeddoti kooba Efreemii irratti, ‹Kowa'a, gara Mootii Waan Maraa Waaqa keennaa
Xiyoonitti ol baana› jedhanee iyyanu hin dhufa.
7 «Marroo kolbaa Yaaqoobiitiif gammadaan faarsa'a!
Sooressa guddaa gosa biyya adda addaa
kolbaa Israa'eliitiif ilillisa'a.
Leellisa keessan dhageessisaa,
‹Ee Mootiin Waan Maraa,
kolbaa Israa'elii keessaa worra lubbu'uun hafe baasi!› jedha'a.
8 Kunoo, ani lafa kaabaa irraa isaan hin fida;
qaccee lafaa irralle'ee isaan wolitti hin qaba.
Naafaa fi ballaan,
dubartiin ulfaatii fi ta ciniinsifattu odduu isaanii jiran;
isaan kolbaa hedduu te'anee hin deebi'an.
9 Yennaa ani gara biyya isaanii isaan deebisu,
gammadaan bowaa daadimataa hin deebi'an.
Ani Israa'eliif abbaa,
Efreemille ilma kiyya angafichaa waan te'eef,
ani qarqara madda bisaanii,
karaa gufuu hin qanne,
ka isaan hin gufanne irra isaan hin sooressa.
10 «Ee gosa biyya adda addaa,
jecha Mootii Waan Maraa dhage'a'a!
Lafa qarqara abbaaya'aa ta fago'oo irraa,
‹Ka Israa'el bittinneesse wolitti isaan qabee,
akka tisse'ee hoolee ifii hin eega› jedha'aatii lallaba'a.
11 Ani sanyii Yaaqoobii hin woda;
harka worra isaan caaluu keessalle'ee isaan hin baasa.
12 Isaan dhufanee gaara Xiyoonii irratti
gammadaan hin faarsan;
arjooma kiyya,
ka midhaaniitiin,
ka daadhii woyni'ii o'itu'uu fi zayitii ejersaatiin,
ka buruusoo hoole'eetii fi re'e'eetiin,
ka raadaa fi jibichaatiin hin gammadan.
Isaan akka oorruu bisaan keessa yaa'uu hin te'an;
haganaa achi hin gaggabanu.
13 Ijoolleen isaanii ta durraa gammadaan hin sirban;
dargaggooti dhiiraatii fi jaarsoleen isaaniille hin firinxiixan.
Ani bowa isaanii gara gammadaa hin jijjiira;
gadda isaanii irraa isaan jajjabeessee
gammada isaaniif hin kenna.
14 Ani hayyoota tiyya coomaan hin quussa;
kolbaan tiyyalle arjooma kiyyaan hin quutti» jedhe.
15 Mootiin Waan Maraa, «Qoonqoon wiiccifataatii fi
bowicha gudda'aa
Raamaa keessatti dhage'ante.
Raahel ijoollee ifiitiif bootte;
ijoolleen isi'ii waan hin jirreef
jajjabaatuu didde» jedha.
16 Mootiin Waan Maraa Raaheliin,
«Ati hujii teetiif gatii waan dhaggattuuf,
qoonqoo teeti bowicha irraa,
ila teeti imimmaan irraa eegadhu;
ijoolleen teeti lafa diinaatii hin deebiti.
17 Maarre ati gara duraatiif addii qadda;
ijoolleen teeti gara biyya ifii hin deebiti» jedha.
18 Mootiin Waan Maraa,
«Ani dhugumaan aadiisa Efreemii dhage'eera;
inni, ‹Ati akka jibicha hin leenjifaminii
na adaddee anille adabame;
ati Mootii Waan Maraa Waaqa kiyya waan teeteef,
na deebisi, anille hin deebi'a.
19 Ani si irraa fagaadheen duuba, deebi'ee gaabbe;
ani hubadheen duuba gaddee qoma tiyya dhowadhe.
Sababa balleessaa bara dargagummaa tiyyaatiif fokkifadhee
salphadhe› jedha.
20 Efreem ilma ani jaaladhu,
ka ani itti gammaduu motii?
Yennaa maqaa isaa dhowu mara,
ani jaalalaan isa qaabadha.
Tanaaf gadhaan kiyya isa dharra'a;
ani dhugumaan marartii guddoo isaaf qaba.
21 Ee Israa'el, karaa keetiif beessisa dhaabbadhu;
waan karaa mudhisu keyadhu;
karaa guddaa irra deentu hubadhu;
gara qachaa keetii deebi'i.
22 Ee ati ta akka intala durraa ta hin addatannee,
haga yoomii asii fi achi joonjita?
Mootiin Waan Maraa waan haareya lafa irratti hin dada.
Kunille, Israa'el waajibittiin Mootii Waan Maraa
dhirsa ifii jabaa Mootii Waan Maraa hin hanqaffatti*Afaan Hibru'uu laakkossa kana irratti akka dansaa ifaa moti; te'uu malee addee tana keessatti hiikkaan tun irra caalaa fudhatama qaddi fakkaatti.» jedha.
23 Mootiin Waan Maraa Ka Waan Mara Dade, Waaqi Israa'elii, «Ani lafa isaan itti booji'amane keessaa gara lafa isaanii yennaa isaan deebisu, isaan biyya Yihuda'aatii fi qachaa achi keessaa keessatti, ‹Ee addee balchitti'i, ee gaara woyyicha, Mootiin Waan Maraa si eebbisu› hin jedhan. 24 Yihuda'aa fi qachoota Yihuda'aa keessa qonnaan bula'aa fi horsiisee bulaan marti woliin hin le'an. 25 Ani worra dadhabe, hunna isaanii hin haaressa; worra beelaan gaggabe hin quussa» jedha. 26 Kana irratti ani hirriiba natti mi'oweeru irraa dammaqee asii fi achi ilaale.
27 Mootiin Waan Maraa, «Barri ani mana Israa'eliitii fi Yihuda'aa namaa fi hori'iin guutu hin dhufa. 28 Akka isaan buqqifamanu, akka isaan diigamanu, akka isaan badanu, balaa isaan irratti fidiisaafille akkuma xiyyeeffadhe, ani isaan ijaariisaa fi dhaabiisaafille hin xiyyeeffadha. 29 Bara san nami isaaniin, ‹Abbootiin isaanii midhaan woyni'ii dhangaggowaa nyaatanee, ijoolleen isaanii ilkaan tutume› deebi'anee hin jedhanu.
30 «Ammoo nami martinuu cubbuma ifiitiif hin du'a;
ka midhaan woyni'ii dhangaggowaa nyaate marti,
ilkaanuma ifii hin tutuma.
31 «Barri ani kolbaa Israa'eliitii fi Yihuda'aa woliin gondooroo haareya godhadhu hin dhufa. 32 Gondooroon tun ta akka gondooroo yennaa abbootii isaanii biyya Gibxi'ii keessaa baasiisaaf, harka qabee isaan sooresseetii moti; ani abbaa manaa isaanii te'ulle isaan gondooroo tiyya waan diiganeef ani dudda isaanitti gale. 33 Gondooroon ani bara san kolbaa Israa'elii woliin godhadhu ta asii gad jirtu tana: ani seera kiyya qalbii isaanii keessa hin keya; gadhaa isaanii keessalle'etti hin barreessa. Ani Waaqa isaanii hin te'a; isaanille kolbaa tiyya hin te'an. 34 Ani yakkaa isaanii isaaniif hin araarama; cubbuu isaaniille deebi'ee isaanitti hin laakkowu; isaan marti diqqa'aa haga gudda'aatitti na waan beekanuuf, haganaa achi nami tokko ollaa ifii yookiin fira ifii, ‹Mootii Waan Maraa beeki› jedhee hin barsiisu» jedha.
35 Aduun guyyaa akka issitu,
ji'aa fi urjiin halkan akka issanu,
abbaayaa raasee,
danbaliin akka shookkittu ka godhe,
maqaan isaa Mootii Waan Maraa Ka Waan Mara Dade.
36 Inni, «Seerri jabaatee dhaabbate kun fuula kiyya duraa yoo bade qofa,
sanyiin Israa'elii kolbaa tiyya te'iisa lakkittee,
fuula kiyya duraa ijjumaa baddi» jedha.
37 Mootiin Waan Maraa, «Ol-gubbaan mikantee†Mikantee: Hagam akka dheerattuu fi badhattu meeshaa miki'iitiin yoo beekkante jechu'u. hundeen lafaalle qorqorantee yoo beekkante qofa, ani sanyii Israa'elii sababa waan isaan hujane maraatiif isaan hin gata» jedha.
38 Mootiin Waan Maraa, «Barri qachaan Yerusaalemii Xelleephoo Hanaani'elii irraa ka'ee haga karra roga dalleyaatitti deebi'ee naaf ijaaramu hin dhufa. 39 Meessaan achii ka'ee haga kooba Gaarebii dhaqee gara Go'aatitti marfata. 40 Dhooqi reeffi itti awwaalamuu fi daadhaan itti gatamu, fichaan odduu san jiru marti, haga dhooqa Qedrooniititti, karaa aduun baatulle'een haga karra fardo'oo ta roga dalleya qacha'aatitti, Mootii Waan Maraatiif ka woyyoomane hin te'an. Qachaan Yerusaalemii haganaa achi deebi'ee hin diigamu, hin badulle'e» jedhe.