38
Daadimata Yennaa Rakkinnaa
Faaruu Daawitii ta akka Waaqi isa qaabatuuf faarfatante.
1 Ee Mootii Waan Maraa, aari'iin na hin xixin;
mufi'iin na hin adabin.
2 Daayi keeti na woraaneera;
harki keeti gad na qabe.
3 Sababa mufii teetiitiif, nafi kiyya dhibameera;
sababa cubbu'uutiif, lafeen tiyya fayyaa hin qaddu.
4 Yakkaan tiyya mataa kiyya irra dabarteerti;
isiin akka ba'a'aa guddoo natti ulfaatteerti.
5 Sababa gowwummaa tiyyaatiif,
madaan tiyya shantee ajootti.
6 Ani gad jedhee, guddoo gugguufe;
guyyaa guutuu bowaa daaqe.
7 Hidhi kiyya waan na o'eef,
nafi kiyya fayyaa hin qabu.
8 Ani dadhabee, ijjumaa bututeera;
gadhaan waan na raafameef aada.
9 Ee Goottaa kiyya, ati halchaa tiyya mara beetta;
aadiisi kiyya si duraa dhokatee hin jiru.
10 Onneen tiyya na dhowatti; hunni tiyya na laatteerti;
ilti tiyyalle dhagguu dhaddeerti.
11 Jaaloti tiyyaa fi lansooti kiyya
sababa madaa tiyyaatiif na irraa baqatane;
firri kiyyaayyuu na irraa fagaatane.
12 Worri na ijjeesiisaaf barbaadu tiyyoo natti afan;
worri na miidhiisaaf barbaadu
na balleessiisaaf mari'atan;
isaan guyyaa guutuu mala natti dhowan.
13 Ani ammoo akka nama gurra duudee, hin dhage'u;
akka nama afaan duudee, hin dubbadhu.
14 Dhugumaan, ani akka nama hin dhageennee,
akka nama deebii deebisuu hin dandeennee ti.
15 Ee Mootii Waan Maraa,
ani ammoo addi'iin si eegadha;
Ee Goottaa Waaqa kiyya,
atille deebii naaf hin kennita.
16 Ani, «Worri yennaa miilli kiyya mucucaatu na irratti kooru,
akka isaan natti gammadanu hin godhin!» jedhe.
17 Ani jiguu geyeera;
yennaa mara ani dhibee woliin jira.
18 Yakkaa tiyya hin faaci'adha;
cubbuu tiyyaaf gadda.
19 Diinoti kiyya hunnaameyyiin baca'a;
worri sababa malee na jibbu heddu'u.
20 Yennaa ani waan dansaa huju
waan hantuu naaf deebisan;
yennaa ani waan dansaa hordofu
isaan na morman.
21 Ee Mootii Waan Maraa, na hin lakkisin;
Waaqa kiyya, na irraa hin fagaatin.
22 Ee Goottaa fayyisaa kiyya,
na qarqaariisaaf ariifadhuu koy.