50
Waaqonfannaa Dhuga'aa
Faaruu Asaafii.
1 Mootiin Waan Maraa,
Waaqi waaqotaa hin dubbata;
baya adu'uu irraa haga seensa adu'uutitti,
nama lafa irraa mara hin waama.
2 Gaara Xiyoonii,
ka miidhaginna guutuu qabu irraa,
Waaqi hin ifa.
3 Waaqi keenna hin dhufa; inni hin cadhisu;
ibiddi gubu isa dura jira;
hobonbolattiin jadduun cinaa isaa marsiteerti.
4 Inni kolbaa ifiititti muriisaaf,
ol-gubbaa gubbaa jirtuu fi lafa waamee,
5 «Worra ciinca'aan na woliin gondoorate,
ka naaf addatamane wolitti naaf qaba'a» hin jedha.
6 Waaqi abbaa mura'aa waan te'eef,
ol-gubbaan balchummaa isaa lalladdi.
7 Ammalle Waaqi, «Kolbaa tiyya, dhage'a'a;
Israa'el, ani si'i irratti dhugaa hin baya;
ani Waaqi keeti, Waaqa.
8 Ani, ‹Ciincaa naa dhikeessitu dhabe› jedhee si hin komadhu;
kennansi keeti ka gubamu yennaa mara fuula kiyya dura jira.
9 Ani moonaa teeti keessaa korommii,
gooree teeti keessaa korbeeyyii re'e'ee
fudhatiisaaf hin barbaadu.
10 Bineensoti baddaa keessaa marti,
horiin kooba kuma hedduu irraa marti kiyya.
11 Ani sinbirroota gaara irraa mara beeka;
wonni diida keessa munyuuqu marti tiyya.
12 «Biyyi lafaatii fi wonni isii keessaa marti
tiyya waan teeteef,
adoo beelowelle'ee ani sitti hin himu.
13 Ani foon korommi'ii nyaadhaa?
Yookiin dhiiga re'e'ee unaa?» jedha.
14 Ciincaa galataa Waaqaaf dhikeessi;
waadaa keeti Ol Aana'aaf muummessi.
15 Waaqi, «Guyyaa rakkinnaa na waami;
ani si baasa;
atille na hin ulfeessita» jedha.
16 Waaqi ammoo nama hama'aan,
«Waan ajaja kiyyaatuu maaf dubbatta?
Gondooroo tiyya maaf maqaa dhootta?
17 Ati adabamiisa jibbita;
jechoota kiyya ifiin duubatti gatta.
18 Hattuu yennaa dhaggitu, jaala teetaaf;
gaarayyeeffattoota wolille'een qooda qadda.
19 «Afaan keeti waan hantuu dubbata;
arrabi keetille soba odeessa.
20 Teettee obboleessa keeti hamatta;
ilma haadha teetii maqaa balleessita.
21 Ati waan kana goote; ani hin cadhisaa?
Ani akkuma keeti te'e na seetaa?
Amma ammoo waan ati goote sitti mudhisee,
si xixa.
22 «Isin worri ana Waaqa deetanu,
tana hubadha'a;
tun te'uu dhabaannaan ani isin kukkuta;
ka isin baasu hin jiru.
23 Nami ciincaa galataa naaf dhikeessu na ulfeessa;
nama karaa qajeelaa deemuuf,
fayyisiisa kiyya itti mudhisa» jedha.