1 ઈકુનિયુમ શેહેરામાય એહેકેન જાયા કા પાઉલ એને બારનાબાસ યહૂદી લોકહા સોબાયે ઠિકાણે આરે-આરે ગીયા, એને એહેકેન વાત કોઅયી, કા યહૂદી એને ગેર યહૂદી લોક બેન્યાહા માઅને બોજ જાઅહાય બોરહો કોઅયો. 2 બાકી બોરહો નાંય કોઅનારા યહૂદી લોકહાય ગેર યહૂદી લોકહાન વિસ્વાસી લોકહા વિરુદમાય ઉસરાવ્યા, એને દુશ્માની પૈદા કોઇ દેની.

3 એને પાઉલ એને બારનાબાસ ચ્યા બોજ દિહયા લોગુ તાં રિયા, એને પ્રભુ બોરહાવોય ઇંમાતથી વાતો કોઅતા રિયા, એને પોરમેહેરાય ચ્યાહાકોય ચિન્હ એને નોવાયે કામે કોઆડીન સાબિત કોઅયા કા યા સદા મોયાબારામાય ચ્યાહા સંદેશ હાચ્ચો આતો. 4 બાકી શેહેરા લોકહામાય ફુટ પોડી ગીયી, ચ્યાકોય કોલહાક લોક યહૂદીહાઆરે એને કોલહાક પ્રેષિતાહા આરે ઓઅય ગીયા.

5 જોવે ગેર યહૂદી એને યહૂદી ચ્યાહા નિંદા એને ચ્યાહાવોય દોગડાટાહાટી આગેવાનહા આરે ચ્યાહાપાય યેના. 6 તોવે ચ્યા ઈ વાત જાંઆય ગીયા, એને લુકાઉનિયા વિસ્તારા લુસ્ત્રા એને દિરબે શેહેરામાય, એને ચ્યા આહે-પાહે ભાગામાય નાહી ગીયા. 7 એને તાં હારી ખોબાર આખા લાગ્યા.

8 લુસ્ત્રા શેહેરમાય યોક માઅહું આતા, જો પાગા પાંગળ્યો આતો, તો જન્માથીજ લેંગડયો આતો, એને કોવેજ નાંય ચાલલો આતો. 9 તો પાઉલાલ વાતો કોઅતા વોનાય રિઅલો આતો, એને પાઉલે ચ્યાએછે યોકદીઠ એઅયા કા યાલ હારાં ઓઅના બોરહો હેય. 10 એને બોંબલીન આખ્યાં, “તો પાગહાવોય હિદો ઉબો ઓઅય જો” તોવે તો કુદીન ચાલા-ફિરા લાગ્યો.

11 લોકહાય પાઉલા ઈ કામ એઅઇન લુકાઉનિયા ભાષામાય બોંબલીન આખ્યાં, “દેવતા માઅહા રુપ લેઈને આપહેપાય ઉતી યેનલા હેય.” 12 ચ્યાહાય બારનાબાસાલ યુનાની દેવતા જ્યૂસ નાંવ દેના એને પાઉલાલ હિર્મેસ નાંવ દેના, કાહાકા તો મુખ્ય સંદેશ દેનારો આતો. 13 શેહેરા બાઆ યોક જ્યૂસ દેવતા મંદિર આતાં, ચ્યા મંદિરા પુંજારો ડોબેં એને ફુલહા આર્યો લેય યેયન શેહેરા મોઠા ફાટકાલોગુ યેય ગીયો, તો ચ્યા લોકહાઆરે મિળીન બલિદાન કોઅરા માગતો આતો.

14 બાકી બારનાબાસ એને પાઉલ પ્રેષિતાહાય જોવે વોનાયા, તોવે ચ્યા બોજ હેરાન ઓઅય ગીયા એને ગીરદ્યેમાય દાહુદી ગીયા, એને બોંબલીન આખા લાગ્યા, 15 “ઓ લોકહાય, તુમા કાય કોઇ રીઅલા હેય? આમા બી તે તુમહે હારકે દુ:ખ-સુખ બોગાવનારે માઅહે હેય, એને તુમહાન હારી ખોબાર આખજેહે કા તુમા યે નોકામ્યે વસ્તુહુથી આલાગ ઓઇન જીવતા પોરમેહેરાએછે યા, જ્યાંય આકાશ એને દોરતી એને દોરિયો એને જીં કાય ચ્યામાય હેય બોનાડ્યા. 16 ચ્યાય નિંગી ગીઅલા સમયામાય બોદી જાતહીંન ચ્યાહા-ચ્યાહા મોનાકોય ચાલા દેના.

17 તેરુંબી ભલા કોઇન આકાશ માઅને પાઆઈ એને ફળ દેનારો ચોમાહા તુમહાન દેયને, એને ખાઅના એને આનાંદા કોય તુમહાન તૃપ્ત કોઇન ચ્યા પોરમેહેરે પોતાના બારામાય સાક્ષી દેની.” 18 ઈ આખીન બી ચ્યાહાય બોજ મોઠી મુશ્કેલથી રોક્યા કા ચ્યાહાહાટી બલિદાન નાંય કોએ.

19 બાકી કોલહાક યહૂદી લોક અન્તાકિયા એને ઈકુનિયુમ શેહેરામાઅને યેયન લોકહાન ચ્યાહા એછે કોઇ લેદા, એને પાઉલાવોય દોગાડઝોડ કોઅયી, એને મોઅલો હોમજીન ચ્યાલ શેહેરા બાઆ ગોહલીન લેય ગીયે. 20 બાકી જોવે શિષ્ય ચ્યા ચારીચોમખી યેયન ઉબા રિયા, તોવે પાઉલ ઉઠીન શેહેરામાય ગીયો. એને બીજે દિહી બારનાબાસાઆરે દિરબે શેહેરામાય ગીયા.

21 એને પાઉલ એને બારનાબાસ ચ્યા શેહેરા લોકહાન હારી ખોબાર આખીન, બોજ શિષ્ય બોનાડીન, ફિરી યેતા સમયે ચ્યા લુસ્ત્રા શેહેરામાય ગીયા પાછે ચ્યા ઈકુનિયુમ શેહેરામાય ગીયા, એને પાછે ચ્યા પિસીદિયા વિસ્તારા અન્તાકિયા શેહેરામાય ગીયા. 22 એને બોદા શેહેરાહામાય શિષ્યહા મન સ્થિર કોઅતા રિયા, એને ઈ હિકાડતા આતા કા બોરાહામાંય બોની રા, એને ઈ આખતા આતા, આપહાન મોઠા દુ:ખ ઉચકીન પોરમેહેરા રાજ્યામાય પ્રવેશ કોઅરા પોડી.

23 એને પાઉલ એને બારનાબાસે બોદી મંડળ્યેહેમાય વિસ્વાસ્યાહાહાટી વડીલ નિવડયા, એને ઉપહા હાતે પ્રાર્થના કોઇન પ્રભુ ઈસુલ હોઅપ્યા, જ્યાવોય ચ્યાહાય બોરહો કોઅલો આતો. 24 તોવે પિસીદિયા વિસ્તારામાઅને ઓઇન ચ્યા પંફૂલિયા વિસ્તારામાય પોઅચ્યા. 25 પિરગા શેહેરામાય વચન આખીન અત્તાલિયા શેહેરામાય યેના.

26 એને તાઅને જાહાજાકોય અન્તાકિયા શેહેરામાય પાછા ફિરી યેના, જાઅને ચ્યાહાલ પોરમેહેરા સદા મોયામાય હોઅપીન ચ્યા કામાહાટી દોવાડલા આતા, જ્યાલ ચ્યા આમી પુરાં કોઇન ફિરી યેનલા આતા. 27 અન્તાકિયા શેહેર પોઅચીન ચ્યાહાય મંડળ્યેલ યોક્ઠી કોઅયી એને આખ્યાં, પોરમેહેરાય ચ્યાહાઆરે રોયન કેહેકેન મોઠે-મોઠે કામે કોઅયે, એને કેહેકેન પોરમેહેરાય ગેર યહૂદી લોકહાન ખ્રિસ્ત ઈસુવોય બોરહો કોઅરા લાયકે બોનાડ્યા. 28 એને પાઉલ એને બારનાબાસ શિષ્યહાઆરે બોજ દિહી લોગુ રિયા.