1 પાચ દિહી પાછે હનાન્યા મહાયાજક એને કોલહાક આગેવાન એને તિરતુલ્લુસ નાંવ્યો કાદો વકીલાલ આરે લેઈને કૈસરીયા શેહેરમાય યેય પોઅચ્યા, ચ્યાહાય રાજ્યપાલા હામ્મે પાઉલાવોય દોષ લાવ્યો. 2 જોવે પાઉલાલ હાદવામાય યેનો તોવે તિરતુલ્લુસ ચ્યાવોય દોષ થોવિન આખા લાગ્યો, “ઓ મહાપ્રતાપી ફેલિક્સ, તોથી આમહાન જો મોઠો આનંદ ઓઅહે, એને તો હોમાજદારીથી યે જાતેહાટી કોલહેક ખારાબ કામે હુદારતે જાતહેં.

3 ફેલિક્સાલ આમા બોદે જાગે એને બોદ્યેજ રીત્યેસે ધન્યવાદ હાતે માનજેહે.

4 બાકી યાહાટી કા આંય તો વોદારે સમય નાંય લા માગુ, આંય તુલ વિનાંતી કોઅતાહાંવ, કા મેરબાની કોઇન આમહે બેન યોક વાતો વોનાય લે. 5 કાહાકા આમહાય યા માઅહાલ પિડાકારક એને દુનિયા બોદા યહૂદીયાહામાય દામાલ કોઆડનારો, એને ઓ યોક સમાજા આગેવાન બી હેય જ્યાલ નાજરેતનો આખલો જાહાય. 6 ચ્યાય દેવાળાલ અશુદ્ધ કોઅરા વિચાર્યા, એને તોવે આમહાય ચ્યાલ કૈદી બોનાવી લેદો, આમહાય ચ્યાલ આમહે મૂસા નિયમાહા પરમાણે ડોંડ દેનલો જાતો.

7 બાકી સૈનિકા ટુકડયે સુબેદાર લુસીયાસે યેયન ચ્યાલ બળજબરીથી આમહે આથામાયને કાડી લેદા, 8 એને યાવોય દોષ લાવનારાહાલ તો હામ્મે યેઅના આગના દેની યે બોદયે વાતહે જ્યા બારામાય આમા ચ્યાવોય દોષ લાવતાહા, તું પોતેજ ચ્યાલ પારખીન જાઈ લેહે.” 9 યહૂદીયાહાયબી ચ્યા ટેકો દેયને આખ્યાં, યો વાતો યે પરમાણેન્યો હેય.

10 જોવે રાજ્યપાલે પાઉલાલ બોલાહાટી ઈશારો કોઅયો તે ચ્યાય જાવાબ દેનો: “માયે ઈ જાઇન કા તું બોજ વોરહાથી યા દેશા લોકહા ન્યાય કોઅતોહો, એને યાહાટી આંય આનાંદથી મા જાવાબ દેતહાવ.

11 તું પોતે જાઈ હોકતોહો, કા માન યેરૂસાલેમ શેહેરામાય આરાધના કોઅરાહાટી દેવાળામાય જાયને બાસ બારા દિહી ઓઅયાહા. 12 માયેવોય આરાપ લાવનારા લોકહાય માન નાંય દેવાળામાય, નાંય સોબાયે ઠિકાણાહામાય, નાંય શેહેરમાય કાદા આરે બોલા-બોલી કોઅતા કા લોકહામાય દામાલ કોઆડતો નાંય દેખ્યો. 13 એને નાંય તે ચ્યે વાતહે, જ્યેહે બારામાય ચ્યા આમી માયેવોય દોષ થોવતાહા, તો હામ્મે ચ્યા હાચ્ચાં સાબિત કોઅઇ હોકતાહા.

14 એને આંય તો હામ્મે કબુલ કોઅતાહાંવ, કા યા યહૂદી આગેવાનાહાન લાગહે કા આંય ખ્રિસ્તા વાટે અનુસરણ કોઅતાહાંવ જ્યાલ ચ્યા જુઠી વાટ આખતાહા, આંય આમહે આગલ્યા ડાયહા પોરમેહેરા ભક્તિ કોઅતાહાંવ, એને જ્યો વાતો મૂસા નિયમશાસ્ત્ર એને ભવિષ્યવક્તાહા ચોપડયેહેમાય લોખલાં હેય, ચ્યા બોદહાપે બોરહો કોઅતાહાંવ. 15 એને પોરમેહેરાથી આશા રાખહુ, કા જેહેકેન પોતે યા લોકબી રાખતાહા, કા ન્યાયી એને અન્યાય બેન્યાહાલ પોરમેહેર મોઅલા માઅને પાછો જીવતા ઉઠાડી. 16 યાથી આંયબી કોશીત કોઅતાહાંવ, કા પોરમેહેરા એને માઅહા એછે મા મન કાયામ નિર્દોષ રોય.

17 બોજ વોરહા પાછે આંય મા ગરીબ લોકહાહાટી બેટ એને પોરમેહેરાલ બલિદાન ચોડવાહાટી યેરૂસાલેમ શેહેરામાય આંય યેનલો આતો. 18-19 ચ્ચે સમાયે ચ્યાહાય દેવાળામાય માન ચોખ્ખાં કોઅના રીત પુરી કોઅતા દેખ્યા, તાં નાંય કાય ગીરદી આતી એને નાંય કોહોડા પ્રકારા આવાજ આતો, બાકી આસિયા વિસ્તારામાઅને યેનલા કોલહાક યહૂદી લોક તાં આતા, જો મા વિરુદમાય ચ્યાહાન કાય આખના હેય તે ચ્યાહાય તો હામ્મે યેયન માયેવોય આરાપ લાવાં જોજે.

20 કા ઈ તું પોતેજ આખે, કા જોવે આંય મોઠયે સોબાયે હામ્મે ઉબો આતો, તે ચ્યાહાન માંયેમાય કોઅહો ગુનો માલુમ પોડયો? 21 યોકુજ દોષ મા વિરુદ લાવી હોકતાહા, તો ઓ હેય જોવે આંય ચ્ચાહા હામ્મે બોંબલી-બોંબલીન આખતો આતો, આજે મા તોથી ન્યાય કોઅવામાય યેય રોયહો કાહાકા આંય બોરહો કોઅતાહાંવ કા પોરમેહેર ચ્ચા લોકહાન જ્યા મોઅઇ ગીઅલા હેય બીજાદા જીવતા કોઅરી.”

22 ફેલિક્સાય, જ્યેં યે વાટે વાતો ઠીક-ઠીક રીતે જાંઅતો આતો, ચ્ચાહાન ઈ આખીન ટાળી દેના, “જોવે સૈનિકાહા ટુકડયે સુબેદાર લુસીયાસ યેઅરી, તોવે તુમહે વાતે નિર્ણય કોઅહી.” 23 એને જોમાદારાલ આગના દેની, કા પાઉલાલ પેહેરા માય થોવલો જાય, એને ચ્ચા હાંગાત્યાહા માઅને કાદાલબી ચ્ચા ગોરાજેહે ખ્યાલ પુરી કોઅરા દેઅના.

24 કોલહાક દિહયાહા પાછે ફેલિક્સ રાજ્યપાલ ચ્ચા થેએ દ્રુસિલાલ, જીં યહૂદીની આતી, આરે લેયને યેનો એને પાઉલાલ હાદાડીન ચ્ચા બોરાહા બારામાય જો ઈસુ ખ્રિસ્તાવોય હેય, ચ્ચાથી વોનાયા. 25 જોવે પાઉલે જીં પોરમેહેરા હામ્મે હાચ્ચાં હેય, તી કોઅરા એને પોતાની લોબ લાલચવોય તાબામાંય રાખના એને પોરમેહેરાથી યેનારા ન્યાયા બારામાય આખા શુરવાત કોઅયા, ફેલિક્સાય બિઅતો-બિઅતો જોવાબ દેનો, “યે સમયે તું જો, જોવે માયેપાંય સમય રોય, આંય પોતે તુલ હાદી લિહીં.”

26 આમી, ફેલિક્સ ચ્ચે વાતહેબારામાય બિઅતો આતો, જ્યો પાઉલે આખલ્યો આત્યો, તેરુંબી તો ચ્ચાલ હાદતો આતો એને ચ્ચા હાતે વાતો કોઅતો આતો, કાહાકા તો વિચારતો આતો કા તો જેલેમાઅને બારે નિંગાહાટી ચ્યાલ કાય પોયહા દી ઈ આશા આતી. 27 બાકી બેન વોરહે નિંગી ગીયે, તે ફેલિક્સા જાગાવોય પુરકિયુસ ફેસ્તુસ રાજ્યપાલ બોની ગીયો, એને ફેલિક્સ યહૂદીયાહાન ખુશ કોઅના ઇચ્છાથી પાઉલાલ જેલેમાયજ થોવી ગીયો.