1 જોવે ફેસ્તુસ રાજ્યપાલથી ઈ નોક્કી ઓઅયા કા આમા જાહાજથી ઇટલી વિસ્તારામાય જાતા, તે રોમી ઓદિકાર્યાહાય પાઉલ એને કોલાહાક બિજા કૈદયાહાલબી યુલિયુસ નાંવા શતપતી આથામાય હોઅપી દેના, યુલિયુસ સમ્રાટ આૈગુસ્તુસ સૈનિકાહા ટુકડી જોમાદાર આતો. 2 અદ્રમુત્તિયુમ શેહેરા યોક જાહાજાવોય જીં આસિયા વિસ્તારા મેરાવોર્યા જાગામાય જાં તિયાર આતા, બોહીન આમાહાય આમે મુસાફરી સુરુ કોઅઇ દેની, એને અરિસ્તર્ખુસ નાંવા જો મોકોદુનિયા વિસ્તારા થેસ્સાલોનિક શેહેરા રોનારો આતો આમે હાતે આતો.

3 બીજે દિહી આમા સિદોન શેહેરામાય પોઅચી ગીયા એને, યુલિયુસાય પાઉલાવોય દોયા કોઅઈન ચ્ચાલ દોસ્તારાહાઈહી જાં દેના કા ચ્ચાહા જરુરી વસ્તુ લી યેય. 4 તાંઅરે આમહાય બીજેદા મુસાફરી સુરુ કોઅયી એને હામ્મેને વારો યા લાગ્યો, યા લીદે આમહાન સાઇપ્રસ બેટા ઇહિને આગલા જાં પોડ્યા. 5 એને કિલિકિયા વિસ્તાર એને પંફૂલિયા વિસ્તારા મેરાવોયને દોરિયામાઅને લૂસિયા વિસ્તારા મૂરા શેહેરામાય પોઅચ્યા. 6 તાં સરદારાલ સિકન્દરિયા શેહેરા યોક જાહાજ ઇટલી વિસ્તારમાય જાતા મિળ્યાં, એને ચ્ચાય આમહાન ચ્ચા જાહાજ વોય ચોડવી દેના.

7 જોવે આમા બોજ દિહયા હુદુ દિરે-દિરે ચાલીન બોજ કઠાણતા થી કનિદુસ શેહેરા હામ્મે પોઅચ્યા, તે યાહાટી કા હામ્મેથી વારો આમહાન આગલા નાંય જાં દેતો આતો, આમા સલમોના હામ્મેથી ક્રેતે બેટ બાજુ માઅને ચાલ્યા. 8 એને ચ્ચા મેરા-મેરાવોય કોઠાણ થી ચાલીન સુંદર બંદર નાંવા યોક જાગાવોય પોઅચ્યા, તાઅને લસયા શેહેર પાહી આતા.

9 જોવે બોજ દિહી વિતી ગીયા, એને દોરિયામાઅને મુસાફરી માય આબદા યાહાટી ઓઅતી આતી કાહાકા ઉપાસા દિહયે સણ પુરો ઓઅઇ ગીઅલો આતો. એને ઓજ તો મોસામ હેય, જોવે દોરિયો બોજ ખતરનાક ઓઅય જાહે યાહાટી પાઉલે ચ્ચા બોદહાન ઈ આખીન હોમજાડ્યા, 10 “ઓ બાહાહાય, માન એહેકોય જાણાયેહે કા યે મુસાફરી માય આબદા એને બોજ નુકસાન, નાંય ખાલી માલ એને જાહાજા બાકી આપહે જીવાલ બી ઓઅનારા હેય, યાહાટી મા ઈ સલાહા હેય કા આપા ખતરા મોસમા પાછે હુદુ ઈહીં વાટ જોવજે.” 11 બાકી સુબેદારાય કેપ્તાન એને જાહાજા માલિકા વાતહેલ પાઉલા વાતહે કોઅતા વોદારે માન્યા.

12 સુંદર બંદર નાંવા યોક બંદરગાહ હિયાળો દિહી કાડનાહાટી સુરક્ષિત નાંય આતા, યાહાટી બોજ જાંઅહા વિચાર જાયો કા તાઅને આગલા નિંગી જાય જો કોઅહિબી રીતે ઓઅઇ હોકે તે ફીનિક્સ બંદરગામાય પોઅચીન હિયાળા દિહી કાડજે, ઓ તે ક્રેતે બેટા મેરાવોય યોક બંદરગો હેય, જ્યા દોરવાજો દક્ષીણ-પચ્છીમ એને ઉત્તર-પચ્છીમ એછે હેય.

13 જોવે દક્ષિણા વાય-વાય વારો ચાલા લાગ્યો, તોવે ચ્યાહાય વિચાર્યા કા ચ્ચા યોજનાયે પરમાણે ફીનિક્સ પોઅચી જાહું, યાહાટી ચ્યાહાય લંગાર ઇસી લેદો એને ક્રેતે બેટા મેરા દોરિયામાઅને ઓઇન આગલા વોદ્યા.

14 બાકી વાયજ વાઅયે બેટા એહેરે યોક મોઠો તુફાન ઉઠયો, જીં યૂરકુલીન આખાયેહે. 15 જોવે તુફાન જાહાજેલ લાગ્યો, તોવે જાહાજ વારા હામ્મે ઠોરી નાંય હોક્યા, યાહાટી આમાહાય જાહાજેલ વારા હામ્મે છોડી દેના, એને યે રીતે વોવતા જાતા રિયા. 16 કૌદા નાંવા યોક વાહના બેટા આલુડ પોઅચીન જાહાજા પાછાડી બાંદલા ઉડ્યા સુરક્ષિત કોઅનામાય સક્ષમ રિયા, બાકી એહેકેન કોઅના બોજ મુસ્કિલ આતાં.

17 પાછે જાહાજ ચાલાડનારા જીવનરક્ષક જાહાજેલ ઉચકીન ચ્ચેલ સુરક્ષિત કોઅયા બોજ યુક્તિ કોયન જાહાજેલ નિચેથી લેયને ઉચે હુદી આસડાકોય ખેચીન બાંદી દેના એને સુરતિસ ખાડયે રેઅટાવોય ફસાય જાઅના બિકથી ચ્ચાહાય લંગાર ઉતાડીન જાહાજેલ વોવતા વારા હાતે-હાતે વોવીજાહાટી છોડી દેના. 18 જોવે આમાહાય તુફાનાથી બોજ વારા કોઇન બોજ આલાં લાગ્યા એને ધોક્કા ખાદાં, તોવે બીજે દિહી ચ્યા જાહાજા માલ ટાકાં લાગ્યા.

19 એને તીજે દિહી ચ્યાહાય ચ્યાહા આથા કોઇન જાહાજા માલ સામાન ટાકી દેના. 20 જોવે બોજ દિહયા હુદુ નાંય દિહી નાંય ચાંદાલેં દેખાય, એને મોઠો તુફાની વારો ચાલતો આતો, તોવે છેલ્લે આમે બોચના આશા જાતી રોયી.

21 જોવે ચ્યા બોજ દિહયા હુદુ બુખા રોય ચુક્યા, તે પાઉલે ચ્યાહા વોચ્ચે ઉબો રોયન આખ્યાં, “ઓ લોકહાય, જો ક્રેતે ઇહિને જાઅના મા સલાહા તુમા માની લેતા તે તુમા યા વિનાશ એને નુકસાન થી બોચી જાતા.

22 બાકી આંય તુમહાન આમી હોમજાડુહું કા ઈંમાત રાખા, કાહાકા તુમહેમાઅને કાદાજ જીવા નુકસાન નાંય ઓઅરી બાકી જાહાજા નોકીજ નુકસાન ઓઅરી, 23 કાહાકા પોરમેહેર જ્યા આંય હેય, એને જ્યા ભક્તિ કોઅહુ, ચ્યા હોરગા દૂતાય ગીયી રાતી માપાય યેયન આખ્યાં. 24 ‘ઓ પાઉલ, બીયહે મા તુલ કૈસરા હામ્મે ઉબા રોઅના જરુરી હેય, એને પોરમેહેરાય બોદહાન જ્યા તોઆરે મુસાફરી કોઅતાહા, ચ્યા બોદહાન વરદાન દેનહા.’ 25 યાહાટી, ઓ માઅહાય, ઈંમાત રાખા, કાહાકા આંય પોરમેહેરાવોય બોરહો કોઅહુ, કા જેહેકેન માન આખવામાય યેનહા, તેહેકેનુજ ઓઅરી. 26 બાકી આમહાન યોકદા બેટવોય જાયને રા પોડી.”

27 જોવે ચૌવુદવી રાત ઓઅઇ, એને આમા આંદ્રિયા દોરિયામાય બટકી રીઅલા આતા, તોવે આરદ્યે રાતી પાહી જાહાજ ચાલાડનારાહાય જાંઅયા કા આમા યોકદા મેરા પાહી પોઅચી રીયહા. 28 ચ્યાહાય પાઆઈ માપા દોરી ટાકી તોવે ચ્યાહાન સત્રીસ મીટર ઉંડા પાઆઈ માલુમ પોડ્યા, એને વાહાય આગલા જાયને પાછા પાઆઈ માપા દોરી ટાકી તોવે સત્યાવીસ મીટર માલુમ પોડ્યા. 29 તોવે દોગડા વાળી જાગામાય ઠોકાય જાય ચ્યા બિકથી ચ્યાહાય જાહાજા પાહલા ચાર લંગાર ટાક્યા, એને દિહી નિંગા વાટ જોવી રિયા.

30 બાકી જાહાજ ચાલાડનારા જાહાજ વોઅને નાહા કોઅતા આતા, એને ચ્યાહાય જાહાજા હામ્મેથી લંગાર ટાકના બહાના કોઇન વાહની ઉડી દોરિયામાય ઉતાડી દેની; 31 તોવે પાઉલે સુબેદારાલ એને સૈનિકાહાલ આખ્યાં, જો યા જાહાજાવોય નાંય રોય, તે તુમાબી નાંય બોચી હોકહા. 32 તોવે સૈનિકાહાય દોરડે કાતરી ટાક્યેં એને વાહના ઉડ્યાંલ પાડી ટાક્યા.

33 જોવે ઉજાળાં ઓઅનારા આતા, તોવે પાઉલે ઈ આખીન, બોદહાન ખાઅના ખાંહાટી રાવ્યો કોઅયા, “આજે ચૌવુદમો દિહી ઓઅયો કા તુમા ચિંતા કોઅતા-કોઅતા બુખા રિયા, એને કાંઇજ ખાઅના નાંય ખાદાં. 34 યાહાટી આંય તુમહાન આખહુ કા કાય ખાય લા, જ્યાથી તુમહે બોચાવ ઓએ; કાહાકા તુમહેમાઅને કાદાબી નાશ નાંય ઓઈ.” 35 એને ઈ આખીન ચ્યાય બાખે લેઈને બોદહા હામ્મે પોરમેહેરા આભાર માનીન એને બાખે તોડીન ખાં લાગ્યો.

36 તોવે ચ્યા બોદા ઈંમાત કોઇન ખાઅના ખાં લાગ્યા. 37 આમા બોદા મિળીન જાહાજેમાય બોસો છોતેર જાંઆ આતા. 38 જોવે ચ્યા ખાઅના ખાયન દારાયા, તોવે ગોંવ દોરિયામાય ટાકી દેયને જાહાજ ઓળકાં કોઆ લાગ્યા.

39 જોવે દિહી નિંગ્યો, તોવે ચ્યાહાય ચ્યા દેશાલ નાંય વોળખ્યો, બાકી યોક નોયાડો દેખ્યો, જ્યા મેરો ચોરાસ આતો, એને વિચાર કોઅયો એહેકોય ઓઈ હોકે તે ચ્યાવોય જાહાજ ઉબો રાખાયી. 40 તોવે ચ્યાહાય લંગારાહાલ ખોલીન દોરિયામાય છોડી દેના એને ચ્યેજ વેળે સુકાનના બી બોદાંજ દોરડા ખોલી દેના એને વારા હામ્મે આગલાર્યો ભાગ ચોડવીન મેરાવોય લેય ચાલ્યા. 41 બાકી બેન દોરિયા યોકઠા ઓઅના તાં રેઅટા જાગે જાહાજા આગલો ભાગ ખુઅપાય ગીયો, ચ્યાહા જાહાજ ઉબા કોઅયા ચ્ચા આગલા નાંય વોદ્યા, બાકી જાહાજા પાહાલાને ભાગ લાફાહા કોઇન ટુંટા લાગ્યો.

42 તોવે સૈનિકાહાન વિચાર યેનો કા કૈદયાહાલ માઆઇ ટાકના, એહેકોય નાંય ઓએ કા કાદો જેપીન નિંગી જાય. 43 બાકી શતપતી પાઉલાલ બોચાડના ઇચ્છાથી ચ્યા વિચારથી રોક્યો, એને ઈ આખ્યાં કા, “જો જેપી હોકહે, પેલ્લા કુદીન મેરે નિંગી જાય. 44 જ્યા જેપી નાંય હોકે, ચ્યાહાય પાટ્યાહાવોય, એને બિજા જાહાજા કાય બીજી વસ્તુ આસરો લેઈને નિંગી જાય.” યે રીતેથી બોદાજ હારેરીતે મેરે પોઅચી ગીયા.