2
To̱o̱g-u̱s Yunana u̱du̱ u-Ru̱
1 Da-u̱ wa o̱o̱ge̱ u̱-me̱ me̱n-tu̱ u-jan, Yunana no̱ng u̱s-to̱o̱g u̱du̱ Yawe u-Ru̱. 2 Wa zu̱,
<<U̱m fak Yawe u̱ te̱k-u̱
swadu̱ u̱r-ko̱b u̱ ri,
tu̱msu̱ wa shu̱s to̱o̱g-u̱s ri.
U̱-me̱ be-du̱ u̱r-shu̱'u̱t
du̱ marimari ne̱,
tu̱msu̱ bo̱ hog ko̱n-u̱s ri.
3 Bo̱ gwu̱nu̱g me̱ u̱-me̱ m-bu̱ mu̱ u̱r-ra,
u̱ te̱k-u̱ dak-u̱ m-sa.
U̱m o̱ u̱-me̱ m-bu̱,
tu̱msu̱ jwak m-bu̱, re̱e̱g be̱b-u̱r ri.
4 U̱m zu̱u̱g, <Ko̱ bo̱ hastu̱ me̱ du̱gu̱-du̱ ró,
ko ba shu̱'u̱te̱ iya,
me̱ u̱t-sur m-hyan
pyu̱-u̱ u-he̱n u̱ ró.>
5 Bu̱-mu̱ re̱e̱g me̱ u̱r-hi,
bu̱-mu̱ m-sa taku̱ste̱ me̱ u-be̱e̱t.
Gwa-su̱ me̱ m-sa
taku̱ste̱ hi-u̱r ri.*Gwa-tu̱ apne̱ u̱-me̱ m-sa.
6 U̱m yi'iste̱ u̱-ta
m-sa m-te u̱ be-du̱ u̱t-ta'ar.
U̱m o̱ u̱-me̱ be-du̱ marimari ne̱.
Yawe, u-Ru̱ u̱ ri,
bo̱ wa ruutu̱ me̱ u̱-me̱ u-kub.
7 <<Yawe, da-u̱ u̱m ho̱ge̱ fat-u̱r ri
o̱ m-rwu̱;
tu̱msu̱ u̱m nom u̱s-to̱o̱g u̱du̱ ró,
Tu̱msu̱ bo̱ hog ko̱n-u̱s ri
u̱-me̱ be-du̱ u-he̱n u̱ ró.
8 <<Ne̱t-tu̱ o̱o̱ge̱ no̱m-du̱ u̱t-huuk m-gir,
e̱ gu̱gu̱mte̱ o̱n-du̱ u̱
cwan-tu̱ u-Ru̱ ne̱.
9 Se̱di me̱, u̱ nu-u̱ u̱t-vam.
U̱m de̱ no̱m-du̱ to̱o̱g u̱du̱ ró.
Me̱ shu̱su̱ este̱du̱ u̱s-rem u̱ ri,
remu̱ u̱ku̱r u̱ o̱o̱n du̱gu̱ Yawe.>>
10 Se̱ Yawe wu̱' jan-yu̱ gwa'u̱n Yunana u̱-kit m-sa.