3
Yunana o̱ m-ha u̱ Neneba
1 Rem-u̱s Yawe sur m-haan u̱du̱ Yunana u-yu̱ru̱mse̱. Wa zu̱, 2 <<Yu̱ne̱ bo̱ ha u̱ Neneba bo̱-u yat-o̱, bo̱ waru̱ ne̱t-tu̱ o̱ u̱ku̱n rem-su̱ u̱m waru̱ bo̱.>>
3 Yunana er rem-u̱s Yawe, se̱ wa yu̱ne̱ wa hu̱ u̱ Neneba. Bo̱-u̱ Neneba o̱o̱g u̱ yat-o̱ o̱ sok, se̱ ne̱t no̱ng m-roog u̱t-tu̱t kanda wa hyan bo̱-u o̱ u-be̱e̱t. 4 Ho̱-du̱ Yunana cwaye̱ u̱-me̱ bo̱-u̱ Neneba, wa nom u̱r-hoot u̱r-gan. Se̱ wa he̱e̱se̱ no̱m-du̱ u̱r-do̱nse̱ u̱zu̱, <<Kwu̱ku̱s m-roog u̱t-shik u̱t-yu̱r u̱ na haatu̱n u̱ ho̱-du̱ bo̱-u̱ Neneba.>> 5 Ne̱t-tu̱ Neneba hog rem-u̱s u-Ru̱, e̱ dor se̱. E̱ nom u̱r-do̱nse̱ kowan u̱ no̱m u-swaat, iya o̱ hen u̱ ne̱t-u̱t wu̱to̱ u̱ ya'ag-u̱ re̱k-e̱, kowan nom u-swaat, tu̱msu̱ e̱ wu̱ cwu̱-tu̱ ko̱se̱-du̱ namu̱ jab remu̱ ba'as-u̱t u̱n.
6 Da-u̱ faru̱k-u̱ Neneba ho̱ge̱ rem-su̱ Yunana ware̱, wa yu̱ne̱ du̱gu̱ pora-du̱ u̱r-faru̱k-u̱ wa. Wa wu̱' cwu̱-tu̱ ko̱se̱ namu̱ jab. Wa shu̱'u̱t u-dak u̱ do̱m m-cwa remu̱ ko̱ste̱ u̱zu̱ wa yakke̱ u̱t-ba'as. 7 U̱ da-u o̱, faru̱k wu̱' na no̱m u̱r-do̱nse̱ u̱-me̱ bo̱-u wa u-be̱e̱t u̱zu̱:
Du̱gu̱ nu-u faru̱k-u̱ i-yate̱ wa ne̱.
<<Ana yage̱ ne̱t ko̱ u-bisa o̱ rak no̱m u̱t-re̱ da, a waku̱n u̱ re no̱m u̱t-re̱ ko̱ wa swa m-bu̱ da. 8 Yage̱ ne̱t, u̱t-bisa ne̱ u̱ wa' kus-tu̱ ko̱se̱ namu̱ jab. Tu̱msu̱ yage̱ ko̱wan u̱ fag u-Ru̱ m-ho̱r-m-ho̱r. Ko̱wan byu̱ru̱n du̱gu̱ fu̱n-u̱s yo̱-se̱ wa, u̱ yu̱nu̱s-du̱ jab-su̱ u̱t-ne̱t ne̱. 9 Jiya Ru̱-o̱ u̱t-ho̱g u̱r-o̱n, wa toros jab-u̱ wa remu̱ ba'as-u̱t in, wa yage̱ mo̱ttu̱ ho̱-du̱ in.>>
10 Da-u̱ Ru̱-u̱ hyane̱ u̱zu̱ u̱n yakke̱ u̱t-ba'as u̱ remu̱ yage̱-du̱ no̱m-du̱ no̱m-u̱t yo̱-to̱ u̱n, se̱ wa hog o̱n-u̱r u̱n. Wa yage̱ mo̱ttu̱ ho̱-du̱ u̱n tu̱ wa o̱o̱ge̱ wa zo̱ngte̱.