No Pakpakat ta Pol tupas ira
GALESIA
Pol gata so ira lotu tano hanua Galesia (aring diet lik bia tano nuna luena hinahaan ma aring diet lik bia tano nuna airua na hinahaan). Ma kaikek ra mataniabar na Galesia pai Iudeia diet. Pa diet ga murmur ira warkurai ta Moses. Taia. Diet ga nurnur sena mon ta Iesu ma Kalou ga halon diet. Senbia namur dahina, bia Pol gata haan laah, aring tena hausur bisbis diet ga haan tupas ira Galesia ma diet ga hasasei diet bia pai tale bia tikai na kap no nilon hathatikai ing bia i nurnur ta Iesu sena mon. I supi mah bia na mur ira warkurai ta Moses, ma tiga tamat na warkurai no magingin na kut palatamaina tunatuna wara haminis bia ia tikai ta ira mataniabar ta Kalou. Ma bia Pol ga ser lah iakan ra hausur ga manga ngalngaluan ma ga karup mah bia ira Galesia diet na taram wara hanhadadei iakan ra hausur ing i mesa harsakit tano tutun na tahut na hinhinawas nong diet ga kap timaan lah ia ta Pol (nas Galesia 1.6-9). Pol ga wara hamhaminis ta diet bia iakano tahut na hinhinawas sena mon i tale bia na halon diet. Pol ga haminis bia no nuna warawai i tutuna kanong Kalou at ga pilak ia bia ia tiga apostolo ma ga tar iakano hinhinawas tana (1.11-2.10). Ma no suruna tano tahut na hinhinawas, ma no suruna ta iakan ra pakpakat mah i hoken, bia Kalou na kurei bia tikai i takodas ra matmataan tana ing bia i nurnur sena mon ta Karisito, ma pataia bia i murmur ira bilai na magingin ta ira warkurai ta Moses (2.16-21). Pol ga haminis bia pataia tikai pai tale bia na mur ira warkurai ta Moses, ma Kalou i nem bia dahat na nurnur sena mon hoing Abraham ga nurnur waing Kalou na kurei bia dahat takodas ma bia dahat na langalanga talur kaikek ra dadas na warkurai (3.1-4.31). Ma sena pai tahut bia dahat ing pa dahat kis taar manapu ta ira warkurai bia dahat na gil ira sakena (5.1-15). Taia. Tano nudahat nurnur dahat langalanga um wara murmur ira tahut na tintalen ing no Halhaliana Tanua na lam dahat bia dahat na lon hua (5.16-26).
1
1 Iau Pol tiga apostolo. Ma aring tunatuna mon pa diet ga pilak iau bia iau tiga apostolo, ma tiga tunatuna pa ga tulei mah iau. Senbia iau ta kap no kinkinis na apostolo maram ta Iesu Karisito ma Kalou no adahat Sus nong ga hatut ia talur ra minaat. 2 Io, iau tikai ma ira tasigu narako ta Karisito ing diet kis tikai ma iau, mehet pakat iakan ukai ta muat ira mataniabar na lotu ta ira tamtaman tano hanua Galesia. 3 A harmarsai ma ra malum tupas muat maram ta Kalou no adahat Sus ma no nudahat Watong Iesu Karisito. 4 Io, Karisito ga tar sei no nuna nilon ga maat bia na halon dahat talur ira sakana tintalen ta iakan ra pakana bung. Ma ga maat hua haruat tano sinisip gar ta Mama no nudahat God. 5 Io, tutun sakit, dahat na pirlat Kalou hathatikai.
Tiga tahut na hinhinawas sena mon i kana
6 Maris! No balagu i manga karup bia habir a mon ma muat hanahaan talur nong ga tatau muat. Ma ga tatau muat hoeh? Ga tabar muat ma Karisito. Ai! Habir a mon ma muat sisiel taar tiga mes na hinhinawas nong aring diet tangai bia ia no tahut na hinhinawas. 7 Senbia iakanong pai no tahut na hinhinawas tutuna. Ma iau tangai hoken kanong aring diet wara hangungua muat ma diet sip bia diet na kios hagawai no tahut na hihinawas uta Karisito. 8 Ing bia mehet at, bia tiga angelo maram ra mawai na warawai ta muat ma tiga mes na hinhinawas pai harharuat ma nong mehet ga hasasei muat ma ia, io, iau saring Kalou bia na haliarei tutun at ia. 9 Hoing mehet ga tangai naluai, kaiken iau tangai habal hoken: ing bia siga tikai i hasasei muat ma tiga mes na hinhinawas ta ing muat ga kap lah, io, iau saring Kalou bia na haliarei tutun at ia.
10 Muat lik hoeh? Ing bia iau tangai hua i nanaas bia iau nem bia ira tunatuna diet na haut lah iau? Taia tutun at. Senbia iau nem bia Kalou na haut lah iau. Hoeh, i nanaas bia iau wara haguama ira tunatuna? Taia. Ing bia iau gaar walwalar baa wara haguama ira tunatuna, io, pa gaar tale bia iau tiga tultulai gar ta Karisito.
Kalou at ga pilak Pol
11 Ira tasigu narako ta Karisito, iau nem bia muat na palai bia no tahut na hinhinawas nong iau ga pirpir muat ma ia pai hanuat makaia tiga tunatuna. 12 Taia ta tunatuna ga hasasei iau bia ga hausur iau tana. Senbia Iesu Karisito ga hapuasnei ia tagu.
13 Io, muat gata hadadei tar utano nugu mangana nilon naluai ing iau ga kis taar ta ira numehet mangana nurnur ira Iudeia. Iau git manga hagawai ira mataniabar tano lotu gar ta Kalou ma iau la walwalar bia iau na haliarei ia. 14 Iau ga manga keskes ta diet ira haleng ta ira nugu harhis wara murmur timaan ira numehet magingin ira Iudeia. Ma iau ga murmur ira hausur ta ira hintubugu ma ra tamat na gungunuama ma ra tamat na baso. 15-16 Senbia Kalou ga gilimis lah iau tano nuna harmarsai naluai tano pakana bung pa di ga kaha baa iau, ma ga tatau iau wara nuna. Ma ga nem bia na hapuasnei no Natina tagu ma uram narako tagu, waing iau naga warawai nalamin ta diet ing pai Iudeia diet. Ma ing Kalou ga gil hua, pa iau ga kap ta pir ta tiga tunatuna uta iakan ra hinhinawas. 17 Ma pa iau ga haan mah uram Ierusalem ta diet ing diet ga luena kap no kinkinis na apostolo tagu. Senbia iau ga haan laah u na Arabia ma namur iau ga tapukus baal u Damaskas.
18 Io, aitul a tinahon gata sakit, iau ga haan uram Ierusalem bia mamir naga harusa ma Pita. Ma iau ga kis tikai ma ia sangahul ma liman na bung. 19 Senbia pa iau ga nas tikai ta diet ira mes na apostolo, Jemes sena mon, no tasina no Watong. 20 Io, iau sasalima ra matmataan ta Kalou uta ira linga iau pakpakat ukatika ta muat bia pai a bis. 21 Io, namur iau ga haan uras ta ira airua hanua Siria ma Silisia. 22 Ma ira lotu ta Karisito aras tano hanua Iudeia pa diet ga nunurei iau. Taia. Pa diet ga tale bia diet na nas kilam mah no matmataan tagu. 23 Senbia diet ga serser mon iakan ra hinhinawas nong ga tangai hoken: “Ia nong ga haliarei baa dahat, kaiken i warawai baal utano tahut na hinhinawas nong dahat nurnur tana. Ma naluai ga walar bia na haliarei iakan ra hinhinawas.” 24 Ma diet ga pirpirlat um Kalou utagu.