1 Akwama mǝng ma kuuram kwa na da ɗiiya ghuunja zǝraabana, mbats, dǝga zhiruw bi kǝ iin langan da vaka taa shari kwar yaa dadda gatǝgǝn biya, ma marau lang davak yaa dadda gatǝg nǝ iin biya? 2 Mbats, am sǝrgabi taakiya yaa daddaha gatǝg nǝ lii da tǝtǝr shari kǝ duni biya? Akwama ba kuuram wada tǝgar shari kǝ duni tsautsa , am tǝgai kǝ shari tǝghǝr kǝ dǝgitahan ǝnkyǝkwahahaan biya? 3 Amm sǝrgabi taakiya kǝmyam wada tǝtǝr shari kǝ zǝrɓǝlgaha Daadamazhigǝl biya? Kyakaɗava dǝgitahi ma kwan kǝ duuniyi kaciya? 4 Akwama dzǝghadzǝg nǝ hulfa kwanahaan dǝ kuurama, aujibǝg am lang davak kwa yaa daddaha gatǝn biyi? 5 Taganɗatag nai kwana mbakyavad am dǝm dama zhiruwa, aitsa, maay aandzu pal makuuram nǝ daddakwa dǝ dabari kwada ɓadlǝna ɓadlǝg ndzǝgana zǝraaba ard zǝraab biya? 6 Aujibǝg kaci kǝ dadda gatǝg ɗiiya ghuunja zǝraaban da dama guda taa shari, kwa tǝvuukwa yaa daddaha gɑtǝg biyi! 7 Diiya ghuunja zaraabaha ruwǝn am ɓag nǝ uuram na, abi hǝtsamal hǝtsǝg nǝ uuram ǝndkwahiina, ngulǝm am fak kǝ huɗa zǝkuruu nǝ uud biya, dlaɓa am fa kǝ huuɗa aandzu ma hutsakurvahutsǝg nǝ uud kǝ dǝgahaaru biya? 8 Iin wan kwana, bakura kuurama am za dǝga zaraabaharuwa, am hǝkya dǝga uudaha, baz dǝga zaraabaharuwa! 9 mbats, am sǝrgai taakiya lii maay ɓa dǝga jirjir biya ar da dǝgaabi dama tlǝkǝsa Daadamazhigǝl biya? Aa valkurdabi nǝ uud biya adaba maay nǝ lii ɓa gǝlla, ard lii ɓagarnǝs kwatǝnahǝr kǝ ghǝlaha, ard lii ɓa gwaragwara, aadzu ghulvahi hǝnna dǝ zǝraabatǝr ghulva, 10 Ma gǝllaha, ma lii dlǝrmǝga, ma lii tsǝtǝr nǝ kya, ma lii ɗavaɗaava, ma lii pǝrɗa dǝguuda, maay aandzu pallatǝr kwa da daadama tsǝkǝsa Daadamazhigǝla. 11 Ndza bandkwaha nǝ kyalmaharu wurra, ndakwana barakuraka barǝg nǝ uuda, fakurafǝg nǝ uud ba cadlǝdlǝ tǝvuukwa Daadamazhigǝla, dlǝɓa ngǝdlakura ngǝdlǝg nu uud sagal ma haipahahu tǝvuukwa Daadamazhigǝla ma ɗaaga Yaazhǝgǝla Yesu Tlǝkatǝga, ard shidkwa Daadamazhigǝla miiyama.

12 “Haighwanthaig nǝ uud kǝ dǝgitsh baɗǝmma” dlaɓa baɗǝm bi nǝ dǝgitah kwa mǝng nǝ tlǝran biya, “Haighwanthaig nǝ uud, kǝ dǝgitah baɗǝmma”, ǝn nǝgalbi kǝ Eva aandzu ma bau biya. 13 “Tavatǝg nǝ kaffa mbakyarvad huuɗɗa, huuɗ dlaɓa mbakyarvad kaffa,” ba Daadamazhigǝl wa da ghyǝhtǝrghyǝhga ba bǝrkuɗa, ɓagava mbakyarvad gwaragwar nǝ vǝghǝ biya, mbagava mbakyǝ tlǝkatǝga, tlǝkatǝg dlaɓa mbakyarvad vǝghǝgha. 14 Ciighant ciig nǝ Daadamazhigǝl kǝ Yaazhǝgǝl ma gǝtlaha, bandkwah dlaɓ nǝ miiyama da ciikiyamciig nǝ uud tǝdvad ndzǝɗaana. 15 Mbats, am sǝrgabi taakiya vǝghǝghaharuwa uuɓiyaha tlǝkatǝg biya? Ən haigant biya, ǝn kǝsant kǝ uuɓiyaha tlǝkatǝga ǝn nǝdal kuuɓiya karuu biya. 16 Am sǝrgai taakiya baɗǝm daddakwa matlǝgant vǝghǝghan dǝ karuuwa naral nǝg kǝ vǝghǝ pall biya? Aɗaba viindaviindan ma kakkaɗa Daadamazhigǝl taaki, “Ba bǝrkuɗatǝra naralnǝg kǝ vǝghǝ palla.” 17 Baɗǝm nǝ daddakwa matlǝghant matlǝg kǝ ghǝran dǝ tlǝkatǝga naralnǝg kǝ ma shidkwa cacuwana cacuwananna. 18 Duwamars ɗuug kǝ ɓa gwaragwara! baɗǝm nǝ haipi ɓag nǝ uuda dzavǝmbi dǝ vǝghanbiya, aɗaba dada gwaragwara ɓagar haip kǝ ghǝraana. 19 Am sǝrga bi taakiya vǝghǝgharuwa guda shidkwa cacuwana cacuwananna kwa makurama , dlaɓa vak Daadamazhigǝl biya? Kuuram bi wam dǝ ndzǝɗ tǝ ghǝraruu biya. 20 Sǝgwara dǝ sǝɡw nǝ uuda pǝlavapǝlǝga. Mbakyarvad kwaha galamgalǝg kǝ Daadamazhigǝl dǝ vǝgharuwa.