1 Aiciya, ǝlɓǝga mǝltǝru kǝ yaa daddaha gatǝga, ɓagamɓag bandkwa taganter nai kǝ dlamakǝla lii gatǝga kwa ma Galatiya taaki aa ɓagarɓaga. 2 Ma kwar kǝ laada, am fǝgaan kǝ kwaɓa kalkala dǝgiti tlǝkǝna nǝ uudana, bamma ǝn sǝgǝv naiy lakwti am da dzaha dǝgiti kwa da mǝlvaru kǝ uud biya. 3 Akwama da danǝv dǝga, ǝn da ɓǝltǝrant kǝ lii haiyamant_haig nǝ uuram dǝ iitǝra, ǝmtad dǝ wakiita mara ghǝraatǝra. 4 Akwama ɓagaɓag kǝ maraw ǝn dǝv naiy ndakwani, bar da pughkwazhana.

5 Ən da dagau da vakaruwa da tagkur uusaa, tǝhalakwama gwayavagwaiga ma haaya makiduniya, aɗaba ǝn naagan kǝ dagal damma makiduniya. 6 Mbatak ǝn da zǝlmazǝlǝmǝg vakaruwa, ǝn da ghyǝnngǝna kǝ viiyaksa vaksruwa, aɗaba am da mǝlwad ba kǝla vakavaki ǝn da dagal naiya. 7 Dǝ naagarbi akwama nǝghankurnǝghǝg ǝn tsǝkura dǝ fǝt biya, mana naag nai ǝn ɓaga kǝ hǝngah vakaruwa, akwama haighant nǝ Yaazhǝgǝla. 8 Ən da ghacig ma Afisa ǝn da pakant kǝ sarta fentikus. 9 Aɗaba wurghwantwurg nǝ uud kǝ ɗuul ba banngang kiyava ɓa tlǝr marauwa, aandzu ba mǝng nǝ tlǝghumah ba ɗyǝka. 10 Akwama sǝghǝvsǝg nǝ timuti da vakaruwa, aa ɓalaɓalǝg nǝ ghǝraana aa gǝdzǝ biya, aɗaba iin ndakwani ɓa tlǝra Yaazhǝgǝl band kaiya. 11 Mbakyarvad kwaha aa nenne bi aandzu ma war biya, am mǝlaruwa dǝ dǝgita kiyava sagau da vakara, aɗaba gyiiyar ba tǝ duula kǝ paka ba iina ǝmtaɗ da zarabaha. 12 Əlbǝga zǝrabamiiyam Afullusa, ghalanghalǝg ma sǝv da vakaru ǝmtaɗ dǝ kyalma zarabaha, haighant bi kǝ dagau ndakwan biya, bamma da tlakǝnatlǝg kǝ sarta lakwti da dagauwa.

13 Ɓadlamvaɓadlǝg ba marawa, am ghacan tǝ fadghǝraruwa ba vaivaiya, am ɓǝlgan kǝ magiya am fǝgab kǝ ndzǝɗa. 14 Baɗǝm nǝ dǝgiti am ɓag nǝ uurama, ɓagamɓag ba dǝ waiyakǝvǝra. 15 Aici, zarabahara, am sǝran taaki uudaha hǝnyaha Istafanus wa fararzhz ba zǝngw kǝ pǝlaghǝr ma haaya Akaya, vǝlardavǝlǝg kǝ ghǝraatǝr kiyava ɓa tlǝr kǝ ya dadda gatǝga. 16 Ən ghalakurama am faara kǝ hulfa kwanahaan kǝ uudaha, ba tsaghwaha ɓa tlǝramnd baɗǝmma kwa kǝm huɓa dlad dǝ iitǝra. 17 Cinganucing kǝmtakera sagauwa Istafanusa, Fartunatus, ard Akaikus, kwa nǝgal vakar mandki kuuram wa sǝgǝvsǝga. 18 Aɗaba ɓagarwiiɓag kǝ dǝgit maraw tǝrvidara, baz dǝgaruwa. Hulfa kwan kǝ uudaha kalkalan ma fǝfteraarana. 19 Araa tagkur uus nǝ dlamakǝlaaa lii gatǝg kwama haaya Asiya. Akila ard Biriskila, ǝmtaɗ dǝ dlamakǝlaaa lii gatǝg kwa dzaharvǝt ma hǝnyahaatǝra, ar tagkur uss ba vaivai ma ɗaaga Yaazhǝgǝla. 20 Baɗǝm nǝ zaraabaha ar tagkur uusa. Tagamartag kǝ uus kǝ kyalmaharuwa ǝmtaɗ dǝ bǝrhuga. 21 Ba kai Bulus dǝ ghǝrar wan viinda tagkur uusa. 22 Baɗǝm nǝ daddakwa maay waiya Yaazhǝgǝl biya tlafatlafana. Aseg, Yaazhǝgǝla! 23 Herǝrra Yaazhǝgǝla Yesu aa ndzandzǝg ǝmtaɗ dǝ kuurama. 24 Aa ndzandzǝg nǝ wayakǝvar tǝghǝr kǝskuuram ma ɗaag Tlǝkatǝg Yesu. Amin.