1 Bulus kwa nal kǝ dlakulva gyiiya Tlǝkatǝg Yesu dǝ naaga Daadamazhigǝla, ard zǝraabamiiyam Timoti, da vak dlamakǝlaaa lii gata Daadmazhǝgǝl ma Korinti, ǝmtaɗ dǝ yaa daddaha gatǝg baɗǝm ma larda Akaya. 2 Herǝrra ard gabǝrǝr vak Daadamazhigǝl Daadamiiyama ard Yaazhǝgǝl Yesu Tlǝkatǝga aa ndzarandzǝg ǝmtaɗ dǝ kuurama.

3 Tagiyamartag kǝ uus kǝ Daadamazhigǝl Daadamiyama, kwa iin Daada Yaazhǝgǝl Yesu Tlǝkatǝga, Daada kwa dadda zhǝwadal ba dyǝk dyǝka, Daadamazhigǝl kwa tagkiyam aandzu hulfa kwar kǝ dzǝgwagha! 4 Takkiyamtag nǝ Daadamazhigǝl kǝ dzǝgwagh ma dlaɗa miiyam baɗǝmma, aɗaba kǝmyam ndakwani kiyam tagtǝr kǝ dzǝgwagh kǝ kyalmaha ma dlaɗi kwar huɓǝg nǝ iitǝra, dǝ kwanǝn kǝ taa dzǝgwagha kwa tlǝyamkǝna nǝ miiyam vak Daadamazhigǝla. 5 Bandkwa kiyam huɓǝg nǝ miiyam kǝ dlaɗa huɓu bandkwah nǝ Tlǝkatǝg dǝ ghǝraana kǝ dlaɗa, kiyam da tlǝkǝna tǝdvad Tlǝkatǝg kǝ taa dzǝgwagha Daadamazhigǝla 6 Aandzu ma kiyam huɓa dlada, kiyam huɓǝg mbakyarvad nal kǝ dǝga taa dzǝgwagh kǝskuurama dlaɓa da fǝkurna kǝ ndzǝd ma ndzǝgana gatǝgaruwa. Akwama tagkiyam dzǝgwagh nǝ uuda, ba kuuram ndakwani tlamkǝnatlǝg kǝ taa dzǝgwaghiina kwam da tlǝkǝna nǝ uuram kǝ ndzǝɗa fa ǝrvǝdmahud dǝ dlaɗa kwa kiyam huɓǝg nǝ miiyamna. 7 Kǝm maay ɓa ndaundau dǝ kuuram aandzu ba hǝdiikǝn biya, aɗaba kǝm sǝrgasǝrǝg taakiya am huɓa dlaɗa band kwa kǝm huɓǝg nǝmnda, kuram ndakwani am da tlǝkǝnatlǝg kǝ hulfa taa dzǝgweaghǝn ɓagakǝmnda nǝ uuda. 8 Kǝm naay taaki am dzan kwal sǝrgasǝrǝg tǝghǝr kǝ hulfa dlaɗǝn huɓamǝndu nǝmnd ma haay Asiya, zaraabahar biya, kwan kǝ dlaɗa dyǝkadyǝk ba vaivaiya mandki kǝm da ǝmtsaaga. 9 Baz tlatlǝgan kǝskǝmnd taaki manki shariya ǝmtsǝg wa tǝkǝmnda nǝ uuda. Dzǝghardzǝg nǝ wana haik fadghǝr kǝskǝmnd tǝ ghramǝnda, bamma kǝm fadghǝr tǝ Daadamazhigǝla, kwa iin wa ciya lii ǝmtsahara ǝmtsahǝga 10 Sakǝmndasǝg nǝ Daadamazhigǝl sagal ma ǝmtsǝga dlaɗa, famdǝghǝrtfǝg taakiya da katkǝmndkatǝga, famdǝghǝrǝt ba tǝ iina mbakyarvad gwiiya katkǝmndǝtta. 11 Mǝlamkǝmndu mǝlǝg dǝ dzǝgwazhigǝla. Tǝdvad kwah war da tagar nǝ uudah ba dyǝka kǝ uus kǝ Daadamazhigǝl mbakyarvad kǝmnda, mbakyarvad bark badyak kwa kǝmnda tlǝkǝna nǝmnda tǝdvad dzǝgwazhigǝla.

12 Dǝgiti fǝkiiyama kǝ tsa kusghǝgha, aɗaba dzamaghǝramiiyam wa tagkiyamtag taakiya ɓagiyamɓag kǝ ndzǝgan ba cuwaɗaɗ ma duniya bad ǝrvǝdmahuɗ palla, kyambar ndzǝgani kwa ndzamda nǝmnd dǝ kuurama. Ən tagan taakiya ndzǝmnda bad jiira hulfa dǝga Daadamazhigǝla, tǝdvad herǝrra Daadamazhigǝla, kwakyarvad dyǝmdyǝmǝr kwan kǝ duni biya. 13 Kǝm viindkur dǝgiti am da karantǝga karantǝg nuurama am nǝghaakana, Bakǝvakwaha nǝghamaka nǝghǝg ǝnkyǝkwahan ndakwana, mandlǝg naiya am da nǝghǝgakanǝghǝg kǝ dǝgitah baɗǝmma, 14 Aɗaba sartǝn da saay nǝ Yaazhǝgǝlamiiyam Yesu, am da tsa kushǝg dǝ kǝmnd, band kwa kǝmnda tsa nǝmnd kǝ kushǝg dǝ kuurama. 15 Mbakyarvad haiyananthaig naiy kwana, iin wa nahan naiy kǝ sagau da vakaru ba zǝngwa, aɗaba am tlǝkǝna kǝ bark shig buwa. 16 Ɓadlanvaɓadlǝg kǝ da vakaruwa akwaman da dagal dama Makidoniya, ǝn da ghacan dlab vakaruwa akwaman da gwiiya saasa, aɗaba ǝn tlaran kǝ dǝgiti am da mǝlgwad nǝ uurama kiyava langan kǝskai dama Yahudiya. 17 Mam zharǝg nǝ uuram tsa na ɓadlava ba kwal dǝ sǝrgasǝrgar ha kǝskuurama? Nii mam zharg nǝ uuram ɓadlava dǝ ndzǝgana hǝnkala uudǝrha , aɗaba ǝn taga taaki,“aana” ǝn gwiiya tagan dlab taaki “ǝndkwah bihi”? 18 Bandkwa maay nǝ ndaudau biya Daadamazhigǝl iin jiira, bandkwah dlab nǝ ǝlbugǝn kǝm tagkur nǝmndna dǝga taaki “Aana” ard “Aˈa biya.” 19 Mbakyarvad Zǝra Daadamazhigǝla Yesu Tlǝkatǝga, wa tagan naiya ard Sila ard Timoti kǝ ǝlbǝg maraw tǝghǝra, dǝga taaki “Aana”ard “Aa” biya, ba kǝlahǝnga ba “Aana”. 20 Aɗaba righant tǝdvad Yesu nǝ Daadamazhigǝl kǝ langyi taa nǝ iin baɗǝmma.Iin wa kiyam tag nǝ miiyam tǝdvad Yesu Tlǝkatǝg taaki “Aandz bandkwaha” kiyava fǝgaara kǝ Daadamazhigǝla. 21 Ba Daadamazhigǝl pal, wa da vǝlkiyam tlǝkǝna shifǝg ma Tlǝkatǝga, baz kǝmnda baz kuurama, ba iin dlaɓ fakiyamafǝga. 22 Fakiyamǝtfǝg kǝ dǝga sǝrgan tǝ kǝmyam kwa da mara taaki kiyam dǝgaana, vǝlakiyamvǝlǝg dlab kǝ gyagyaan shǝkwan ma ǝrvidmahuɗamiiyama mbakyarvad markiyamdadan kǝ dǝgiti da ɓag nǝ iin tǝvuuka. 23 Ba Daadamazhigǝl nǝ shidara, akwama fiid wan tag nai taakiya kwa gwiiya na bi nai dagal dama korinti biya, mbakyarvad aa gwiiya fankuraabi kǝ dlaɗ biya. 24 Kwakyarvad kǝm naa markuura ndzǝɗ tǝghǝr kǝ fadghǝraru biya, maaya, kiyam ɓaa ba tlǝr ǝmtaɗa, kiyava hwaɗag kǝskuurama, mbakyarvad am ghacan bad ndzǝɗ ma fadghǝraruwa.