1 Mbakyarvad kwaha fanɗǝmfǝg ma ghǝrar taaki ǝn madlai da vakaru ǝn badzǝdkurda kǝ ǝrvǝdmahuɗ biya, 2 Aitsa, akwama fankuraafǝg kǝ badzǝga ǝrvǝdmahuɗa, war wada fǝgwa ciinga ǝmtakǝr kǝskai, akwama maay ban daddakwa ǝn fǝgara naiy kǝ badzǝga ǝrvǝdmahuɗ biyi? 3 Kwa viindankura nai kǝ kwah kǝ wakiita, aɗaba iin naiya taakiya akwama danǝvdǝga ǝn tlara kǝ uudahi kwa dlayatǝr kǝ fǝgwa hwaɗaga, ar da badzǝwadan kǝ ǝrvǝdmahuɗ biya. Aɗaba fandǝghǝrtfǝg naiy taakiya, akwama ǝn da hwaɗaga naiya, baɗǝmmaru ndakwani am da hwaɗaga. 4 Viindankura mbakyarvad ǝn ma dlaɗa ard badzǝga ǝrvǝdmahuɗ ba dyǝkdyǝka, baz kǝla yuwa tuug kǝskai ba vaivaiya, kwakyarvad ǝn fǝkura kǝ badzǝga ǝrvǝdmahuɗ biya, aɗaba am sǝran taaki ǝn waikurwaig ba vaivaiya.

5 Akwama ɓagaɓag nǝ uudan kǝ dǝga saa dǝ badzǝga ǝrvǝdmahuɗa, aa ɓaggwi kǝskai pal bi nǝ iini, aa ɓagkura baz kuuram baɗǝmma. Aɗaba ǝn taa kwana naiya kwakyarvad ǝn mbǝkurs biya. 6 Kiiɓa ndaigǝn aa tlǝkǝna nǝ uudanǝn vak dlamakǝlaaa, tlatlan bandkwaha. 7 Ndakwan ciya, ɓǝshamarna_ɓǝshǝga, am farna kǝ ndzǝɗa, haik duugars duug kǝskuuram ma badzǝga ǝrvǝdmahuɗa kwa da juugujǝg kǝ ndzǝɗaana. 8 Mbakyarvad kwaha ǝn ghalakuurama, am marardan taakiya am waigan ba vaivaiya. 9 Na viindkura kwan kǝ wakiita mbakyarvad ǝn fǝsha kuurama, aɗaba ǝn sǝran mbatak am da gatǝgaan kǝ ǝlbǝgi tagankur ba kǝlahǝnga. 10 Baɗǝm daddakwama ɓǝshgarna nǝ uurama, ba kai ndakwani ɓǝshanarnaɓǝshǝga. Dǝgiti na ɓǝshna naiya, akwama ba mǝng nǝ dǝgiti ǝnda ɓǝshgarna naiya, ɓǝshǝnna ɓǝshǝg mbakyarvad kuurama, ma barka Tlǝkatǝga, 11 Haik tlǝkǝnatlǝg nǝ shatanah kǝ duula valla kǝmyama, mbakyarvad kiiyam sǝrgasǝrg kǝ dǝga kǝladǝrahan bat ɓalaɓala.

12 Danal ba nai damma toruwasa da taa ǝlbǝga marawa tǝghǝr kǝ Tlǝkatǝga, wurghuntwurǝg dlaɓ nǝ Yaazhǝgǝl kǝ duula ɓa tlǝr vaakwana, 13 bakǝvakwaha ɓallabi nǝ ghǝrar biya, aɗaba nǝghǝghanabi kǝ zǝraabar Titus vaakwa nǝ iin biya. Tǝhalakwaha kaa duutǝrasduug kǝskai kǝ uudaha, kaa dagal kǝskai damma Makidoniya.

14 Aa tagvartag nǝ uus kǝ Daadamazhigǝla, kwa iin wa ba kǝlahǝng vǝlkiyam zaa fiir tǝdvad Tlǝkatǝga. Ɓa tlǝr dǝ kimyam kiyava langa ǝlbǝg marawa Tlǝkatǝga Aandzu takwara band tǝrshǝn bǝtbǝta kwa pǝsvapǝshǝga. 15 Aɗaba kiyam band tǝrshǝn bǝtbǝt nǝ miiyam kwa vǝlgar nǝ Tlǝkatǝg kǝ Daadamazhigǝla, kwa kwazakwazǝg dama lii katavtǝrǝtkatǝga ard lii tǝ duula ǝmtsǝga. 16 Kiyava lii tǝ duula ǝmtsǝga, bǝtbǝtna vaka ǝmtsǝga, kwa saa dǝ ǝmtsǝga, kiyava lii tlarkǝnatlǝg kǝ katǝga, bǝtbǝtna iin shifǝga kwa saa dǝ shifǝga. Maay daddakwa dzǝgwantdzuug kǝ ɓa kwan kǝ tlǝr biya. 17 Aɗaba kǝmnda kǝm band kyalma uudah biya, kwar taa ǝlbǝg marawa Daadamazhigǝl kiyava tlǝkǝna riibatǝra. Aɗaba aa ɓǝlkǝmdǝt nǝ Daadamazhigǝl kǝskǝmnda, kǝm taa ba jirjir tǝvuukwana, kwakyarvad kǝm lii ɓa tlǝra Tlǝkatǝga.