1 Aitsa, kǝmnda fǝgarzha gwiya dlǝba ghǝramnd ha nǝmnda? Nii kǝm gata wakita shid da vakaruw ha, aandzu ma vakaruwa, band kwa ɓag nǝ kyalmah hi? 2 Abi ba kuuram dǝ ghǝraru nǝ wakiti kwa kǝm dǝvakai nǝmnda, kwa viindava ma ǝrvidmahuɗamǝnda aɗaba nǝghan andzu ba wara dlaɓa karantana. 3 Maramdamarg nǝ uuram taaki am wakita Tlǝkatǝg nǝ uurama, kwa iin nǝ dǝgshǝga tlǝramnda. Kwan kǝ wakita viindava dǝ dǝga viindǝg biya, viindava dǝ shǝdkw cacuwana cacuwana dǝga Daadamazhigǝl kwa dǝ shifǝga. Viindava tǝ fafakǝlama akur biya, viindava ma ǝrvidmahuɗ uudaha. 4 Kǝm taa kwana mbakyarvad kǝm dǝ jiir tǝvuukwa Daadamazhigǝl tǝdvad Tlǝkatǝga. 5 Maay nǝ dǝgiti kwa kǝm da mardamarg taakiya ɓagamnd dǝ sǝrgasǝrgamnd kǝ tlǝriin biya, Sǝrgasǝrgamǝda saal vak Daadamazhigǝla. 6 Iin wa namndal nǝmnd kǝ lii ɓa tlǝra daala langiya kwa viindava tǝdvad adzahadzah biya, viindava tǝdvad shǝdkwa. Adzahadzahǝn kwa viindavana iin wa saa dǝ ǝmtsǝga, shǝdkwa cacuwana iin wa vǝla shifǝga. 7 Viindava viindǝg na adzahadzaha muus tǝ fafakǝlama akura, dlaɓa ndanghǝra Daadamazhigǝla mararmarg ma sarta kwa vǝlavdan nǝ iina. Aaandzu ba dǝgitǝn ndza mbiig tǝ huɗvǝga Muus da zǝlma biya, kaaa mbiig ba caacan huɗvǝgaan ba vaivaiya pelatǝrvapelǝg kǝ zarha Israˈila kǝ vazgaana. Akwama adzahadzahi kwa saa dǝ ǝmtsǝga sǝghǝvsǝg dǝ ndanghǝr ǝndkwana, 8 Aitsa, da ɓaga ndar ka cii nǝ dyakǝra ndanghǝra kwa dǝga ɓaa tlǝra shǝdkwa cacuwana- cacuwan kǝ ndzǝgani? 9 Akwama ba dǝgiti saa dǝ ǝmtsǝga tlakǝnatlǝg kǝ ndanghǝra, ba jirjira dǝgiti saa dǝ tlƙǝkǝna jira Daadamazhigǝla juujig kǝ iin ba dyakdyaka. 10 Ba jirjira, ndanghǝra umghura langiya madlabi dǝ ndanghǝr ndakwan biya, akwama gǝravanagǝrǝg dǝ ndanghǝra daala langiya. 11 Akwama dǝgiti da ghyǝnng nǝ zamanana sǝghǝvsǝg dǝ ndanghǝra, da nǝg ndandar ka cii nǝ dǝgiti kwa da ndzǝg ba tangw dama zǝrazǝri! 12 Mbakyarvad kiiyam mǝng dǝ hulfa kwan kǝ fantaara, iin wa kiyam mǝng dǝ ndzǝd ba vaivaiya. 13 Kiiyam maay nǝ miiyam band Muus biya, kwa hǝdgharduu huɗvǝgan dǝ sǝɗav biya, haik nǝghǝganǝghǝg nǝ uudaha Israilaha kǝ ghyǝnnga ndanghǝr kwa da dagal nǝ zamanana. 14 Aɗaba ghǝratǝra ba dǝkdǝka, tangw dat hiinanna, mǝng nǝ dǝgiti tsǝtǝrva nǝghǝga jiira akwamar karanta umghura langiya. Tǝhavdabi nǝ sǝɗavǝn ba kǝvakwan biya, aɗaba tǝhǝvdabiya, bamma tǝdvad Tlǝkatǝg kalti lakwti tǝhǝvdatǝhǝga. 15 Tangw dat hiinanna, akwamaar karanta kakaɗa muusa, kaa hǝɗtǝrduhǝɗǝg nǝ sǝɗavǝn kǝ ǝrvǝdmahuɗaatǝra. 16 Tǝhvǝdatǝhǝga nǝ sǝɗaviina akwama gwiiyagwiig nǝ uudan da vak Tlǝkatǝga. 17 Aiciiya, Yaazhǝgǝla iin nǝ sǝdkwa cacuwana-cacuwanna. Vakavaki dǝ sǝdkwa Yaazhǝgǝla mǝng nǝ kwaraghǝr vakwahiina. 18 Kǝmyamǝn hǝɗavarduubi nǝ huɗvǝgamiiyamǝn biya, kiiyam mara paraka ndanghǝra Yaazhǝgǝl band akwatǝrama, dlaɓa gwiikiyamant gwiig nǝ uud kiyam nal band Yaazhǝgǝla. Kwan kǝ gwiiya vǝghǝn ɓaga kiiyama nǝ uudǝna fǝgara bad fǝga ma ndanghǝra kwa sal vak Yaazhǝgǝla, kwa iin sǝdkwa caccuwanacaccuwana.