1 ሄሳ ጊሽ ኡባፌ ኮይሮ ሃራ ኣሳስ ሾቤꬃ ዎሳ፥ ጋናቴꬃ ዎሳኔ ጋላታ ዎሳ ኣሳ ኡባስ ካዎታሲኔ ዴሬ ኣይሲዛይታስ ኡባስ ዎሳና ማላ ታ ኔና ቆፊሳይስ። 2 ሄሲካ ቱሙ ኣያና ዱሳኒኔ ጌሻቴꬅ ኡባን ኑኒ ሳሮቴꬃኒኔ ዎጋን ዳና ማላሳ። 3 ሃይሲ ኑና ኣሺዛ ፆሳ ኣቻን ሎዖኔ ኡፋይሲዛዛ። 4 ኢዚ ኣሲ ዉሪ ኣታና ማላኔ ቱማ ኤራና ማላ ኮዬስ። 5 ኢሲ ፆሲ ፃላ ዴስ። ቃሴካ ፆሳሲኔ ኣሳስ ጊዶን ኢሲ ጊጊሲዛ ጋናይ ዴስ። ኢዚካ ኣስ ጊዲዳ ዬሱስ ኪርስቶሳ። 6 ኢዚ ባና ኣሳ ኡባስ ኣꬂ ኢሚዴስ። ሄሲካ ሄራካ ዎዴይ ኣꬎንታ ኢዛስ ማርካቲዴስ። 7 ታካ ሃይሳስ ሚሺራቾ ዮታናስ ኪቴቲዳዴ። ቃሴካ ዴሬታስ ቱሙ ኣማኖ ኣስታማሬ ጊዳዳ ሹሜታዲስ። ሄሳካ ታ ዎርዶቶንታ ቱሙ ዮታናሳ። *2ፂም 1፡11

8 ሄሳ ጊሽ ኣቱማ ኣሳይ ኡባ ሶን ሃንቆይ ባይንዳኔ ፓላማይ ባይንዳ ባ ጌሻ ኩሼታ ፑዴ ꬎቁ ሂስቲዲ ዎሳና ማላ ታ ኮያዪስ። 9 ሄሳꬆካ ማጫሳቲ ቦንቾራ ባና ሺሺ ኤኪዲ ቤሲዛ ማይዖ ማይዔቶ፥ ኣቲን ባ ሁዔ ዳዲ ኤኪዲ ዎይኮ ኣልዖ ማይዖ፥ ዎርቃኔ ኢንቁ ኣꬂዲ ዋልቅ ዋልቅ ጎፔቶ። *1ጴፅ 3፡3 10 ጊዶ ኣቲን ፆሴ ዎሶስ ጊዛ ማጫሳቲ ኢስታስ ኦꬃና ቤሲዛ ሎዖ ኦሶን ሎዔቶ።

11 ማጫሲ ጮዑ ጋዳ ኩሜꬃራ ኣዛዜቴꬅ ታማሩ። 12 ማጫሲ ጮዑ ጋናፔ ኣቲን ኢዛ ታማርሳና ማላ ዎይኮ ኣዴ ቦላ ጎዳታና ማላ ታ ኮዪኬ። 13 ጋሶይካ ኮይሮ ኣዳሜይ ሜꬌቲዴስ፤ ካላዳ ሄዋና ሜꬌታዱስ። *ሜꬌ 2፡7፤ 21-22 14 ቃሴካ ኮይሮ ባሌቲዳይ ኣዳሜ ጊዴና። ባሌታዳ ፆሳ ዎጋፔ ኣꬊዳይ ማጫሳዮ። *ሜꬌ 3፡1-6 15 ጊዲኮካ ማጫሲ ኣማኖኒኔ ሲቆን ጌሻቴꬃን ባርካ ባና ሃሮን ሚኒኮ ና ዬሎን ኣታና።