26
ኣይሁዳቲ ዬሱሳ ዎꬋናስ ማቄቲዳ
(ማር 14፡1-2፤ ሉቃ 22፡1-2፤ ዮሃ 11፡45-53)
1-2 ዬሱሲ ሄሳ ሃሳዪ ዉርሲዳፔ ጉዬ ባና ካሊዛይታስ “ናምዑ ጋላሳፌ ጉዬ ፓዚጋ ጊዲዳይሳ ኤሬቲ? ኣሳ ናይ ካቄታናስ ኣꬊ ኢሜታና” ጊዴስ። *ኬሳ 12፡1-27
3-4 ሄሳፌ ጉዬ ቄሴታ ሃላቃቲኔ ዴሬ ጪማቲ ቃያፋ ጌቴቲዛ ቄሴታ ሃላቃ ጊቤን ሺቂዲ ሂላራ ዬሱሳ ኦይꬂዲ ዎꬊሳናስ ማቄቲዳ። 5 ጊዶ ኣቲን “ኣሳ ጊዶን ኦሺ ዴንዶንታ ማላ ባዓሌ ጋላስ ጊዶፖ” ጊዲ ቃቺዳ።
ዬሱሳ ሺቶ ቲዪዳ ማጫሳዮ
(ማር 14፡3-9፤ ዮሃ 12፡1-8)
6 ዬሱሲ ቢታኒያን ኢንቺራቻ ሃርጌራ ዲዛ ሲሞና ጌቴቲዛዴ ሶን ዲሺን፥ 7 ኢሲ ማጫሲ ዲዛራ ዋጋይ ኬሂ ኣልዖ ጊዲዳ ኣልባስፂሮሴ ጌቴቲዛ ሺቶ ቢልቃፄ ኩሜꬅ ኦይካዳ ዬሱሳኮ ሺቃዳ ኢዚ ማዳን ኡቲዲሺን ኢዛ ሁዔ ቦላ ሺቶዛ ጉሳዱስ። *ኣልባስፂሮሴ ቦንቾ ሚሽ ኢዛፔ ኦሴቲዛ ቦꬃ ኣልዖ ሹቻ። *ሉቃ 7፡37-38 8 ኢዛ ካሊዛይቲ “ሄሳ ቤዪዲ ሃይሲ ኣዛስ ሜላ ሞሬቲዜ? 9 ሺቶዚ ዳሮ ዋጋስ ባይዜቲዲ ሚሻይ ማንቆታስ ኢሜቲዛኮቺ?” ጊዳ።
10 ዬሱሲ ሄሳ ኤሪዲ “ሃኖ ማጫሳዮ ኣዛስ ዋይሴቲ? ኢዛ ታስ ሎዖ ኦꬃዱስ። 11 ማንቆቲ ኡባ ዎዴ ኢንቴናራ ዴቴስ፤ ታ ጊዲኮ ኡባ ዎዴ ኢንቴናራ ዲኬ ጊዴስ። *ዛሬ 15፡11 12 ኢዛ ሺቶዛ ታ ቦላ ጉሲዳይሲ ታና ሞጎስ ጊጊሳናሳ። 13 ታ ኢንቴስ ቱሙ ጋይስ፤ ሃይሲ ሚሺራቾ ቃላይ ሳባኬቲዛ ኣላሜ ዩሾን ኣዋንካ ኢዛ ኦꬂዳይሲ ኢዞ ቆፊሲዛዝ ጊዲዲ ሃሳዬታና” ጊዴስ።
ዩሁዳይ ዬሱሳ ኣꬂ ኢማናስ ጊጌቲዴስ
(ማር 14፡10-11፤ ሉቃ 22፡3-6)
14 ሄሳፌ ጉዬ ታማኔ ናምዓታፔ ኢሶይ ኣስቆሮንቶ ዩሁዳ ጌቴቲዛይሲ ቄሴታ ሃላቃታኮ ቢዲ፥ 15 “ታ ኢንቴስ ኢዛ ኣꬃ ኢሚኮ ኢንቴ ታስ ኣይ ኢማኔ?” ጊዴስ። ኢስቲካ ኢዛስ ሄꬑ ታሙ ቢራ ኢዛ ኩሼን ታዪቢ ኢሚዳ። *ዛካ 11፡12 16 ሄ ጋላሳፌ ሲሚዲ ዩሁዳይ ዬሱሳ ኢስታስ ኣꬂ ኢማናስ ኢንጄ ዎዴ ናጊሼ ጋምዒዴስ።
ጎዳ ካዎ
(ማር 14፡12-21፤ ሉቃ 22፡7-13፤ ዮሃ 13፡21-30)
17 ኡኬꬃ ባዓሌ ጌቴቲዛ ባዓሌ ጋላስ ኢዛ ካሊዛይቲ ዬሱሳኮ ሺቂዲ “ኔ ፓዚጋ ማናሶ ኣዋን ጊጊሳና ማላ ኮያይ?” ጊዳ።
18 ኢዚካ ኢስታስ ዛሪዲ ጌዴ ካታማ ቢዲ ኤቤሎ ጌቴቲዛ ኣስ “ኣስታማሬይ ‘ታ ዎዴይ ማቲዳ ጊሽ ታና ካሊዛይታራ ፓዚጋ ታ ኔ ኬꬃን ቦንቻና ጊዴስ’ ጊዲ ዮቲቴ” ጊዴስ። 19 ኢዛ ካሊዛይቲካ ዬሱሲ ኢስታ ኣዛዚዳ ማላ ፓዚጋ ካዎ ጊጊሲዳ።
20 ጋዴይ ኦማርሲሺን ዬሱሲ ታማኔ ናምዓታራ ማዳን ኡቲዴስ። 21 ኢስቲ ሙሳን ዲሺን ኢዚ ኢስታስ “ታ ቱሙ ጋይስ፤ ኢንቴፌ ኢሶይ ኣꬂ ኢማና” ጊዴስ።
22 ኢስቲካ ኬሂ ሙዞቲዲ ታራን ታራን “ጎዶ ታኔሻ?” ጊዳ። 23 ኢዚካ ዛሪዲ “ታና ኣꬂ ኢማናዴይ ኬሬን ታናራ ኩሼ ዬዲዛዴ። *ማዛ 41፡9 24 ኢዛ ጊሽ ካሴ ፃፌቲዳይሳ ማላ ኣሳ ናይ ባና፤ ጊዶ ኣቲን ኣሳ ና ኣꬂ ኢሚዛዴስ ኣዬ-ኣና! ሄሳዴይ ዬሌቶንታ ኣቲዳኮ ኢዛስ ሎዖኮሺን” ጊዴስ። 25 ኢዛ ኣꬂ ኢማና ዩሁዳይ “ኣስታማሬ! ታኔሻ?” ጊዴስ። ኢዚካ “ኤ፥ ኔ ጊዳ ማላ” ጊዴስ።
26 ኢስቲ ሙሳን ዲሺን ዬሱሲ ሚዛ ቁማፔ ኤኪዲ ኣንጂዴስ። ሜንꬂዲኔ ባና ካሊዛይታስ ኢሚዲ “ሄዪቴ ሚቴ፤ ሃይሲ ታ ኣሾኮ” ጊዴስ። 27 ቃሴካ ኡሻ ዴንꬂዲ ጋላቲዲኔ ባና ካሊዛይታስ ኢሚዲ “ዉሪካ ሃይሳፌ ኡዪቴ፤ 28 ዳሮ ኣሳ ናጋራፔ ማራና ጉኪዛ ታ ኦራꬃ ጫቆ ሱꬃይ ሃይሳ። *ኬሳ 24፡8፤ ኤር 31፡31-34 29 ታ ኢንቴስ ጊዛይ ታ ኣዋ ካዎቴꬃን ታ ኢንቴናራ ኦራꬃ ዎይኔን ኡሻዛ ኡያና ጋካናስ ሃይሳፌ ሲንꬃን ሃይሳ ዎይኔ ኡሻ ኢንቴናራ ኡዪኬ” ጊዴስ።
30 ማዛሙሬ ዬፂዳፔ ጉዬ ፑዴ ዳብራዛይቴ ጌቴቲዛ ዙማ ቦላ ኬዚዳ።
ጴፅሮሲ ኢዛ ካዳናይሳ ዬሱሲ ካሴቲዲ ዮቲዴስ
(ማር 14፡27-31፤ ሉቃ 22፡31-34፤ ዮሃ 13፡36-38)
31 ዬሱሲ ኢስታስ “ኢንቴ ዉሪ ሃቺ ኦማርሲ ታናን ꬉጴቲዲ ታና ዬጊ ባና፤ ‘ሄሚዛይሳ ታ ሾጫና፤ ሜሄቲኔ ላሌታና’ ጌቴቲዲ ካሴ ፃፌቲዴስ። *ዛካ 13፡7 32 ጊዶ ኣቲን ታኒ ዴንዲዳፔ ጉዬ ኢንቴፌ ሲንꬃታዳ ጌዴ ጋሊላ ባና” ጊዴስ። *ማቶ 28፡16
33 ጴፅሮሲ ዛሪዲ “ሃንኮይቲ ዉሪ ኔ ጌዶን ꬉጴቲኮካ ታኒ ሙሌካ ꬉጴቲኬ!” ጊዴስ። 34 ዬሱሲካ ኢዛስ ዛሪዲ “ቱሙ ጋይስ፤ ሃቺ ቃማ ኩቶይ ዋሶንታ ካሴታዳ ሄꬑቶ ኔ ታና ካዳና” ጊዴስ። 35 ጴፅሮሲ ቃሴ “ኔናራ ታ ሃይቃና ኮሺኮካ ሙሌካ ታ ኔና ካዲኬ!” ጊዴስ። ዬሱሳ ካሊዛ ሃንኮይቲካ ኩሜꬅ ኢዛይሳꬆካ ጊዳ።
ጌቴሴማኔን ዬሱሳ ዎሳ
(ማር 14፡32-42፤ ሉቃ 22፡39-46)
36 ሄሳፌ ጉዬ ዬሱሲ ባና ካሊዛይታራ ጌዴ ጌቴሴማኔ ጌቴቲዛሶ ቢዴስ። ኢስታካ “ሄ ባዳ ታ ዎሲሺን ኢንቴ ሃይሳን ኡቲሺቴ” ጊዴስ። 37 ጴፅሮሳራ ዛቢዶሳ ናይታ ናምዓታ ባናራ ኤኪ ቢዲ ሙዞቴꬂኔ ዳሮ ቆፎ ኦይኪዴስ። 38 ሄሳፌካ “ታ ሼምፖያ ሃይቃና ጋካናስ ዳሮ ሙዞታዱስ፤ ታናራ ሚኒዲ ሃኒን ታኪቴ” ጊዴስ።
39 ኢስታፌ ጉꬅ ጌዴ ሃኪ ቢ ጉፓንዲ “ታ ኣዋዉ! ኔስ ዳንዳዬቲኮ ሃይሲ ሜቶይ ታፔ ኣꬎ፤ ጊዶ ኣቲን ታኒ ኮይዳ ማላ ጊዶንታ ኔኒ ኮይዳ ማላ ሃኖ” ጊ ዎሲዴስ። 40 ሄሳፌ ሲሚዲ ባና ካሊዛይታኮ ዪዲ ኢስቲ ꬊስኪሺን ዴሚዴስ። ጴፅሮሳካ “ሃይቶ ኣሳቶ! ኢንቴ ታናራ ኢሲ ሳቴኮኔ ሚናናስ ፆኒዴ? 41 ፓጬን ኢንቴ ጌሎንታ ማላ ሚኒዲ ዎሲቴ፤ ኣያናይ ጊጌቲዴስ ሺን ኣሾይ ጊዲኮ ዳቡራንቻ” ጊዴስ።
42 ቃሴካ ናምዓንꬆ ቢዲ “ታ ኣዋዉ! ሃይሳ ኡያናሲ ታስ ኣቶንታ ሚሽ ጊዲኮ ኔ ሼኔይ ፖሌቶ” ጊዲ ዎሲዴስ። 43 ቃሴካ ኢዚ ዪሺን ኢስታ ኣይፌን ꬊስኮይ ዴፂዳ ጊሽ ኢቺዳይታ ቤዪዴስ። 44 ኢስታ ኣጊዲ ቃሴካ ቢዲ ሄꬓንꬆ ካሴ ዎሲዳ ቃላ ዛሪ ዎሲዴስ።
45 ሄሳፌ ባና ካሊዛይታኮ ሲሚዲ “ሃዒካ ሼምፒዲ ꬊስኪዴቲ? ሄኮ ሃዒ ሳቴይ ማቲዴስ፤ ኣሳ ናይ ናጋራንቻታ ኩሼን ኣꬊ ኢሜታና። 46 ዴንዲቴ ኣኔ ቦስ! ታና ኣꬂ ኢሚዛዴይ ዩሳ ቦላ ዴስ” ጊዴስ።
ዬሱሲ ኦይኬቲዴስ
(ማር 14፡43-50፤ ሉቃ 22፡47-53፤ ዮሃ 18፡3-12)
47 ኢዚ ሃሳዪሺን ታማኔ ናምዓታፔ ኢሶይ ዩሁዳይ ዪዴስ። ቄሴታ ሃላቃቲኔ ዴሬ ጪማቲ ዬዲዳ ዳሮ ኣሳይ ቶራኔ ዱርቃ ኦይኪዲ ዩሁዳራ ኢሲፌ ዴስ። 48 ዩሁዳይካ “ታ ዬሪዛዴይ ኢዛ ጊዲዳ ጊሽ ኦይኪቴ” ጊዲ ካሴ ዮቲ ዎꬂዴስ።
49 ሲቲ ጊ ዬሱሳኮ ቢዲ “ኣስታማሬ! ሳሮ” ጊሼ ዬሱሳ ዬሪዴስ። 50 ዬሱሲካ “ታ ላጌ! ኔ ዪዳ ቆፋ ፖላ” ጊዴስ። ሄራካ ኣሳይ ሺቄቲዲ ዬሱሳ ኦይኪዲ ቃቺዴስ። 51 ዬሱሳራ ዲዛይታፔ ኢሶይ ጊꬃ ማሻ ሾዲዲ ቄሴታ ሃላቃዛ ኣሽካራ ሃይꬅ ቃንፂዴስ።
52 ዬሱሲካ “ኣኔ ኔ ማሻ ኮሆን ዛራ ጌልꬃ፤ ማሻ ሾዲዛይቲ ማሻን ꬋያና። 53 ኮሺኮ ታኒ ታ ኣዋ ኦይቺዛኮ ዳሮ ሺዬን ቆዴቲዛ ኦሊዛ ኪታንቻ ታስ ዬዶንታ ኣጋና ሚሳቲዜ? 54 ሄሳꬆ ኦꬂኮ ቃሴ ጌሻ ማፃፋታን ሃናና ጌቴቲዳይሲ ዋኒ ፖሌታኔ?” ጊዴስ።
55 ሄ ዎዴ ዬሱሲ ኣሳ “ፓንጋ ኦይኪዛ ኣሳꬆ ማሻኔ ዱርቃ ኤኪዲ ታና ኦይካና ዪዴቲ? ዎንቲን ዎንቲን ፆሳ ኬꬃን ኡታዳ ታ ታማርሲሺን ካሴ ኦይኪቤኬታ ሺን። *ሉቃ 19፡47፤ 21፡37 56 ጊዶ ኣቲን ሃይሲ ዉሪካ ሃኒዳይሲ ካሴ ናቤቲ ጌሻ ማፃፋታን ዮቲዳይሲ ፖሌታናሳ” ጊዴስ። ሄ ዎዴ ዬሱሳ ካሊዛይቲ ኢዛ ዬጊዲ ꬋዪዳ።
ዬሱሲ ፒርዳ ዱላታ ሲንꬅ ኣꬊዴስ
(ማር 14፡53-65፤ ሉቃ 22፡54-55፥63-71፤ ዮሃ 18፡13-14፥19-24)
57 ሄ ዎዴ ዬሱሳ ኦይኪዲ ኣሳቲ ሙሴ ዎጋ ኣስታማሬቲኔ ዴሬ ጪማቲ ኢሲፌ ሺቂዳሶን ቄሴታ ሃላቃ ቃያፋኮ ኤፊዳ። 58 ጊዶ ኣቲን ጴፅሮሲ ቄሴታ ሃላቃ ጊቤ ጋካናስ ሃሆራ ዬሱሳ ካሊዴስ። ጊቤ ጊዶ ጌሊዲ ሃኒዛይሳ ዉርሴꬅ ቤያናስ፥ ጊቤ ናጊዛይታራ ኡቲዴስ።
59 ሄ ዎዴ ቄሴታ ሃላቃቲኔ ኣይሁዳታ ዱላታይ ኩሜꬅ ዬሱሳ ዎꬊሳናስ ዎርዶ ማርካ ኮዪዴስ። 60-61 ዎርዶ ማርካቲ ዳሮቲ ሺቂኮካ ቤሲዛ ማርካቴꬅ ዴሚቤቴና፤ ጊዶ ኣቲን ጉዬፔ ናምዑ ኣስ ዳይቲ ሺቂዲ “ሃይሲ ኣዴዚ ‘ታ ፆሳ ኬꬃ ላላዳ ሄꬑ ጋላሳራ ዛራዳ ኬፃና ዳንዳያይስ’ ጊዴስ” ጊዲ ማርካቲዳ። *ዮሃ 2፡19
62 ሄሳ ሲዪዳ ቄሴታ ሃላቃይ ኡቴꬃፌ ዴንዲ ኤቂዲ “ሃይቲ ኣሳቲ ኔ ቦላ ማርካቲዛይሳስ ኣይኮካ ዛሪኪ?” ጊዴስ። 63 ዬሱሲካ ጮዑ ጊዴስ። ቄሴታ ሃላቃይ “ታ ኔና ዴዖ ፆሳ ሱንꬃን ኦይቻይስ! ኔኒ ኪርስቶሳ፥ ፆሳ ና ጊዲኮ ታስ ዮታ!” ጊዴስ።
64 ዬሱሲካ “ኔ ጎይሳካ ማላ፤ ጊዶ ኣቲን ኢንቴስ ኡባስ ታ ዮቲዛይ ሲንꬃፌ ኣሳ ናይ ዎልቃማዛ ኡሻቻን ኡቲዲ ሳሎ ሻራራ ዪዛ ዎዴ ኢንቴ ቤያና” ጊዴስ። *ዳኔ 7፡13
65 ሄ ዎዴ ቄሴታ ሃላቃይ ባ ማይዖ ዳኪዲ “ፆሳ ቦላ ጫሻ ቃላ ሃሳዪዴስ፤ ኑስ ሃይሳፌ ኣꬊዛ ሃራ ኣዛ ማርካ ኮሺዜ! ፆሳ ቦላ ጫሻ ቃላ ኢዚ ሃሳዪሺን ኢንቴ ኢንቴ ሃይꬃራ ሲዪዴታ። 66 ኢንቴስ ኣይ ሚሳቲዜ?” ጊዴስ። ኢስቲካ ዛሪዲ ኢዛስ “ሃይቆይ ቤሴስ” ጊዳ።
67 ሄ ዎዴ ዬሱሳ ኣይፌሶን ጩቲሼ ኢጪዳ፤ ባጋይቲ ባቂሼ፥ 68 “ኪርስቶሳ! ኔ ኔና ናቤ ጋሳሺን ኔና ባቂዳይ ኦናኮኔ ኣኔ ኑስ ዮታ” ጊዳ።
ጴፅሮሲ ዬሱሳ ካዲዴስ
(ማር 14፡66-72፤ ሉቃ 22፡56-62፤ ዮሃ 18፡15-18፥25-27)
69 ሄሳፌ ጉዬ ጴፅሮሲ ቄሴታ ሃላቃ ጊቤን ኡቲ ዲሺን ኢሲ ኬꬃ ጊዶን ኦꬂዛ ማጫስ ዲዛራ ኢዛኮ ሺቃዳ “ኔኒካ ጋሊላ ዬሱሳራ ዲዛዴ!” ጋዱስ።
70 ኢዚ ቃሴ “ኔ ኣይ ጊዛኮኔ ታ ኤሪኬ!” ጊዲ ኡባ ኣሳ ሲንꬃን ካዲዴስ። 71 ጊቤዛፔ ኬዚዛ ፔንጌ ኢዚ ቢሺን ኢሲ ሃራ ኦሳንቻያ ኢዛ ፄላዳ ሄን ጋዳን ዲዛይታስ “ሃይሲ ኣዴዚ ናዚሬቴ ዬሱሳራ ዲዛዴኮ!” ጋዱስ።
72 ኢዚካ “ታ ኢዛ ኤሪኬ!” ጊዲ ናምዓንꬆ ካዲዴስ። 73 ጉꬅ ጋምዒሺን ሄን ኤቂዳ ኣሳቲ ሺቂዲ ጴፅሮሳ “ኔ ሃሳያይ ኔ ሃይታራ ዲዛይሳ ቆንጪሴስ፤ ቱማፔ ኔ ኢስታ ባጋ ኣሳ” ጊዳ። 74 ኢዚካ ጫቂሼኔ ኣማቲሼ ሄሳ ኣዴዛ “ታ ኤሪኬ!” ጊዴስ። ሄራካ ኩቶይ ዋሲዴስ።
75 ሄሳ ዎዴ ዬሱሲ ካሴ ጴፅሮሳስ “ኩቶይ ዋሳናስ ኔ ታና ሄꬑቶ ካዳና” ጊዲ ዮቲዳ ቃላይ ቆፌቲን፥ ጴፅሮሲ ካሬ ኬዚዲ ጫሞ ዬሆ ዬኪዴስ።