3
ሳርዴሴ ዎሳ ኬꬃ
ሳርዴሴ ዎሳ ኬꬃ ኪታንቻስ፥ “ሃይሲ ፆሳ ኣያና ላፑናታፔኔ ፆሊንቴታ ኦይኪዳዴፌ ዮቴቲዳዛ። ታ ኔ ኦሶ ኤራይስ። ኔኒ ሱንꬃን ፓፃ ዳሳ ሺን ቃስ ሃይቃዳሳ። ቤጋ! ሃይቃና ማቲዳይሳኔ ኔስ ዉራሼ ጉꬅ ኣቲዳ ዎልቃዮ ዛራ ሚንꬃ። ታኒ ታ ጎዳ ሲንꬃን ኔ ኦሶይ ኩሜꬅ ጊዲን ቤያቤኬ። ሄሳ ጊሽ ኔኒ ኣይ ማላ ቲሚርቴ ኤኪዳኮኔ ኔ ሲዮይሳ ዩሻ ቆፓኔ ናጋ። ማሮቴꬃንካ ጌላ፤ ኔኒ ቤጎንታ ኣጊኮ ቃስ ታ ካይሶ ማላ ኔ ቆፖንታ ፑቱ ጋና። ታ ኣይ ሳቴን ኔኮ ያናኮኔ ኔ ኤራካ። * ማቶ 24፡43-44፤ ሉቃ 12፡39-40፤ ኣጁ 16፡15 ጊዶ ኣቲን ባ ማይዖ ቱኒሶንታይቲ ሳርዴሴን ጉꬃ ኣሳቲ ኔናራ ዴቴስ። ሄይቲ ቦꬃ ማይዖ ማይዓናይሲ ኢስታስ ቤሲዛ ጊሽ ኢስቲ ቦꬃ ማይዖ ማይዒዲ ታናራ ባና። ፆኒዳዴይ ኢስታꬆካ ቦꬃ ማይዖ ማይዓና። ኢዛዴ ሱንꬅ ታኒ ታ ኣዋ ሲንꬃኒኔ ኪታንቻታ ሲንꬃን ኤሪሳና። ዴዖን ዲዛይታ ሱንꬂ ፃፌቲዳ ዴዖ ማዝጋባፔ ቁጪኬ። * ኬሳ 32፡32-33፤ ማዛ 69፡28፤ ኣጁ 20፡12፤ ማቶ 10፡32፤ ሉቃ 12፡8
“ኣያናይ ዎሳ ኬꬃታስ ጊዛይሳ ሃይꬂ ዲዛዴይ ሲዮ!
ፊላዴልፊያ ዎሳ ኬꬃ
ፊላዴልፊያ ዎሳ ኬꬃ ኪታንቻስ “ሃይሲ ጌሺኔ ቱማንቻ ጊዲዳይሳፌ ዳዉቴ ኬꬃ ቁልፔ ኦይኪዳይሳፌ ዮቴቲዳይሳ። ኢዚ ዶዪዳይሳ ኦኒካ ጎርዴና። ኢዚ ጎርዲዳዝ ኦኒካ ዶዬና። * ኢሳ 22፡22፤ ኢዮ 12፡14 ታኒ ኔ ኦሶ ኤራይስ፤ ሄኮ ኦኒካ ጎርዳናስ ዳንዳዮንታ ዶያ ፔንጌ ኔ ሲንꬃን ዎꬃዲስ፤ ኔ ዎልቃይ ጉꬅ ጊዲዳይሳ ታ ኤራይስ፤ ጊዲኮካ ኔ ታ ቃላ ናጋዳሳ፤ ታ ሱንꬃካ ኔ ካዳቤይካ። ሄሳ ጊሽ ባስ ኣይሁዳ ጊዶንታ ዲሼ ባና ኣይሁዳ ጊዛይቲ ሄይቲ ፃላዔ ማባራፔ ጊዲዳ ዎርዶቲ ዪዲ ኔ ቶሆ ቦላ ኩንዳና ማላ ታ ኦꬃና። ታኒ ኔና ሲቂዳይሳ ኢስቲ ኤራና ማላ ታ ኦꬃና። 10 ኔኒ ዳንዳዪዛዴ ጊዳ ጋዳ ታ ኔስ ዮቶ ቃላ ኔ ናጊዳ ጊሽ ታካ ቡሮ ቢታ ቦላ ዲዛ ኣሳ ፓጫናስ ኩሜꬃ ኣላሜ ቦላ ያና ዋዬዛ ጋላሳፌ ታ ኔና ናጋና። 11 ሄኮ ታ ኤሶን ያና። ኔ ኣክሊሌ ኦኒካ ኤኮንታ ማላ ኔስ ዲዛዝ ሎዔꬃ ኦይካ። 12 ፆኒዳዴ ታኒ ታ ጎዳ ፆሳ ኬꬃን ቱስ ኦꬃና። ኢዚ ሄፔ ሙሌካ ኬዜና። ታ ጎዳ ሱንꬂኔ ታ ጎዳ ካታማዛ ሱንꬂካ ታ ኢዛ ቦላ ፃፋና። ሃና ካታማያ ሳሎፔ ታ ጎዳ ኣቻፌ ዎꬋና ኦራꬃ ዬሩሳላሜ። ታካ ታ ኦራꬃ ሱንꬃ ሄ ኢዛዴ ቦላ ፃፋና። * ኣጁ 21፡2፤ ኢሳ 62፡2፤ 65፡15
13 ኣያናይ ዎሳ ኬꬃታስ ዮቲዛይሳ ሃይꬅ ዲዛዴይ ሲዮ!
ሎዶቂያ ዎሳ ኬꬃ
14 “ሎዶቂያ ዎሳ ኬꬃ ኪታንቻስ ‘ሃይሲ ኣሚን’ ጊዳይሳፌ ቱሙ ኣማኔቲዳ ማርካ ጊዲዳዴፌ ፆሳ ሜꬌቴꬂ ዉሪ ኢዛፔ ቤቲዳዴፌ ዮቴቲዳዛ። * ሌም 8፡22 15 ታኒ ኔ ኦሶ ኤራይስ። ኔኒ ኢርፃ ዎይኮ ሚሻ ጊዳካ። ኔኒ ኢርፃ ዎይኮ ሚሻ ጊዲዳኮ ሎዖኮሺን። 16 ኢርፃ ዎይኮ ሚሻ ጊዶንታ ኔ ጮ ዶንቦላ ጊዲዳ ጊሽ ታ ኔና ታ ዱናፔ ኬሳ ጩታና ጋይስ። 17 ‘ታ ዱሬኮ፤ ታስ ዳሮ ሃሮይ ዴስ፤ ታስ ኣይኮይካ ፓጪቤና’ ጋሳ ሺን ኔ ቃስ ጊልቃ፤ ኣይኮይ ባይንዳ ሂዬሳ፥ ማንቆ፥ ቆቄኔ ኔ ካሎ ዲዛዴ ጊዲዳይሳ ኤራቤካ። 18 ኔ ዱሬ ጊዳና ኮይኮ ታፔ ታማን ፓጬቲዳ ዎርቃ ሻማና ማላ ኔኒ ኔ ካሎቴꬃ ዬላቴꬃ ካማናስ ቦꬃ ማይዖ ማይዓና ማላኔ ፄላናስካ ዳንዳያና ማላ ኣይፌ ꬋሌ ሻማዳ ኔ ቲዬታና ማላ ታ ኔና ዞራይስ። 19 ታኒ ታ ዶሲዛይታ ዉርሳ ሃንቃይሲኔ ቃፃያይስ፤ ሄሳ ጊሽ ኔኒ ሚና፤ ማሮቴꬃንካ ጌላ። * ሌም 3፡12፤ ኢብ 12፡6 20 ሄኮ! ታኒ ፔንጌን ኤቃዳ ፄይጋይስ፤ ኦኒካ ታ ቃላ ሲይዲ ባ ፔንጌዛ ታስ ዶዪኮ ታ ኢዛኮ ጌላዳ ኢዛዴራ ማና። ኢዛዴይካ ታናራ ማና። 21 ታኒ ፆናዳ ታ ኣዋራ ኢዛ ኣልጋን ኡቲዳይሳꬆ ፆኒዳዴይ ታናራ ኢሲፌ ታ ኣልጋ ቦላ ታ ኡቲሳና።
22 “ኣያናይ ዎሳ ኬꬃታስ ጊዛይሳ ሃይꬅ ዲዛይ ሲዮ!” ጋ ፃፋ ጊዴስ።

*3:3 ማቶ 24፡43-44፤ ሉቃ 12፡39-40፤ ኣጁ 16፡15

*3:5 ኬሳ 32፡32-33፤ ማዛ 69፡28፤ ኣጁ 20፡12፤ ማቶ 10፡32፤ ሉቃ 12፡8

*3:7 ኢሳ 22፡22፤ ኢዮ 12፡14

*3:12 ኣጁ 21፡2፤ ኢሳ 62፡2፤ 65፡15

*3:14 ሌም 8፡22

*3:19 ሌም 3፡12፤ ኢብ 12፡6