17
ናታኔ ባጋራ ጾሲ ዳዊቴስ ዮቲዳ ቃላ
(2ሳሜ 7፡1-17)
1 ዳዊቲ ባ ካዎቴꬃ ኬꬃን ዴኢሼ፥ ናቤ ናታኔስ፥ «ታኒ ዚጋፔ ኬጼቲዳ ኬꬃን ዴኣይስ፤ ጊዶ ኣቲን ጾሳ ጫቆ ቃላ ታቦታይ ጊዲኮ ዱንካኔ ጊዶን ዴስ» ጊዴስ።
2 ናታኔይ ቃሴ ዳዊቴስ፥ «ኦꬃናስ ኔ ዎዚናን ኔ ቆፒዳይሳ ኡባ ኦꬃ፤ ጾሲ ኔናራ ዴስ» ጊዴስ።
3 ጊዶ ኣቲን ሄ ጋላሳ ኦማርስ ጾሳ ቃላይ ናታኔኮ ዪዲ፥ 4 «ባ፤ ባዳ ታ ኣይሌ ዳዊቴስ ጎዳይ ኔስ ጊዛይሲ ታ ኢዛን ዴኣና ኬꬅ ኬጻናይ ኔና ጊዳካ። 5 ታኒ ኢስራኤሌታ ጊብጼፔ ኬሲዳ ጋላሳፌ ዶማዳ ሃች ጋካናስ፥ ዱንካናፔ ዱንካኔን፥ ቃሴ ኢሲ ሶሆፔ ሃራ ሶሆ ዩያዳ ዴኣይስ ኣቲን ኬꬃን ዴኣቤኬ። 6 ታኒ ኢስራኤሌ ኣሳ ኡባራ ዩዪዳ ሶሆ ኡባን ታ ዴራ ሄማናስ ታኒ ኣዛዚዳ ኢስራኤሌ ዳናታፔ ኦናስካ፥ ‹ታስ ዚጋ ሚꬃፌ ኬꬅ ኣይስ ኬጺቤኬቲ?› ጋዳ ኦይቺዳ ዎዴይ ዲዜ?
7 «ሄሳ ጊሻስ ሃኢካ ኔኒ ታ ኣይሌ ዳዊቴስ፥ ኡባፌ ዎልቃማ ጾሲ ኔና፥ ‹ታ ዴራ ኢስራኤሌ ኣይሳና ማላ ኔኒ ዶርሳ ሄሚዛሶሆፔ ታ ኔና ዴንꬃ ኤካዲስ። 8 ኔኒ ቢዳ ሶሆ ኡባን ታኒ ኔናራ ኢሲፌ ጊዳዲስ፤ ኔ ሞርኬታ ኡባ ኔ ሲንꬃፌ ዲጋዲስ፤ ሃኢካ ታኒ ሃ ሳኣን ኤሬቲዳ ጊታ ኣሳታ ሱንꬃ ማላ ኔ ሱንꬃ ጊታሳና። 9 ታኒ ታ ኣሳ ኢስራኤሌስ ዳናሶሆ ኢማና፤ ኢስታስ ዱሳሶሆ ኢሚዳፔ ጉዬ ኢስቲ ቃጾንታ ማላ ታ ኦꬃና፤ ኢታ ኣሳቲ ካሴ ኢስታ ኡንኤꬂዳይሳꬆ ሃይሳፌ ጉዬ ኢስታ ኡንኤꬄቴና። 10 ሃይሳፌ ካሴ ታ ዴራ ኢስራኤሌ ካሌꬂዛይታ ታ ሱንꬂዳ ዎዴ ካሴ ኢታቲ ኡንኤꬂዳይሳꬆ ሃይሳፌ ጉዬ ኡንኤꬄቴና፤ ኢንቴ ሞርኬታ ኡባ ታ ካዉሻና፤ ታኒ ጾሳይ ኔስ ኬꬅ ኬጻናይሳ ዮታይስ። 11 ኔ ጪማዳ ካሴ ሃይቂዳ ኔ ኣዋታን ጋይቲዛ ዎዴ ታኒ ኔ ናይታፔ ኢሳ ዴንꬃዳ ኔ ሶሆን ካዎꬃና፤ ኢዛ ካዎቴꬃካ ታ ሚንꬃና። 12 ታስ ኬꬅ ኬጻናይ ኢዛ፤ ታኒ ኢዛ ካዎቴꬃ ኣራታ ሜርናስ ሚንꬃ ኤሳና። 13 ታኒ ኢዛስ ኣዋ ጊዳና፤ ኢዚካ ታስ ና ጊዳና፤ ኔፔ ካሴ ካዎቲዳ ሳኦሌፔ ታኒ ታ ማሮቴꬃ ዴንꬂዳ ማላ ኢዛፔ ሙሌካ ዴንꬂኬ።2ቆሮ 6፡18፤ ኢብ 1፡5 14 ታኒ ኢዛ ታ ኣሳ ቦላኔ ታ ካዎቴꬃ ቦላ ሜርናስ ሱንꬃና፤ ኢዛ ካዎቴꬃ ኣራታይካ ሜርናስ ሚኒ ኤቃና› ጋዳ ዮታ» ጊዴስ።
15 ናታኔይ ጾሳይ ኢዛስ ኣጁታን ቆንጪሲዳ ቃላ ኡባ ዳዊቴስ ዮቲዴስ።
ዳዊቴ ዎሳ
(2ሳሜ 7፡18-29)
16 ሄሳፌ ጉዬ ካዎ ዳዊቲ ዱንካኔን ጌሊዲ ጎዳ ሲንꬃን ኡቲዴስ፤ ሂስቲዲ፥ «ኣቤት ጎዳዉ፥ ጾሳዉ! ኔኒ ሃይሳ ኡባ ታስ ኦꬃናስ ታኒ ኦኔ? ታሶ ኣሳይካ ኣዜ? 17 ኣቤት ጾሳዉ! ሃይሲ ኔ ኣይፌ ሲንꬃን ጉꬃ ሚሳቲን ኔ ኣይሌ ዛሬቲ ሲንꬃፌ ያና ላይꬃታን ሃናናይሳ ዮታዳሳ፤ ኔኒ ታና ጊታ ኣሳታፔ ꬎቁ ሂስታ ጼላዳሳ። 18 ኔኒ ታና ኔ ኣይሌዛ ቦንቺዳ ጊሻስ ታኒ ዳዊቲ ሃይሳፌ ቦላራ ኣይ ጋና ዳንዳያዚና? ኔኒ ታና ኔ ኣይሌዛ ኤራሳ። 19 ኣቤት ጎዳዉ! ኔ ኣይሌዛ ጊሻስ ኔ ዎዚና ቆፋ ማላ ሃ ጊታ ሚሻታ ኡባ ኦꬃዳ ሃ ጊታቴꬃ ኡባ ታና ኤሪሳዳሳ።
20 «ኣቤት ጎዳዉ! ኔ ማላይ ሃራይ ባዋ፤ ኑኒ ኑ ሃይꬃን ሲዪዳ ማላ ኔፔ ኣቲን ሃራ ጾሲ ዴና። 21 ኔኒ ጾሲ ጊብጼ ቢታፌ ኬሲዳ ኔ ዴራ ሲንꬃፌ ካዎቴꬃታ ጎዳዳ ጊታኔ ያሺሲዛ ሚሽ ኔ ሱንꬃስ ኦꬃና ማላ፥ ዴራካ ኔስ ዎዛና ማላ ኔ ኢስታስ ኦꬂዳይሳꬆ ኔ ዴሬ ኢስራኤሌ ማላ ዴሬይ ቢታ ቦላ ሃራይ ዲዜ? 22 ኔኒ ኔ ዴራ ኢስራኤሌ ሜርናስ ኔስ ሂስታዳሳ፤ ኣቤት ጎዳዉ ኔኒካ ኢስታ ጾሳ ጊዳዳሳ።
23 «ኣቤት ጎዳዉ! ኔኒ ኔ ኣይሌዛሲኔ ኢዛ ዜሬꬃታስ ኢሚዳ ሂዶታ ሜርናስ ሚንꬃ፤ ኔኒ ኢሚዳ ሂዶታ ቃላካ ፖላ። 24 ሄሳ ኔ ኦꬃናይ ኔ ሱንꬂ ሚኒ ዳና ማላኔ ሜርናስ ጊታ ጊዳና ማላሳ፤ ሄሳፌ ጉዬ ኣሳይ፥ ‹ኡባፌ ዎልቃማ ጾሳይ ቱሙካ ኢስራኤሌ ጾሳ› ጋና ጌስ፤ ኔ ኣይሌ ዳዊቴ ዛሬቲ ኔ ሲንꬃን ሚኒ ኤቃና።
25 «ኣቤት ታ ጾሳዉ፥ ‹ኔኒ ታስ ኔ ኣይሌዛስ ኬꬅ ኬጻና ጋ ዮታዳሳ፤ ሄሳ ጊሻስ ታኒ ኔ ኣይሌይ ኔና ዎሳናስ ጻላዲስ። 26 ኣቤት ጎዳዉ! ኔኒ ቱሙ ጾሳ፤ ሃ ሎኦ ሂዶታ ቃላ ኔ ኣይሌዛስ ኢማዳሳ። 27 ኔ ሲንꬃን ሜርናስ ዳና ማላ ኔ ኣይሌዛ ኬꬅ ኣንጃናስ ኔ ኮያዳሳ፤ ኣቤት ጎዳዉ! ኔኒ ኣንጂዳይ ሜርናስ ኣንጄቲዳዴ ጊዳና› ጊ ዎሴስ» ጊዴስ።