1 ዳዊቲ ጬጊዳ ዎዴ ባ ና ሶሎሞኔ ኢስራኤሌ ቦላ ካዎꬂዴስ።1ካዎ 1፡1-40

2 ዳዊቲ ኢስራኤሌ ካሌꬂዛ ኡባታ፥ ቄሴታኔ ሌዌታ ኢሲፌ ሺሺዴስ። 3 ኢስታስ ላይꬃይ ሄꬑ ታማኔ ሄሳፌካ ቦላራ ጊዲዳ ኣቱማ ኣሳታ ሌዌታፔ ቆዲዴስ፤ ኢስታ ቆዳይ ኩሜꬅ 38,000 ጊዲዴስ። 4 ሃይታንታፌ 24,000 ጾሳ ኬꬃ ኦሶ ካሌቲ ጼላና ማላ ኣዋቴꬅ ኢስታስ ኢሚዴስ፤ ቃሴ 6,000 ኣሳታስ ሹሜታኔ ፒርዳ ዳናታ ሂስቲ ዎꬂዴስ። 5 ኦይዱ ሺያታስ ጊምቤዛ ፔንጌ ናጋና ማላ ኣዋቴꬅ ኢሚዴስ፤ ኣቲዳ ኦይዱ ሺያታስ ባ ኦꬂዳ ዬꬃ ማሳራታን ጎዳ ጾሳ ጋላታና ማላ ሱንꬂዴስ።

6 ዳዊቲ ሌዌይ ዬሊዳ ኣቱማ ናይታ ጌርሾኔ፥ ቃኣቴኔ ሜራሬ ኢስታ ዛርኬን ዛርኬን ሄꬑ ኬሲ ሻኪዴስ።

7 ጌርሾኔይ ዬሊዳ ኣቱማ ናይቲ ላዳኔኔ ሺምኤ። 8 ላዳኔ ኣቱማ ናይቲ ሄꬓ፤ ኢስቲካ ዪሂኤሌ፥ ዜታሜኔ ኢዩኤሌ። 9 ሺምኤ ኣቱማ ናይቲ ሄꬓ፤ ኢስቲካ ሻሎሚቴ፥ ሃዚኤሌኔ ሃራኔ፤ ሄይቲ ላዳኔ ዛርኬታስ ሃላቃታ። 10 ሺምኤ ኣቱማ ናይቲ፥ ያሃቴ፥ ዚና፥ ያኡሼኔ ባሪሄ። 11 ባይራዚ ያሃቴ፥ ካሎዚ ዚና፤ ያኡሼሲኔ ባሪሄስ ዳሮ ኣቱማ ናይቲ ባይንዳ ጊሻስ ኢሲ ኬꬃ ኣሳ ማላ ቆዴቲዳ።

12 ቃኣቴስ ኦይዱ ኣቱማ ናይቲ ዴቴስ፤ ሄይቲካ ኣሚራሜ፥ ዪጺሃሬ፥ ኬብሮኔኔ ኡዚኤሌ። 13 ኣሚራሜ ኣቱማ ናይቲ ኣሮኔኔ ሙሴ፤ ኣሮኔይኔ ኢዛ ዜሬꬃቲ ጾሳ ኬꬃን ጎኤቲዛ ሚሻታ ሜርናስ ዱማሳና ማላ፥ ጾሳስ ያርሾ ሺሻና ማላ፥ ጾሳ ሲንꬃን ሃጋዛና ማላኔ ኢዛ ሱንꬃን ዴራ ሜርናስ ኣንጃና ማላ ዱማቲዳ። ኬሳ 28፡1 14 ጾሳ ኣስ ሙሴ ኣቱማ ናይቲካ ሌዌ ቆሞታ ማላ ቆዴቲዳ። 15 ሙሴ ናይቲ ጌርሾሜኔ ኤልኤዜሬ። 16 ጌርሾሜ ናይታስ ሃላቃይ ባይራ ናዛ ሹባኤሌ። 17 ኤልኤዜሬስ ኢሲ ኣቱማ ናይ ጻላ ዴስ፤ ኢዚካ ኤራሃቢያ፤ ኤራሃቢያስ ጊዲኮ ዳሮ ኣቱማ ናይቲ ዴቴስ።

18 ዪጺሃሬ ናይታስ ሃላቃይ ባይራ ናዛ ሻሎሚቴ። 19 ኬብሮኔ ናይታፔ ባይራዚ ዪሪያ፥ ናምኣንꬆዚ ኣማሪያ፥ ሄꬓንꬆዚ ያሃዚኤሌ፥ ኦይዳንꬆዚ ዮቂማኣሜ። 20 ኡዚኤሌ ኣቱማ ናይታፔ ባይራዚ ሚኪያሳ፥ ካሎዚ ዪሺያ።

21 ሜራሬ ኣቱማ ናይቲ ማሂሌኔ ሙሼ፤ ማሂሌ ኣቱማ ናይቲ ኤልኤዜሬኔ ቂሴ። 22 ኤልኤዜሬይ ማጫ ና ጻላ ዬሊዲ ኣቱማ ና ዬሎንታ ሃይቂዴስ፤ ሄሳ ጊሻስ ኢስቲ ባንታ ኣዋ ኢሻ ቂሴ ናይታ ጌሊዳ። 23 ሙሼ ኣቱማ ናይቲ ሄꬓ፤ ሄይቲካ ማሂሌ፥ ኤዴሬኔ ያርሞቴ።

24 ሃይታንቲ ኡባይ ባሶ ኣሳታኒኔ ባ ዛርኬታን ጼይጌቲዳ፤ ሌዌ ዛሬቲ ኢሶይ ኢሶይ ባ ሱንꬃን ማዝጋቤቲዳ፤ ኢስታስ ላይꬃይ ናምኡ ታማኔ ሄሳፌ ቦላ ጊዲዳይቲ ጾሳ ኬꬃን ኦꬄቴስ። 25 ዳዊቲ፥ «ኢስራኤሌ ጎዳ ጾሲ ባ ኣሳ ሼምፒሲዴስ፤ ዬሩሳላሜን ሜርናስ ዴኣና። 26 ሃይሳፌ ጉዬ ሌዌቲ ዱንካኔዛኔ ኢዛ ጊዶን ጎኤቲዛ ሚሻታ ቶካናስ ቤሴና» ጊዴስ። ዛሬ 10፡8 27 ዳዊቲ ዉርሴꬃን ኢሚዳ ኣዛዞ ማላ ኢስታስ ላይꬃይ ናምኡ ታማኔ ሄሳፌ ቦላራ ጊዲዳ ሌዌቲ ቆዴቲዳ።

28 ሌዌታ ኦሶይ ጾሳ ኬꬃን ኣሮኔ ዜሬꬃታ ኦሶን ኦꬂ ማዶ፥ ጾሳ ኬꬃ ጊዶዛኔ ጊቤዛ ሎኤꬂ ናጎ፥ ጾሳ ኬꬃ ኦሶስ ዱማቲዳ ሚሻታ ሎኤꬂ ኦይꬂኔ ጾሳ ኬꬃን ዲዛ ሃራ ኦሶታካ ሎኤꬂ ኦሶ። 29 ቃሴካ ጾሳ ሲንꬃን ዎꬂዛ ኡኬꬃስ፥ ካꬃ ያርሾስ ሺሺዛ ꬊሌስ፥ ሙኑቃናስ፥ ኢርሾይ ባይንዳ ኡኬቲዛ ኡኬꬅ ኡካናስ፥ ማኪዛዛሲኔ ሜዛኒዛዛስ ኣላፌቴꬂ ኢስታስ ኢሜቲዴስ። 30 ሄሳꬆካ ኢስቲ ኡባ ጋላስ ማላዶኔ ኦማርስ ጎዳ ጾሳ ሲንꬃን ኤቂዲ ጋላታናሲኔ ቦንቻናስ፥ 31 ሳምባታ ጋላስ፥ ኣጊናይ ዶሚዛ ኮይሮ ጋላሳታን፥ ባኣሌ ጋላሳታን ዎጋ ቆዳ ማላ ጎዳ ጾሳ ሲንꬃን ኡባ ዎዴ ጹጌቲ ሺቂዛ ያርሾ ሺሻናስ፥ 32 ጋይቶቴꬃ ዱንካኔኔ ጾሳ ኬꬅ ናጋናስ፥ ኢዛ ጊዶን ኦሴቲዛ ጎይኖ ዎጋታ ፖሊሺን ባ ዳቦ ኣሮኔ ዜሬꬃታ ማዳናስ ኣዋቴꬂ ኢሜቲዴስ። ታይ 3፡5-9