1 ዳዊቲኔ ኦላ ጋዳዋቲ ኣሳፌ ናይታፔ፥ ሄማኔ ናይታፔኔ ኤዶታኔ ናይታፔ ማሲንቆን፥ ዲꬃኒኔ ዳላን ኣዋጂሼ ቲንቢቴ ዮቲዛይታ ዶሪ ዎꬂዳ፤ ሃይሳ ሃ ኦሶዛ ኦꬃና ማላ ዶሬቲዳ ኣሳታ ሱንꬂ ሃይሳፌ ካሊ ዲዛይሳ።

2 ኣሳፌ ናይታፔ ዛኩሬ፥ ዮሴፌ፥ ናታኒያኔ ኣሼርኤሌ፤ ሃይቲ ኣሳፌ ናይቲ ካዎይ ኣዛዚን ቲንቢቴ ዮቲዛ ኣሳፌፔ ጋርሳራ ኣዛዜቴቴስ።

3 ኤዶታኔ ናይታፔ ጎዶሊያሳ፥ ጼሬ፥ ዬሻኢያ፥ ሺምኤ፥ ሃሻቢያኔ ማቲቲያ፤ ሃ ኡሱፑናቲ ማሲንቆን ጎዳ ጋላቲሼኔ ቦንቺሼ ቲንቢቴ ዮቲዛ ባ ኣዋ ኤዶታኔፔ ጋርሳራ ኣዛዜቴቴስ።

4 ሄማኔ ናይታፔ ቡቂያ፥ ማታኒያ፥ ኡዚኤሌ፥ ሹባኤሌ፥ ያርሞቴ፥ ሃናኒያ፥ ሃናኔ፥ ኤልኣታ፥ ጊዶልቴ፥ ኤሮማምቴ-ኤዜሬ፥ ዮሺባቃሼ፥ ማሎታ፥ ሆቲሬኔ ማሂዚኦቴ። 5 ሃይቲ ኡባቲካ ካዎዛስ ቲንቢቴ ዮቲዛ ሄማኔ ናይታ፤ ጾሳይ ኢዛስ ኢማና ጊዳ ማላ ሄማኔ ꬎቁ ꬎቁ ሂስታናስ ሃ 14 ኣቱማ ናይታኔ 3 ማጫ ናይታ ኢዛስ ኢሚዴስ። 6 ሃይቲ ኡባይ ጎዳ ኬꬃን ዳላ ጊሪሲሼ፥ ማሲንቆኔ ዲꬅ ዲጺሼ ባንታ ኣዋፔ ጋርሳራ ጾሳ ኬꬃን ኦꬄቴስ።

ኣሳፌይ፥ ኤዶታኔይኔ ሄማኔይ ካዎዛፔ ጋርሳራ ኣዛዜቲሼ ዴቴስ። 7 ሃይቲ ባ ዳቦታራ ጊዲዲ ጎዳ ሲንꬃን ሺቂዛ ዬꬃ ታማር ሎሂዳይታ፤ ኢስታ ቆዳይ ሙሌራ ናምኡ ጼታኔ ኦስፑን ታማኔ ኦስፑና። 8 ኢስቲ ባንታ ኦሶ ሻኪ ኤራናስ ጪማኔ ና፥ ኣስታማሬኔ ታማሬ ጊ ሻኮንታ ኢሲ ጊና ሳማ ዬጊዳ።