1 ታ ኢሻቶ! ኣያናይ ኢሚዛ ኢሞታ ጊሻስ ኢንቴ ኢሲ ሚሽ ኤራና ማላ ታ ኮያይስ። 2 ኢንቴ ኣማናናፔ ካሴ ጮ ሜላ ያኔ ሃ ጉሳን ኢንቴ ኤሮንታ ካሊዲ ዶና ዱዴ ጊዲዳ ኤቃታኮ ቢዳይሳ ኢንቴካ ኤሬታ። 3 ሄሳ ጊሻስ ኦኒካ ጾሳ ኣያናን ሃሳይሼ፥ «ዬሱሲ ቃንጌቲዳዴ» ጌና። ሄሳꬆካ ጺሎ ኣያናን ጊዲዲ ኣቲን ኦኒካ፥ «ዬሱሲ ጎዳ» ጋና ኣሲ ዶንታይሳ ታ ኢንቴስ ዮታይስ።

4 ኣሳስ ኢሞቴꬂ ዱማ ዱማ ጊዲሺን ኣያናይ ጊዲኮ ኢሲኖ። 5 ኦሶይካ ዱማ ዱማ ጊዲሺን ጎዳይ ጊዲኮ ኢሲኖ። 6 ዱማ ዱማ ኦሶ ኦጌቲ ዲኮካ ዉርሲካ ኦꬂዛይ ኢሲ ጾሳ።

7 ጊዶ ኣቲን ጺሎ ኣያና ቆንጪሶ ኢሞታይ ኢሳዴስ ኢሜቲዛይ ኢሲፌ ጎኤታናሳ። 8 ኢሳዴስ ሂላን ሃሳያና ኤራቴꬂ ኢሜቴስ፤ ሃራ ኣሳስ ቃሴ ሄ ኣያናንካ ኤራቴꬃ ቃላን ሃሳያና ቃላይ ኢሜቴስ። 9 ኢሳዴስ ሄ ኣያናን ኣማኖይ ኢሜቴስ፤ ሃራ ኣሳስ ቃሴ ሄ ኣያናንካ ሃርጊዛይታ ፓꬂዛ ኢሞታይ ኢሜቴስ። 10 ኢሳዴስ ማላሊሲዛ ኦሶ ኦꬂዛ ኢሞታይ፥ ሃራ ኣሳስ ቲንቢቴ ቃላ *ቲንቢቴ ቃላ፡ ቲንቢቴ ቃላ ጾሳ ቃላ ቢርሼꬅ ዎይኮ ቆንጪሲ ዮቶ። ሃሳያ ኢሞታይ፥ ሃራ ኣሳስ ቃሴካ ኣያናታ ሻኪ ኤሮይ፥ ሃራ ኣሳስ ዱማ ዱማ ቃላን ሃሳያይ፥ ቃሴካ ሃራ ኣሳስ ሃራ ዱማ ዱማ ቃላን ሃሳዬቲዳይሳ ቢርሻና ኢሞታይ ኢሜቴስ። 11 ሄይቲ ዉሪካ ሄ ኢሲ ኣያናይ ኢሚዛ ኢሞታ ጊዲሺን ኢሲ ኢሲ ኣሳስ ባ ኮዪዳ ማላ ኢሜስ።

12 ኢሲ ኣሳቴꬃ ቦላ ዳሮ ቢሊቴቲ ዲኮካ ኣሳቴꬃይ ኢሲኖ፤ ጊዶ ኣቲን ቢሊቴቲ ዳሮ ጊዲኮካ ኣሳቴꬃይ ኢሲኖ ጻላ፤ ኪርስቶሲካ ሄሳ ማላ። ኦሮ 12፡4-5 13 ኣይሁዳ ኣሳታ ጊዲንካ ጊሪኬ ኣሳታ ጊዲንካ፥ ኣይሌ ጊዲንካ ዎይኮ ጎቃ ኣሳታ ጊዲንካ ኑ ዉሪካ ኢሲኖ ጊዳናስ ኢሲ ኣያናን ጻማቄቲዶስ፤ ኑ ዉሪካ ሃ ኢሲ ኣያናፔ ኡዪዶስ።

14 ኣሳቴꬂ ሜꬌቲዳይ ዳሮ ቢሊቴታፔ ኣቲን ኢሲ ቢሊቴፌ ጻላላ ጊዴና። 15 ቶሆይ፥ «ታኒ ኩሼ ጊዶንታ ጊሻስ ኣሳቴꬃ ጊዶን ዲኬ» ጊኮ ኢዚ ሂዝጊዳ ጊሻስ ኢዛስ ኣሳቴꬃን ዱሲ ኣታኔ? 16 ሃይꬂ፥ «ታ ኣይፌ ጊዶንታ ጊሻስ ኣሳቴꬃ ጊዶን ዲኬ» ጊኮ ሄሳ ጊሻስ ኣሳቴꬃን ዱሲ ኢዛስ ኣታኔ? 17 ኣሳቴꬂ ዉሪካ ኣይፌ ጻላ ጊዲዳኮ ኣዛን ሲያኔ? ኣሳቴꬂ ዉሪካ ሃይꬅ ጻላ ጊዲዳኮ ኣዛን ሲንጋኔ? 18 ጊዶ ኣቲን ጾሲ ኢሳ ኢሳ ባ ኮዪዳ ማላ ኣሳቴꬃ ጊዶን ዳናስ ቤሲዛሶን ዎꬂዴስ። 19 ቢሊቴይ ዉሪካ ኢሲኖ ጊዲዳኮ ኩሜꬃ ኣሳቴꬂ ኣዋፔ ቤታኔ? 20 ሄሳ ጊሻስ ቢሊቴቲ ዳሮ ሺን ኣሳቴꬂ ጊዲኮ ኢሲኖ ጻላ።

21 ኣይፌይ ኩሼ፥ «ኔና ታ ኮይኬ» ጋናስ ዳንዳዬና፤ ሁኤይ ቶሆ፥ «ኔና ታ ኮይኬ» ጋና ዳንዳዬና። 22 ሃራይ ኣቶሺን ኡባፌ ላፋ ሚሳቲዛ ቢሊቴቲ ዳሮ ኮሺዛይታ። 23 ኑኒ ላፋ ጊ ሌቂዛ ቢሊቴታ ሃንኮይታፔ ኣꬂ ቦንቾስ፤ ቃሴካ ኑ ኢስታን ዬላቲዛ ቢሊቴታ ሃራፔ ኣꬂ ናጎስ። 24 ኑ ኢስታን ዬላቶንታ ቢሊቴታስ ጊዲኮ ሄሳ ማላ ቦንቾ ኮሼና፤ ጾሲ ጊዲኮ ኣሳቴꬃ ቢሊቴታ ኢሲ ቦላ ኦይሴꬂዲ ቦንቾይ ፓጪዛይታስ ኣꬌꬃ ቦንቾ ኢሚዴስ። 25 ኢዚ ሄሳ ኦꬂዳይ ኣሳቴꬃ ቢሊቴታ ጋርሳን ሻኬቴꬂ ዶንታ ኢስቲ ባ ጋርሳን ኢሶይ ኢሳ ባናራ ጊና ጊ ቆፓናሳ። 26 ኢሲ ቢሊቴይ ሳኬቲኮ ሃንኮ ቢሊቴቲ ዉሪካ ኢዛራ ኢሲፌ ሳኬቴቴስ፤ ኢሲ ቢሊቴይ ቦንቼቲኮ ቢሊቴቲ ዉሪካ ኢሲፌ ኡፋዬቴቴስ።

27 ሂስቲኮ ኢንቴ ዉሪካ ኪርስቶሳ ኣሳቴꬅ፤ ኢንቴ ኢሶይ ኢሶይ ኢዛ ኣሳቴꬃ ቢሊቴታ። 28 ጾሲ ዎሳ ኬꬃ ጊዶን ኮይሮ ሃዋሬታ፥ ናምኣንꬆ ቃሴ ናቤታ፥ ሄꬓንꬆ ኣስታማሬታ፥ ካሌꬂዲ ማላታ ኦꬂዛይታ፥ ፓꬂዛ ኢሞቴꬂ ዲዛይታ፥ ሃራታካ ኣስ ማዲዛ ኢሞታይ ዲዛይታ፥ ዴሬ ኣይሶ ኤራቴꬂ ዲዛይታኔ ዱማ ዱማ ቃላ ሃሳያና ኢሞቴꬂ ዲዛ ኣሳታ ዎꬂዴስ። 29 ዉሪካ ሃዋሬቴ? ዉሪካ ናቤቴ? ዉሪካ ኣስታማሬቴ? ዉሪካ ማላሊሲዛ ሚሽ ኦꬂዞ? 30 ኡባሲካ ሃርጊዛይታ ፓꬂዛ ኢሞታይ ዲዜ? ኣሲ ዉሪካ ዱማ ቃላን ሃሳይዜ? ዱማ ቃላን ሃሳዬቶይሳ ኣሲ ዉሪ ቢርሺዜ? 31 ጊዶ ኣቲን ኢንቴ ዉሪካ ኡባፌ ኣꬊዛ ኢሞታ ሎኤꬂ ኮዪቴ።

ቃሴካ ሃራ ኡባፌ ኣꬊዛ ኦጌ ታ ኢንቴና ቤሳና።