1 ታ ኣሳ ቃላኒኔ ሳሎ ኪታንቻታ ቃላን ሃሳይኮካ ታስ ሲቆይ ባይንዳ ኣጊኮ ጮ ሜላ ቢራታ ጊሪሳ ማላ ዎይኮ ዳላ ጊሪሳ ማላ። 2 ቲንቢቴ ሃሳይዛ ኢሞታይ ታስ ዲኮካ፥ ዎይኮ ጹራ ዮኦታኔ ኤራቴꬅ ዉርሳ ታ ኤሪኮካ፥ ዙማይ ኢዚ ዲዛሶፔ ꬎቃላዳ ሃራሶ ዲጊዛ ኣማኖይ ታስ ዲኮካ ሄሳ ዉርሳካ ሲቆይ ባይንዳ ታ ኦꬂኮ ሄሲ ሃዳ። ማቶ 17፡20፤ 21፡21፤ ማር 11፡23 3 ታስ ዲዛዝ ዉርሳ ማንቆታስ ታ ኢሚኮካ፥ ታ ኣሳቴꬅ ታ ታማን ጹጊኮካ፥ *ታማን ጹጊኮካ፡ ታማን ጹጊኮካ ጊዛይሳ ኢሲ ኢሲ ጌሻ ማጻፋቲ ኦቶሬቴꬃስ ጌቴስ። ሲቆይ ባይንዳ ኣጊኮ ታና ሄሲ ኣይኮካ ማዴና።

4 ሲቆይ ዳንዳያ፥ ቃሴካ ኪያ፤ ሲቆይ ሚቃይኔና፤ ጬቄቴና፤ ኦቶሬቴና፤ 5 ቤሶንታዝ ኦꬄና፤ ባ ጎኣ ጻላ ጼሌና፤ ቆሆ ቆዳን ዬጌና። 6 ሲቆይ ቱማንፔ ኣቲን ማካላን ኡፋዬቴና። 7 ሲቆይ ኡባ ዎዴ ዳንዳዬስ፤ ኡባ ዎዴካ ኣማኔስ፤ ኡፋይስ ኦꬄሲኔ ሚኒ ኤቄስ።

8 ሲቆይ ሙሌካ ኩንዴና፤ ቲንቢቴይ ጊዲኮ ኣታና፤ ሃራ ቃላን ሃሳያይካ ኣታና፤ ኤራቴꬂካ ሻሬታና። 9 ጋሶይካ ኑ ኤሪዛይ ኡባ ጊዶንታ ሻኪ ኤሮስ፤ ቲንቢቴ ሃሳያ ጊዲኮካ ባጋ ሃሳዮስ። 10 ጊዶ ኣቲን ዉርሴꬂ ጋኪዛ ዎዴ ኩሜꬅ ጊዶንታ ኢሞታይ ሄ ዎዴ ሻሬታና።

11 ታ ጉꬃ ናቴቴꬃን ዳሼ ና ማላ ሃሳያይሲኔ ና ማላ ቆፓይስ፤ ና ማላካ ዩሻ ቆፓይስ፤ ካሃ ኩንꬂዳፔ ጉዬ ካሴ ናቴꬃን ሃኒዛይሳ ዉርሳካ ዬጋ ኣጋዲስ። 12 ኑኒ ሃኢ ቤኢዛይሲ ሃꬃን ጼሊዛ ማላ ጮ ቦዢ ቦዤስ ሺን ሄ ዎዴ ጊዲኮ ኑ ኢዛ ኣይፌሶ ሎኤꬂ ቤያና፤ ታ ሃኢ ኩሜꬅ ጊዶንታ ባጋ ጻላላ ኤራይስ፤ ሄ ዎዴ ጊዲኮ ታኒ ታ ሁኤስ ኤሬቲዳይሳ ማላ ኤራና።

13 ሄሳ ጊሻስ ኣማኖይ፥ ሂዶታይኔ ሲቆይ ሃይቲ ሄꬓቲ ኤቂ ዳና፤ ሃይታ ኡባፌ ኣꬊዛይ ሲቆ።