1 ጺሮሴ ካዎ ኪራሜይ ዳዊቴራ ባ ዲዛ ላይꬅ ኡባን ሲቆን ጋምኢዳ ጊሻስ ሶሎሞኔይ ባ ኣዋ ዳዊቴ ሶሆን ካዎታናስ ቲዬቲዳይሳ ሲዪዲ ባ ኦሳንቻታ ሶሎሞኔኮ ኪቲዴስ። 2 ሶሎሞኔይካ ኪራሜስ ዛሪዲ፥ 3 «ታ ኣዋ ዳዊቴ ቦላ ኡባሶራ ዴንዲዳ ኦላ ጋሶን ጎዳይ ኢዛ ሞርኬታ ኢዛ ቶሆፔ ጋርሳራ ሃሪሳና ጋካናስ ጎዳ ባ ጾሳ ሱንꬃስ ኬꬄ ኢዚ ኬጻና ዳንዳዮንታ ኣጊዳይሳ ኔ ኤራሳ። 4 ሃኢ ጊዲኮ ጎዳ ታ ጾሳይ ታስ ኡባሶራ ሳሮቴꬅ ኢሚዳ ጊሻስ ታስ ሞርኬይ ዎይኮ ኢታ ሚሺ ዴና። 5 ጎዳይ ታ ኣዋ ዳዊቴስ፥ ‹ታኒ ኔ ሶሆን ኔ ካዎቴꬃ ኣራታን ካዎꬂዛ ኔ ናይ ታ ሱንꬃስ ኬꬅ ኬጻና› ጊዳ ማላ ታኒ ጎዳ ታ ጾሳ ሱንꬃስ ጾሳ ኬꬅ ኬጻናስ ቆፓዲስ። 2ሳሜ 7፡12-13 6 ሄሳ ጊሻስ ሊባኖሴፔ ዚጋ ታስ ቃንጺዛ ኣሳታ ኣዛዛ፤ ታ ኣሳቲ ኔ ኣሳታራ ኦꬃና፤ ኔ ኣሳታስ ኔኒ ቃንጻ ጊዳ ዳሞዛ ታኒ ቃንጻና። ሲዶና ኣሳ ማላ ሚꬃ ቃንጾ ሂላ ኑ ኣሳይ ኤሮንታይሳ ኔኒ ኤራሳ» ጊ ኪቲዴስ።

7 ኪራሜይ ሶሎሞኔ ኪታዛ ሲዪዲ ኬሂፔ ኡፋዬቲዲ፥ «ሃ ዎልቃማ ዴራ ኣይሳናስ ዳዊቴስ ኣꬎ ኤራቴꬃን ኩሚዳ ና ኢሚዳ ጎዳይ ሃች ጋላቴቶ» ጊዴስ።

8 ሄሳፌ ጉዬ ኪራሜይ ሶሎሞኔስ፥ «ኔኒ ታስ ኪቲዳ ኪታይ ታና ጋኪዴስ። ኔኒ ኮዪዳይሳ ኡባ ታኒ ኦꬃና፤ ዚጋ ሙዴꬃታኔ*ሙዴꬃ፡ ሙዴꬃ ኢሲ ኢሲ ባጋ ጋሞꬆ ቃላን ጪሬꬅ ዎይኮ ጩኬꬅ ጌቴቴስ። ጺዳ ሙዴꬃታ ታኒ ኔስ ሺሻና። 9 ታ ኣሳይ ሙዴꬃታ ሊባኖሴፔ ዱጌ ኣባ ማታ ጋካናስ ሚያና፤ ታኒካ ኢስታ ቃቻ ጫናዳ ኣባ ቦላራ ቶኬቲዲ ኔኒ ማላቲዳሶ ጋꬃዳ ታ ቢርሺሳና፤ ኔኒ ሄፔ ኤካዳ ኔ ባጋራ ታ ካዎቴꬃ ኬꬃን ዲዛ ኣሳስ ሚዛ ካꬅ ዬዳዳ ታ ኣሞ ኩንꬃ» ጊ ኪቲዴስ።

10 ሄሳꬆ ኦꬂዲ ኪራሜይ ሶሎሞኔይ ኮዪዳ ኬና ዚጋ ሙዴꬃታኔ ጺዳ ሙዴꬃታ ኡባ ሺሺዴስ። 11 ሶሎሞኔይካ ካዎ ኪራሜ ካዎቴꬃ ኬꬃን ዲዛ ኣሳታስ ቃላባ ጊዳና ማላ 20,000 ኮንታሌ ጊስቴኔ ሙሩታ ዎጋራ ዛይቴ 400,000 ሊቲሮ ላይꬃን ላይꬃን ፓጬይ ባይንዳ ኪራሜስ ሺሼስ። 12 ጎዳይ ሶሎሞኔስ ኢሚዳ ሂዶታ ቃላ ማላ ኢዛስ ኣꬎ ኤራቴꬅ ኢሚዴስ። ኪራሜሲኔ ሶሎሞኔስ ሎኦ ጋይቶቴꬂ ዲዛ ጊሻስ ባንታ ጊዶን ጫቄቲዳ።

13 ካዎ ሶሎሞኔይ ኢስራኤሌ ኣሳ ኡባፌ 30,000 ጋባራታ ዶሪዴስ። 14 ኣዶኒራሜ ኢስታ ቦላ ሃላቃ ሂስቲ ሹሚዴስ። ጋባራታካ ታሙ ታሙ ሺያን ሻኪ ሄꬑ ኬሲዴስ፤ ኢሲ ኢሲ ቡቴይ ኢሲ ኣጊና ሊባኖሴን ኦꬃና ማላኔ ናምኡ ኣጊና ባሶን ባሶን ሼምፓና ማላ ታራ ኦይꬂዴስ።1ካዎ 12፡18 15 ሶሎሞኔስ ቶሆ ቶኪዛ 70,000 ኣሳቲኔ ሹች ቄሪዛ 80,000 ኣሳቲ ጌዜን ዴቴስ። 16 ቃሴካ ኦሶዛ ኣዋቴꬃን ካሌቲ ኦሲሲዛ 33,000 ኣላፌቲ ዴቴስ። 17 ኢስቲካ ካዎ ሶሎሞኔይ ኣዛዚን ጾሳ ኬꬃስ ዮች ጊዳና ማላ ዎጋ ሙሩታ ሹቻታ ቄሪዲ ማሲዳ። 18 ኩሼ ሂላቴꬅ ኤሪዛ ሶሎሞኔ ኣሳቲ፥ ኪራሜ ኣሳቲኔ ጌባሌ ኣሳቲ ጾሳ ኬꬃስ ኮሺዛ ሚꬂኔ ሹች ቄሪ ጊግሲዳ።