1 ኢስራኤሌ ኣሳይ ጊብጼ ቢታፌ ኬዚዳ ኦይዱ ጼታኔ ኦስፑን ታማንꬃ ላይꬃን ሶሎሞኔይ ኢስራኤሌ ቦላ ካዎቲዳ ኦይዳንꬆ ላይꬃን ዚፌ ጌቴቲዛ ናምኣንꬆ ኣጊናን ጎዳ ኬꬅ ኬጾ ዶሚዴስ። 2 ሶሎሞኔይ ጎዳስ ኬጺዳ ኬꬃስ ኣዱሳቴꬃይ 60 ዋꬋ፥ ጎምፓይ 20 ዋꬋ፥ ꬎቃቴꬃይ 30 ዋꬋ። 3 ጾሳ ኬꬃ ዳራንቻዛ ጎምፓይ 20 ዋꬋ ጊዲሺን ኢዛስ ኣዱሳቴꬃይ 10 ዋꬋ ካሬ ኬዜስ። 4 ጾሳ ኬꬃስ ሶ ባጋራ ኣኪዲ ካሬ ባጋራ ጹሚዳ ማስኮቴቲ ዴቴስ። 5 ጾሳ ኬꬃ ዩሾን ኡባፌ ዱማቲዳ ጊዶ ቆልኣ ኪፊሌ ጎዳራ ኦይሴꬂዲ ሃራ ኪፊሌታ ኬጺዴስ፤ 6 ፖቄዛስ ጋርሳ ኪፊሌዛ ጎምፓይ 5 ዋꬋ፥ ቦላ ናምኣንꬆ ኪፊሌዛ ጎምፓይ 6 ዋꬋ፥ ቦላ ሄꬓንꬆ ኪፊሌዛ ጎምፓይ 7 ዋꬋ፤ ኣይኮይካ ጾሳ ኬꬃ ጊምቤዛ ካንꬂ ጌሎንታ ማላ ኢዛ ዩሾን ካሬ ባጋራ ኬላታ ኬሊዴስ።

7 ጾሳ ኬꬃዚ ጊምቤቲዳ ሹቻቲ ማሴቲ ጊጊዳይ ሄን ባ ዲዛሶን ጊዲዳ ጊሻስ ጾሳ ኬꬃይ ኬጼቲሺን ናሪቃ ጊሪሲ፥ ካልታ ጊሪሲ ዎይኮ ሃራ ቢራታታ ጊሪሲ ጾሳ ኬꬃ ሄራን ሴቴቲቤና።

8 ፖቄዛስ ጋርሳ ኪፊሌዛ ጌሊዛ ፔንጌይ ጾሳ ኬꬃፌ ዱጌሃ ባጋራ ዴስ፤ ሄፔ ፑዴ ናምኣንꬆ ፖቄዛኔ ሄꬓንꬆ ፖቄዛ ባናስ ዬꬊ ዬꬊ ኬዚዛ ኬቺ ዴስ። 9 ሄሳꬆ ኦꬂዲ ሶሎሞኔይ ኬꬃ ኬጺ ፖሊዴስ፤ ሂስቲዲ ካራዛ ሶ ባጋራ ዚጋ ሳንቃን ካሚዴስ። 10 ቃሴ ጾሳ ኬꬃ ዩሾን ኢስታስ ꬎቃቴꬃይ ኢቻሹ ኢቻሹ ዋꬋ ጊዲዳ ኪፊሌታ ኬጺዴስ፤ ሂስቲዲ ጾሳ ኬꬃ ጎዳራ ዚጋ ሳንቃን ኦይሴꬂዴስ።

11 ጎዳ ቃላይ ሶሎሞኔኮ ዪዴስ፤ 12 ሂስቲዲ፥ «ሃይሳ ኔኒ ኬጺዳ ጾሳ ኬꬃን ታ ዎጋ፥ ታ ኣዛዞኔ ማራ ኔ ናጊኮ ታኒ ኔ ኣዋ ዳዊቴስ ኢሚዳ ሂዶታ ቃላ ኔ ባጋራ ፖላና። 13 ሂስታዳ ታኒ ኢስራኤሌ ኣሳ ጊዶን ዴኣና፤ ታኒ ታ ዴራ ኢስራኤሌ ዬጋ ኣጊኬ» ጊዴስ።

14 ሶሎሞኔይ ጾሳ ኬꬃ ኬጺ ጊጊዴስ። 15 ጾሳ ኬꬃ ጎዳ ሶ ባጋራ ዚጋ ሳንቃን ካሚዴስ፤ ዉይጌዛ ቃሴ ጺዳ ሳንቃፌ ኦꬂዴስ። 16 ጾሳ ኬꬃ ጊዶን ጉዬ ባጋራ 20 ዋꬋዚ ኡባፌ ዱማቲዳ ጊዶ ቆልኣ ጊዳና ማላ ዉይጌፔ ቢዲ ካራ ጋካናስ ዚጋ ሳንቃን ጎርዲዴስ። ኬሳ 26፡33-34 17 ሄ ኡባፌ ዱማቲዳ ጊዶ ቆልኣፌ ሲንꬃ ባጋራ ዲዛ ዉይጌዛስ ኣዱሳቴꬃይ 40 ዋꬋ። 18 ጾሳ ኬꬃስ ሶ ባጋይ ፑꬊዛ ጪሻታኒኔ ጪሻታ ሚስሌን ኣሌቄቲዴስ፤ ጊዶ ባጋራ ዚጋ ሳንቃን ካሜቲዳ ጊሻስ ሙሌካ ጊምቤ ሹቺ ቤቴና።

19 ሶሎሞኔይ ጫቆ ታቦታ ዎꬃናስ ኡባፌ ዱማቲዳ ጊዶ ቆልኣ ጊግሲዴስ። 20 ኡባፌ ዱማቲዳ ጊዶ ቆልኣ ኣዱሳቴꬃይ 20 ዋꬋ፥ ጎምፓይ 20 ዋꬋ፥ ꬎቃቴꬃይ 20 ዋꬋ። ሶሎሞኔይ ሄ ኡባፌ ዱማቲዳ ጊዶ ቆልኣስ ሶ ባጋ ሙሩታ ዎርቃን ሜሺዴስ፤ ዚጋፔ ኦሴቲዳ ያርሾ ያርሺዛሶዛካ ዎርቃን ሜሺዴስ። 21 ሶሎሞኔይ ጾሳ ኬꬃስ ጊዶ ባጋዛ ሙሩታ ዎርቃን ሜሺዴስ፤ ዎርቃን ሜሼቲዳ ኡባፌ ዱማቲዳ ጊዶ ቆልኣስ ሲንꬃ ባጋራ ዎርቃ ሳንሳላታን ኣሌቂሲዴስ። 22 ሂስቲዲ ኬꬃስ ሶ ጊዶዛ ዎርቃን ሜሺዴስ፤ ሄሳꬆካ ኡባፌ ዱማቲዳ ጊዶ ቆልኣዛን ዲዛ ያርሾሶዛ ሙሩታ ዎርቃን ሜሺዴስ። *ሃ ያርሾሶዚ ኤጻኔ ጩዋሲዛሶ። ኬሳ 30፡1-3

23 ኡባፌ ዱማቲዳ ጊዶ ቆልኣዛን ዎꬃናስ ኢሳስ ኢሳስ ጌሳይ 10 ዋꬋ ጊዲዛ ናምኡ ኪሩቤ ሚስሌታ ዎጋራ ሚꬃፌ ማሲዲ ጊግሲዴስ። 24 ኮይሮ ኪሩቤዛ ቄፌይ ኢሶይ ኢቻሹ ዋꬋ፤ ናምኣንꬆዚ ኢቻሹ ዋꬋ፤ ኮይሮ ቄፌ ጼራፔ ቢዲ ናምኣንꬆ ቄፌዛ ጼራ ጋካናስ ታሙ ዋꬋ። 25 ናምኣንꬆ ኪሩቤዛ ቄፌይካ ታሙ ዋꬋ፤ ናምኡ ኪሩቤታ ሜꬋይኔ ጉባይ ኢሲ ጊና። 26 ኢሲ ኢሲ ኪሩቤ ጌሳይ ታሙ ዋꬋ። 27 ሶሎሞኔይ ጾሳ ኬꬃን ዲዛ ኡባፌ ዱማቲዳ ጊዶ ቆልኣን ኪሩቤታ ዎꬂዴስ፤ ኢስታ ቄፌይ ሚጬቲ ኡቲዴስ፤ ኢሲ ኪሩቤዛ ቄፌይ ኢሲ ባጋ ጎዳ ቦቺሺን ሃንኮ ኪሩቤዛ ቄፌይ ሃንኮ ባጋ ጎዳ ቦቼስ፤ ኢስታ ናምኣታ ቄፌይ ሶ ጊዶን ኢሶይ ኢሳራ ጋይቴስ። 28 ሶሎሞኔይ ኪሩቤታካ ዎርቃን ሜሺዴስ። ኬሳ 25፡18-20

29 ኡባፌ ዱማቲዛ ጊዶ ቆልኣዛ ሶ ባጋራኔ ካሬ ባጋራ ጎዳ ኪሩቤ ሚስሌታን፥ ዛምባ ሚስሌታኒኔ ጪሻ ሚስሌታን ኣሌቂሲዴስ። 30 ቃሴካ ኡባፌ ዱማቲዳ ጊዶ ቆልኣዛኔ ጾሳ ኬꬃ ዉይጌዛ ኡባ ዎርቃን ሜሺዴስ።

31 ኡባፌ ዱማቲዳ ጊዶ ቆልኣ ጌሊዛሶዛስ ፔንጌዛ ዎጋራ ሚꬃፌ ሳንቃታ ጊግሲዴስ፤ ቆሲላꬃታሲኔ ቆሬታስ ኢቻሹ ዞዜይ ዴስ። 32 ዎጋራ ሚꬃፌ ኦሴቲዳ ናምኡ ሳንቃታ ኪሩቤ ሚስሌታን፥ ዛምባታ ሚስሌታኒኔ ጪሻ ሚስሌታን ኣሌቂሲዴስ፤ ሄይታ ኡባ ዎርቃን ሜሺዴስ። 33 ሄሳꬆካ ጾሳ ኬꬃ ጌሊዛሶ ፔንጌዛን ዎጋራፔ ኦሴቲዳ ኦይዱ ዞዜራ ዲዛ ቆሲላꬅ ኤሲዴስ። 34 ናምኡ ናምኡ ሳንቃቲ ማጻፋን ኢሲ ቦላ ኦይኬቲዳ ናምኡ ሳንቃታ ጊግሲዴስ። 35 ኢስታ ቦላ ኪሩቤ ሚስሌታ፥ ዛምባ ሚስሌታኔ ጪሻ ሚስሌታ ሜꬊዴስ፤ ሄ ሚስሌታ ሙሩታ ዎርቃን ሜሺዴስ።

36 ጾሳ ኬꬃን ጊዶ ዉይጌን ማሴቲዳ ሹች ሄꬑ ማራን ሊጪዴስ፤ ቃሴ ኢሲ ማራን ዚጋ ሳንቃ ሊጪዴስ።

37 ሶሎሞኔይ ካዎቲዳ ኦይዳንꬆ ላይꬃን፥ ዚፌ ጌቴቲዛ ናምኣንꬆ ኣጊናን ጎዳ ኬꬃ ዮቺ ዬጌቲዴስ። 38 ሶሎሞኔይ ካዎቲዳ ታማኔ ኢሲንꬃ ላይꬃን፥ ቡሌ ጌቴቲዛ ኦስፑንꬃ ኣጊናን ጾሳ ኬꬃይ ካሴ ኬጻናስ ቆፒዳ ማላ ኬጼቲ ጊጊዴስ፤ ሶሎሞኔይ ጾሳ ኬꬃ ላፑን ላይꬃን ኬጺ ኩንꬂዴስ።