1 ሶሎሞኔይ ባ ኬꬅ ኬጺ ጊጋናስ 13 ላይꬅ ኤኪዴስ። 2 ሊባኖሴ ዎራ ጌቴቲዛ ካዎቴꬃ ኬꬅ ኬጺዴስ፤ ሄ ኬꬃስ ኣዱሳቴꬃይ 100 ዋꬋ፥ ጎምፓይ 50 ዋꬋ ጌሳይ 30 ዋꬋ፤ ኦይዱ ማራን ኤቂዳ ዚጋ ቱሳቲ ቱቂ ኦይኪዳ ዚጋፔ ኦሴቲዳ ዞንጋልꬃቲ*ዞንጋልꬅ፡ ዞንጋልꬅ ጊዛይሳ ኢሲ ኢሲ ባጋ ጋሞꬆ ቃላን ጻርባ ጌቴቴስ። ዴቴስ። 3 ቱሳቲ ቶኪ ኦይኪዛ ጌዴ ዎꬊዛ ሚꬃቲ ዴቴስ፤ ኢሲ ማራ ቦላ 15 ዞንጋልꬃቲ ዴቴስ፤ ሄይቲ ኢሲ ቦላ ኦይዱ ታማኔ ኢቻሻ። ሄ ዞንጋልꬃታፔ ቦላራ ካራ ካሚዛ ዚጋ ሳንቃቲ ዴቴስ። 4 ሄ ኬꬃ ማስኮቴቲ ሄꬑ ማራን ꬎቁ ጊ ኦሴቲዳ፤ ኢስቲ ኢሶይ ኢሳራ ጊናን ዴቴስ። 5 ፔንጌታሲኔ ማስኮቴታስ ኦይዱ ዞዜራ ዲዛ ቆሲላꬃቲ ዴቴስ፤ ማስኮቴቲ ሄꬑ ማራን ኦሴቲዳ፤ ኢስቲ ኢሶይ ኢሳራ ጊናን ዴቴስ።

6 ሶሎሞኔይ ዳሮ ቱሳታራ ዲዛ ኬꬄ ጌቴቲዛ ኬꬅ ኬጺዴስ፤ ሄ ኬꬃስ ኣዱሳቴꬃይ 50 ዋꬋ፥ ጎምፓይ 30 ዋꬋ፤ ሲንꬃ ባጋራ ቱሳን ኡቲዳ ካራይ ዲዛ ኣሲ ሲሜሬቲዛ ዳራንቻይ ዴስ። 7 ቃሴ ኢዚ ፒርዳ ፒርዳናስ ኡቲዛ ሺሎታ ኬꬅ ኬጺዴስ፤ ሄ ኬꬃይ ዉይጌፔ ቢዲ ካራ ጋካናስ ዚጋ ሳንቃን ጎርዴቲዴስ። 8 ፒርዳ ኬꬃፌ ጉዬ ባጋራ ዲዛ ዛጎን ካዎቴꬃ ኬꬃ ባስ ዳናሶ ሃንኮ ኬꬃ ማላ ኦꬂ ኬጺዴስ፤ ሶሎሞኔይ ባ ማቾ ፓሮኔ ናዪስ ሄሳ ማላ ካዎቴꬃ ኬꬅ ኬጺ ኢሚዴስ። 1ካዎ 3፡1

9 ሄ ኬꬃቲ ኡባይ ካሬፔ ቢዲ ጊታ ዛጎዛ ጋካናስ፥ ዮቻፌ ቢዲ ካራ ጋካናስ ጊናን ጊናን ቃንጼቲ ማሴቲዳ ሹቻታን ኬጼቲዳ። 10 ዮቻዚካ ዎꬊዳይ 10 ዋꬋኒኔ 8 ዋꬋን ሎኢ ማሴቲዳ ጊታ ሹቻታና። 11 ኢዛፔ ቦላ ባጋራ ሚጼን ሚጼን ማሴቲዳ ሎኦ ሹቻቲኔ ዚጋ ሳንቃቲ ዴቴስ። 12 ጾሳ ኬꬃ ዉይጌይ ያኔ ሃ ሲሜሬቲዛ ዳራንቻራ ጉጂን ጊታ ዛጎዛ ማላ ሎኢ ማሴቲዳ ሄꬑ ዩሾ ሹቻን፥ ኢሲ ዩሾ ዚጋ ሳንቃን ጊምቤቲዴስ።

13 ካዎ ሶሎሞኔይ ኪቲዲ ኪራሜ ጌቴቲዛ ኣስ ጺሮሴ ካታማፔ ኤሂሲዴስ። 14 ኒፍታሌሜ ቆሞፌ ጊዲዳ ኪራሜ ኣያ ኣምኦ፤ ኢዛ ኣዋይ ጺሮሴ ኣሳ፤ ጻርቂማላ ኦሶንካ ኤሬቲዳ ሂላንቻ፤ ኪራሜይ ጻርቂማላ ቆጺዛ ሂላቴꬂ ዲዛ ኣሳ፤ ኢዚ ጻርቂማላፔ ቆጺዲ ኬሲዛ ኦሶ ኡባን ኣኬካን፥ ኤራቴꬃኒኔ ሂላቴꬃን ኬሂ ሎሂዳ ኣሳ፤ ኢዚካ ካዎ ሶሎሞኔኮ ዪዲ ባስ ኢሜቲዳ ኦሶ ኡባ ኦꬂዴስ።

15 ኪራሜይ ኢሲ ኢሲ ጌሳይ 18 ዋꬋ፥ ዩዪ ኣꬋናስ ኦርዴቴꬃይ 12 ዋꬋ ጊዲዳ ናምኡ ጻርቂማላ ቱሳታ ኦꬂዴስ። 16 ሄሳꬆካ ቱሳታ ጼራን ዎꬃናስ ናምኡ ቁስቴታ ጻርቂማላፔ ሴሪሲዲ ኦꬂዴስ፤ ኢሲ ኢሲ ቁስቴይ ኢቻሽ ዋꬋ ኣዱቄስ። 17 ቱሳ ሁኤን ዲዛ ቁስቴታስ ኣሌቆ ጊዳና ማላ ኢሲ ቁስቴስ ጊቴ ሚሳቲዛ ላፑን ሳንሳላታ ኦꬂዴስ። 18 ቱሳታ ቦላ ዲዛ ቁስቴታ ኣሌቂሳናስ ኢሲ ኢሲ ጊቴ ሳንሳላታ ዩሾን ናምኡ ማራን ኦሮማኔታ ኦሲሲዴስ፤ ናምኡ ቁስቴታስካ ሄሳꬆ ኦꬂዴስ። 19 ዳራንቻን ኤቂዳ ቱሳታ ሁኤን ዲዛ ቁስቴታ ኣዱሳቴꬃይ 4 ዋꬋ፤ ኢስታ ቦላ ሱፌ ጪሽ ሚሳቲዛ ጪሺ ዴስ። 20 ናምኡ ቱሳታ ሁኤ ቦላ ዲዛ ጊቴ ሳንሳላታታፔ ካሊዲ ዲዛ ኤꬖይ ኡቲዳሶሆፔ ቦላ ባጋራ 200 ኦሮማኔ ቴራ ሚስሌቲ ናምኡ ማራን ዩዪ ኣꬊ ዴቴስ። 21 ኪራሜይ ሄ ናምኡ ቱሳታ ሄ ሃ ሲሜሬቲዛሶን ጾሳ ኬꬃ ዳራንቻን ኤሲዴስ፤ ዱጌሃ ባጋራ ኤሲዳ ቱሳ ያኪኔ †ያኪኔ፡ ያኪኔ ጉሲ ኢብራዌታ ቃላራ ጾሳይ ኤሴስ ጉሳ። ፥ ፑዴሃ ባጋራ ኤሲዳይሳ ቦኤዜ ‡ቦኤዜ ጉሲ ኢብራዌታ ቃላራ ጾሳ ዎልቃን ጉሳ። ጊ ሱንꬂዴስ። 22 ቱሳታ ሁኤን ዲዛ ቁስቴቲ ሱፌ ጪሽ ሚሳቴቴስ፤ ሄሳ ማላን ቱሳታ ኦሶይ ፖሌቲዴስ።

23 ኪራሜይ ኢዛስ ሜꬋይ ኤꬖ ማላ ጊታ ጋባቴ ጻርቂማላፔ ሴሪሲ ሜꬊዴስ፤ ሄ ጊታ ጋባቴዛ ዶናይ ሃ ጋጻፔ ያ ጋጻ ጋካናስ 10 ዋꬋ፤ ጌሳይ 5 ዋꬋ፤ ዩዪ ኣꬋናስ ቃሴ 30 ዋꬋ። 24 ጊታ ጎንጌዛ ዶናን ካሬ ባጋራ ዚቂ ጊዲ ኢዛራ ኦይኬቲ ሜꬌቲዳ ጎሴ ሚስሌቲ ዴቴስ፤ ሄ ሚስሌቲ ናምኡ ማራን ኢሲ ኢሲ ዋꬋን ታማይ ታማይ ዩዪ ኣꬋናስ ሹዬቲዴስ።

25 ሄ ጊታ ጋባቴይ ጻርቂማላፔ ሜꬌቲዳ 12 ቦራ ሚስሌታ ዞኮን ኡቲዴስ፤ ቦራታ ሚስሌታፔ ሄꬓቲ ፑዴሃ ባጋ፥ ሄꬓቲ ኣርሼይ ዉሊዛ ባጋ፥ ሄꬓቲ ዱጌሃ ባጋ፥ ሄꬓቲ ቃሴ ኣርሼይ ሞኪዛ ባጋ ሲሚ ኡቲዳ፤ ጊታ ጋባቴዚ ኢስታ ቦላ ኡቲዴስ፤ ኢስታስ ጉዬ ባጋይ ጊዶ ሲሚ ኡቲዴስ። 26 ሄ ጊታ ጎንጌዛስ ኦርዴቴꬃይ ኩሼ ቃኣ ሊኬ፤ ኢዛ ዶናይ ጪሻ ሚሳቲዲ ዋንጫ ሚሳቴስ፤ ሄ ጊታ ጋባቴዚ 40,000 ሊቲሮ ጊዲዛ ሃꬅ ኦይኬስ።

27 ኪራሜይ ቃሴ ዱማ ዱማ ሚሻታ ዎꬂዛ ታሙ ጋሬታ ጻርቂማላፔ ሜꬊዴስ፤ ሄ ጋሬታስ ኢሳስ ኢሳስ ኣዱሳቴꬃይ 4 ዋꬋ፥ ጎምፓይ 4 ዋꬋ፥ ጌሳይ 3 ዋꬋ። 28 ሄ ጋሬቲ ሄሳꬆ ኦሴቲዳ፤ ፑዴ ኤቂዳ ኦይዱ ቢራታታ ቦላ ፒዲ ጊዳ ሎቻ ጻርቂማላቲ ኦይኬቲ ኡቲዳ። 29 ሄ ጻርቂማላታ ቦላ ጋሞታ፥ ቦራታኔ ኪሩቤታ ሚሳቲሲዲ ሜꬊዳ ሚስሌቲ ዴቴስ፤ ጋሞታ ሚስሌታፔኔ ቦራታ ሚስሌታፔ ቦላ ባጋራኔ ጋርሳ ባጋራ ቆጼቲ ጊጊዳ ጪሻ ኤንጩርሳ ሚስሌቲ ዴቴስ። 30 ሚሻታ ኢስታ ቦላ ዎꬂዛ ጻርቂማላፔ ኦሴቲዳ ኦይዱ ጋሬቲ ዴቴስ፤ ሄ ጋሬቲ ጌንዴራና ማላ ኦይኪዳ ማርጮቲ ዴቴስ፤ ሄሳꬆካ ኦይዱ ባጋራ ሜቻ ጎንጌይ ኢስታ ቦላ ኡቲዛ ጻርቂማላፔ ኦሴቲዳ ጪሻ ኤንጩርሳታን ኣሌቄቲ ኡቲዳ። 31 ሜቻ ጎንጌዛ ቆꬌ ጌሳይ ኢሲ ታꬋኮ፤ ቃሴ ጎንጌዛ ጌሳይ ኢሲ ዋꬋ ማላ፤ ኢዚካ ኤꬖ ማላ፤ ጎንጌዛ ቆꬌይ ሚስሌታን ኣሌቄቲ ኡቲዴስ፤ ኢዛ ቶኪ ኦይኪዳ ኦይዱ ጉላይ ዴስ ኣቲን ኤꬖ ዴና። 32 ኦይዱ ጋሬታስ ኢሳስ ኢሳስ ጌሳይ ኢሲ ዋꬋኔ ባጋ፤ ሄ ጋሬቲ ሎቻ ጻርቂማላፔ ጋርሳ ባጋራ ዴቴስ፤ ጋሬቲ ኢስታ ቦላ ሚሼ ዎꬂዛሶታራ ኢሲፌ ማርጮን ኦይኬቲ ኡቲዳ። 33 ጋሬቲ ኦላ ፓራ-ጋሬ ሚሳቴቴስ፤ ጋሬታ ኢሲ ቦላ ጋꬂ ዋጺዛ ማርጮቲ፥ ቻርኬቲኔ ታጎቲ ኡባይካ ጻርቂማላፔ ኦሴቲዳ። 34 ሄ ጋሬታ ኡባ ዞዜታስካ ኢስታ ቶሆሶራ ቶሆሶራ ኢስታራ ኢሲኖ ጊዲ ኦይኬቲዲ ጻርቂማላፔ ሜꬌቲዳ ዜምፖቲ ዴቴስ። 35 ኢሲ ኢሲ ጋሬዛ ሁኤ ዩሾን ኢዛስ ጌሳይ ኢሲ ዋꬋስ ባጋ ፒሬሜይ ዴስ፤ ዜምፖቲኔ ሎቻ ጻርቂማላቲ ጋሬዛራ ኦይኬቲ ኢሲኖ ጊዲ ኦሴቲዳ። 36 ሃ ዜምፖታፔኔ ሎቻ ጻርቂማላታፔ ጊዶን ዲዛ ሃንኮ ኣቲዳ ሶሆቲ ኡባይ ኪሩቤታን፥ ጋሞታኒኔ ዛምባታ ሚስሌታን ኣሌቄቲ ኡቲዳ፤ ቃሴ ኢስታ ዩሾይ ጪሻ ኤንጩርሳ ሚስሌን ኣሌቄቲ ኡቲዴስ። 37 ታሙ ጋሬቲካ ሄሳꬆ ኦሴቲዳ፤ ኢስቲ ሴሪዲ ሜꬌቲዳ ሚሻይ ኢሲኖ ጊዲዳ ጊሻስ ኢስታ ጌሳይኔ ሜꬋይ ኢሲ ማላ።

38 ኪራሜይ ታሙ ሜቻ ጎንጌታ ጻርቂማላፔ ሜꬊዴስ፤ ኢሲ ኢሲ ጎንጌ ጎምፓይ 4 ዋꬋ ጊዲዲ፥ 880 ሊቲሮ ሃꬅ ኦይኬስ፤ 10 ጋሬታስ ሁኤን ሁኤን ኢሲ ኢሲ ሜቻ ጎንጌይ ዴስ። ኬሳ 30፡17-21 39 ኪራሜይ ኢቻሽ ጋሬታ ጾሳ ኬꬃስ ፑዴሃ ባጋራ፥ ኢቻሻታ ቃሴ ጾሳ ኬꬃስ ዱጌሃ ባጋራ ዎꬂዴስ፤ ቃሴ ጻርቂማላፔ ኦሴቲዳ ጊታ ጋባቴዛ ጾሳ ኬꬃፌ ዱጌሃ ባጋራ ኣርሼይ ሞኪዛ ባጋራ ጉላ ቦላ ኤሲዴስ።

40 ቃሴ ኪራሜይ ጻሮታ፥ ቃጴታኔ ዲስቴታ ሜꬊዴስ፤ ሂስቲዲ ካዎ ሶሎሞኔስ ጎዳ ኬꬃ ኦሶታ ሃይሳፌ ካሊዛይሳ ማላ ኦꬂ ፖሊዴስ። 41 ሄይቲካ ናምኡ ቱሳታ፤

ኪራሜይ ካዎ ሶሎሞኔይ ጎዳ ኬꬃ ኦሶስ ጎኤታና ማላ ሃ ሚሻታ ኡባ ቁጬቲዲ ጾልቂዛ ጻርቂማላፔ ኦꬂዴስ። 46 ካዎ ሶሎሞኔይ ሱኮቴፔኔ ጳርታኔፔ ጊዶን ዮርዳኖሴ ዴምባን ዴኢዛ ጻርቂማላ ሴሪሲዛሶን ሃይታ ኡባ ኦሲሲዴስ። 47 ጻርቂማላፔ ሜꬌቲዳ ሃ ሚሻይ ኡባይ ኬሂ ዳሮ ጊዲዳ ጊሻስ ሶሎሞኔይ ኢዛ ሜዛኒሲቤና፤ ሄሳ ጊሻስ ሃ ሜꬌቲዳ ሚሻቲ ኣይ ኬና ዴጾኮ ኤሬቲቤና።

48 ቃሴካ ሶሎሞኔይ ጎዳ ኬꬃ ጊዶን ጎኤታና ማላ ኦሲሲዳ ሚሻቲ ኡባይ ሃይሳፌ ካሊዛይታ። ዎርቃፌ ኦሴቲዳ ያርሾ ያርሺዛሶ፥ ጎዳ ሲንꬃን ዎꬂዛ ኡኬꬃቲ ኡቲዛ ዎርቃ ጻራጴዛ፥ ኬሳ 25፡23-30፤ 30፡1-3 49 ኡባፌ ዱማቲዳ ጊዶ ቆልኣፌ ሲንꬃን ኢቻሻቲ፥ ኡሻቻ ባጋራ ኢቻሻቲ፥ ሃዲርሳ ባጋራ ኤቂዳ ዎርቃፌ ኦሴቲዳ ጾምፔ ዎꬂዛ ባላታ፥ ጪሻታ፥ ጾምፔታኔ ቃጴታ፥ ኬሳ 25፡31-40 50 ጹኣታ፥ ጾምፔ ቶይሲዪዛይታ፥ ጻሮታ፥ ኤጻኔ ኢስታ ቦላ ጩዋሲዛይታ፥ ታማ ኤኪዛ ሚሻታኔ፥ ኡባፌ ዱማቲዳ ጊዶ ቆልኣ ፔንጌታሲኔ ጾሳ ኬꬃ ፔንጌታስ ጊዲዛ ማጻፋታ። ሃ ሚሻቲ ኡባይ ዎርቃፌ ኦሴቲዳ።

51 ካዎ ሶሎሞኔይ ጎዳ ኬꬃ ኦሶ ኡባ ፖሊዳፔ ጉዬ ኢዛ ኣዋ ዳዊቲ ጎዳስ ዱማሲ ዎꬂዳ ቢራ፥ ዎርቃኔ ሃራ ሚሻታካ ኡባ ኤሂዲ ጾሳ ኬꬃ ሚሽ ሚንጂዛሶን ዎꬂዴስ።2ሳሜ 8፡11፤ 1ታሪ 18፡11