14
ኣካያይ ኢዮርባኣሜ ቦላ ዮቲዳ ቲንቢቴ
1 ሄ ዎዴ ኢዮርባኣሜ ና ኣቢያይ ሃርጊዴስ። 2 ሂስቲን ኢዮርባኣሜይ ባ ኬꬃዮ፥ «ዴንዳ፤ ዴንዳዳ ኔኒ ኢዮርባኣሜ ኬꬃዮ ጊዲዳይሳ ኦኒኔ ኤሮንታ ማላ፥ ኔ ማይኦ ላማ፤ ሂስታዳ ሴሎ ባ። ታኒ ሃ ኣሳ ቦላ ካዎታናይሳ ታስ ዮቲዳ ናቤ ኣካያይ ሄን ዴስ። 3 ታሙ ኡኬꬅ፥ ጉꬃ ዳቦኔ ኢሲ ኦቶ ኤስ ኤካዳ ኢዛኮ ባ፤ ኢዚ ናዛ ቦላ ጋካናይሳ ኔስ ዮታና» ጊዴስ።
4 ኢዮርባኣሜ ኬꬃያ ኢዚ ጊዳ ማላ ኦꬃዱስ፤ ዴንዳዳ ኣካያ ሶ ሴሎ ባዱስ። ኣካያይ ጪሚዳ ጊሻስ ኢዛ ኣይፌይ ዶልጁሚዲ ዴሜና። 5 ጊዶ ኣቲን ጎዳይ ኣካያስ፥ «ኢዮርባኣሜ ኬꬃ ኣዬያ ሃርጊዛ ባ ናዛ ጊሻስ ኔና ኦይቻናስ ሃራ ማጫስ ሚሳታዳ ኔኮ ያና፤ ኔኒ ኢዚስ ሃይሳ ሃይሳ ጋዳ ዮታ» ጊዴስ።
6 ሄሳ ጊሻስ ኣካያይ ማጫሳያ ፔንጌ ጌሊሺን ሲዪዲ፥ «ኢዮርባኣሜ ኬꬃ ኣዬ! ኣኔ ሃ ጌላ። ኣይስ ሃራ ኣስ ሚሳታዲ? ታኒ ኢታ ዮኦ ኔስ ዮታናስ ኪቴታዲስ። 7 ኔኒ ኢዮርባኣሜኮ ባዳ ጎዳ ኢስራኤሌ ጾሳይ ኔና፥ ‹ታኒ ኔና ኣሳ ጊዶፌ ዴንꬃዳ ታ ዴሬ ኢስራኤሌ ቦላ ካዎꬃዲስ። 8 ታኒ ዳዊቴ ዛሬፔ ካዎቴꬃ ዎꬃ ኤካዳ ኔስ ኢማዲስ፤ ጊዶ ኣቲን ኔኒ ታ ኣሽካራ ዳዊቴ ማላ ጊዳካ፤ ኢዚ ታ ኣዛዞ ናጊዴሲኔ ታ ሲንꬃን ሱሬ ሚሽ ጻላ ኦꬂሼ ባ ኩሜꬃ ዎዚናን ታና ካሊዴስ። 9 ኔፔ ካሴ ሲንꬃን ዲዛይቲ ኡባይ ኦꬂዳ ኢታፔ ኣꬊዛ ኢታ ኔኒ ኦꬃዳሳ፤ ኔኒ ኔስ ቢራታፔ ሴሪሳዳ ኤቃ ጾሳታ ሜꬋዳሳ። ታ ሃንቆ ዴንꬄꬃዳሳ፤ ሂስታዳ ታና ጉዬ ኦላዳሳ።
10 « ‹ሄሳ ጋሶን ታኒ ኢዮርባኣሜ ኬꬃ ኣሳ ቦላ ꬋዮ ኤሃና። ኢስራኤሌ ቢታን ኢዮርባኣሜ ኬꬃ ኣሳፔ ኣይሌ ጊዲን ዎይኮ ጎቃ ጊዲን፥ ኣቱማስ ኡባ ꬋይሳና፤ ታኒ ኢዮርባኣሜ ኬꬃ ኣሳ ኬፌይ ቢዲንꬅ ኬዛና ጋካናስ ጹጊዛ ማላ ጹጋና። 1ካዎ 15፡29 11 ኢዮርባኣሜ ዛሬፔ ካታማን ሃይቂዳይታ ካናይ ማና፤ ጋጻሬን ሃይቂዳይታ ካፎይ ማና፤ ሃይሳ ዮቲዳይ ታና ጎዳ!› ጊዴስ።
12 «ኔኒ ጊዲኮ ሃኢ ዴንዳዳ ኔሶ ባ። ኔኒ ካታማ ጋኪዳ ማላ ናዚ ሃይቃና። 13 ኢስራኤሌ ኡባይ ናዛስ ዬኪዲ ሞጋና፤ ጎዳ ኢስራኤሌ ጾሳ ሲንꬃን ኢዮርባኣሜ ኬꬃ ኣሳፔ ሃ ናዛ ቦላ ጻላ ሎኦ ሚሺ ቤቲዳ ጊሻስ ዎጋን ሞጌታናይ ኢዛ ጻላ።
14 «ሄሳፌ ጉዬ ኢዮርባኣሜ ኬꬃ ኣሳ ꬋይሲዛ ካዎ፥ ጎዳይ ባስ ኢስራኤሌ ቦላ ዴንꬃና፤ ሄሲካ ሃኢ ሃናና። 15 ሃꬃ ጊዶን ቃጺዛ ማቃ ማላ ጎዳይ ሄ ዎዴ ኢስራኤሌታ ሾጪዲ ቃꬃና። ኣሼሮ ጌቴቲዛ ኤቃ ጾሳይ ሚስሌ ኤሲዲ ጎዳ ሃንቄꬂዳ ጊሻስ ኢስታ ኣዋታስ ኢዚ ኢሚዳ ሎኦ ቢታፌ ኢስታ ዲጋና፤ ሂስቲዲ ኢስታ ኤፊራጺሴ ሻፋፔ ሄ ፒንꬃን ላላና። 16 ኢዮርባኣሜይ ኦꬂዳ ናጋራ ጋሶኒኔ ኢስራኤሌ ኣሳ ኢዚ ኦሲሲዳ ናጋራ ጊሻስ ጎዳይ ኢስራኤሌ ዬጊ ኣጋና» ጊዴስ።
17 ሄሳፌ ጉዬ ኢዮርባኣሜ ኬꬃ ኣያ ዴንዳ ባዳ ቲርጻን ባ ኬꬃ ፔንጌ ጋኪዳ ማላ ናዚ ሃይቂዴስ። 18 ናቤ ኣካያ ባጋራ ጎዳይ ዮቲዳ ማላ ኢስራኤሌ ኣሳይ ኡባይ ኢዛስ ዬኪዲ ሞጊዴስ።
ኢዮርባኣሜ ሃይቆ
19 ኣቲዳ ኢዮርባኣሜ ታሪኬይ፥ ኢዚ ኦꬂዳ ኦሶቲ፥ ኢዚ ኦሌቲዳ ኦላቲኔ ኢዚ ኣይሲዳ ኣይሶ ዎጋቲ ኢስራኤሌ ካዎታ ታሪኬ ማጻፋን ጻፌቲ ኡቲዳ። 20 ኢዮርባኣሜይ 22 ላይꬅ ካዎቲዴስ፤ ሄሳፌ ጉዬ ሃይቂዲ ባ ኣዋታን ጋይቲዴስ። ኢዛሶሆን ኢዛ ና ናዳቤይ ካዎቲዴስ።
ዩሁዳ ካዎ ኤሮቢኣሜ
(2ታሪ 11፡5—12፡15)
21 ሶሎሞኔ ና ኤሮቢኣሜይ ዩሁዳን ካዎቲዴስ፤ ኤሮቢኣሜይ ካዎቲዛ ዎዴ ኢዛስ ላይꬃይ 41። ጎዳይ ባ ሱንꬃይ ጼይጌታና ማላ ኢስራኤሌ ቆሞታ ካታማታ ኡባ ጊዶፌ ዶሪዳ ዬሩሳላሜ ካታማን ኤሮቢኣሜይ 17 ላይꬅ ካዎቲዴስ። ኢዛስ ኣዬይ ሱንꬂ ናኢሞ፤ ኢዛካ ኣሞኔ ቢታ ኣሳ። 22 ዩሁዳ ኣሳቲ ጎዳ ሲንꬃን ኢታ ሚሽ ኦꬂዳ፤ ባንቲ ኦꬂዳ ናጋራን ኢስቲ ባንታ ኣዋታፔ ኣꬂዲ ጎዳፔ ዴጾ ሃንቆ ባ ቦላ ዴንꬄꬂዳ። 23 ቃሴካ ኢስቲ ባንታስ ጎይኒዛ ꬎቃሶሆታ፥ ኤቃ ሹቻታኔ ኣሼሮ ጌቴቲዛ ጾሳይ ሚስሌታ ዙምቡላታ ቦላኔ ጊታ ሚꬃታ ጋርሳን ኤሲዳ። 2ካዎ 17፡9-10 24 ሃራይ ኣቲን ኢስቲ ጎይኒዛሶሆታን ጎይኖ ዎጋ ኦꬂዲ ፓራ ላይማቴꬃ ዎጋታ ፖሊዛ ኣሳቲ ዴቴስ። ጎዳይ ኢስራኤሌታ ሲንꬃፌ ኬሲ ዬዴꬂዳ ካዎቴꬃቲ ሜዜቲዳ ማላ ሃራሲዛ ኦሶታ ኡባ ኢስራኤሌ ኣሳቲ ኦꬂዳ።ዛሬ 23፡17
25 ኤሮቢኣሜይ ካዎቲዳ ኢቻሻንꬆ ላይꬃን ጊብጼ ካዎ ሺሻቂ ዬሩሳላሜ ካታማ ቦላ ዎራጂዴስ። 26 ሂስቲዲ ጾሳ ኬꬃኒኔ ካዎ ኬꬃን ዲዛ ቡቁራ፥ ሶሎሞኔይ ቆጺሲዳ ዎርቃ ጎንዳሌታራ ኡባ ቦንቂ ኤኪዲ ቢዴስ። 1ካዎ 10፡16-17፤ 2ታሪ 9፡15-16 27 ካዎ ኤሮቢኣሜይ ሄ ጎንዳሌታ ጊሻስ ጻርቂማላፔ ጎንዳሌታ ኦሲሲዲ ኢስታ ናጊዲ ዎꬃና ማላ ካዎ ኬꬃ ናጊዛ ዛቤታ ሃላቃታስ ኢሚዴስ። 28 ካዎዚ ጾሳ ኬꬅ ቢዛ ዎዴ ኡባን ናጊዛይቲ ጎንዳሌታ ኦይኬቴስ፤ ሄፔ ሲሚዲ ኢስታ ዛቤታ ሃላቃ ኬꬃን ዛሪ ዎꬄቴስ።
29 ኤሮቢኣሜይ ኣይሲዳ ኣይሶ ዎጋቲኔ ኢዚ ኦꬂዳ ኡባ ኦሶቲ ዩሁዳ ካዎታ ታሪኬ ማጻፋን ጻፌቲ ኡቲዳ። 30 ኤሮቢኣሜይኔ ኢዮርባኣሜይ ባ ዎዴ ኡባን ባ ጊዶን ኦሌቲሼ ዴኢዳ። 31 ኤሮቢኣሜይ ሃይቂዲ ባ ኣዋታን ጋይቲዴስ፤ ኢዚ ዳዊቴ ካታማን ዲዛ ባ ኣዋታ ዱፎን ሞጌቲዴስ። ኢዛ ኣዬይ ሱንꬂ ናኢሞ፤ ኢዛካ ኣሞኔ ቢታ ኣሳ። ኤሮቢኣሜ ሶሆን ኢዚ ና ኣቢያይ ካዎቲዴስ።