15
ዩሁዳ ካዎ ኣቢያ
(2ታሪ 13፡1—14፡1)
1 ናባጼ ና ኢዮርባኣሜይ ካዎቲዳ ታማኔ ኦስፑንꬃ ላይꬃን ኣቢያይ ዩሁዳን ካዎቲዴስ። 2 ኣቢያይ ዬሩሳላሜን ሄꬑ ላይꬅ ካዎቲዴስ፤ ኢዛ ኣዬያ ኣቤሴሎሜ ቦሎቶ፤ ኢዚ ሱንꬃይካ ማኢኮ። 3 ኢዚ ካሴ ኢዛ ኣዋይ ኦꬂዳ ናጋራ ኡባ ኦꬂዴስ፤ ኢዛ ዎዚናይ ኢዛ ማይዛ ዳዊቴ ዎዚናይ ኩሜꬅ ኣማኔቲዳ ማላ ጎዳ ባ ጾሳስ ኩሜꬅ ኣማኔቲቤና። 4 ጊዲኮካ ኢዛፔ ጉዬ ዬሩሳላሜን ካዎታና ማላኔ ዬሩሳላሜ ሳሮቴꬃ ናጋና ማላ ጎዳ ኢዛ ጾሳይ ዳዊቴ ጊሻስ ኣቢያስ ኢሲ ኣቱማ ና ኢሚዴስ። 1ካዎ 11፡36 5 ጎዳይ ሄሳ ኦꬂዳይ ዳዊቲ ሂቴ ኣስ ኦሪዮ ቦላ ኦꬂዳ ናጋራይፔ ኣቲን ጎዳ ሲንꬃን ሱሬ ሚሽ ኦꬂዴስ፤ ባ ዴኦ ላይꬅ ኡባን ጎዳ ኣዛዞታፔ ካሬ ኬዚቤና። 2ሳሜ 11፡1-27 6 ኣቢያይ ካዎቲዳ ላይꬅ ኡባን ኣቢያ ኣሳራኔ ኤሮቢኣሜ ኣሳራ ባንታ ጊዶን ኦሌቲሼ ዴኢዳ።
7 ኣቢያይ ኦꬂዳ ሃራ ሚሻቲ ኡባይ ዩሁዳ ካዎታ ታሪኬ ማጻፋን ጻፌቲ ኡቲዳ። ኣቢያይኔ ኢዮርባኣሜይ ባንታ ጊዶን ኦሌቲሼ ዴኢዳ። 8 ኣቢያይ ሃይቂዲ ባ ኣዋታን ጋይቲዴስ፤ ኢዚ ዳዊቴ ካታማን ሞጌቲዴስ። ኢዛ ሶሆንካ ኢዛ ና ኣሲ ካዎቲዴስ።
ዩሁዳ ካዎ ኣሳ
(2ታሪ 15፡16—16፡6)
9 ኢስራኤሌ ካዎ ኢዮርባኣሜይ ካዎቲዳ ናምኡ ታማንꬃ ላይꬃን ኣሲ ዩሁዳን ካዎቲዴስ። 10 ኣሲ ዬሩሳላሜን 41 ላይꬅ ካዎቲዴስ፤ ኢዛ ኣዋ ኣያ ኣቤሴሎሜ ቢዮ ማኢኮ።
11 ኣሲ ባ ማካኩሌ ዳዊቲ ኦꬂዳ ማላ ጎዳ ሲንꬃን ሱሬ ሚሽ ኦꬂዴስ። 12 ጎይኖ ዎጋ ፖላናስ ፓራ ላይማ ላይማቲዛይታ ኣሲ ባ ቢታፌ ꬋይሲዴስ፤ ኢዛፔ ካሴ ዴኢዳ ካዎቲ ኦꬂዳ ኤቃ ጾሳ ሚስሌታ ኡባ ꬎቃሌሬꬂ ዬጊዴስ። 13 ኢዛ ኣዋ ኣያ ማኢካ ኣሼሮ ጌቴቲዛ ሃራሲዛ ኤቃ ሚስሌ ሜꬊዳ ጊሻስ ጎዳቴይንታ ጌቴቲዛ ቦንቾፌ ኢዞ ዲጊዴስ። ኣሲ ሄ ኤቃ ሚስሌዛ ቃንጼሬꬂዲ ቄዲሮኔ ዙሌን ጹጊዴስ። 14 ኣሲ ዙምቡላታ ቦላ ጎይኒዛሶሆታ ኡባ ꬋይሶንታ ኣጊኮካ ኢዚ ባ ዴኢዳ ላይꬅ ኡባን ጾሳስ ዎዚናፔ ኣማኔቲዛ ኣስ ጊዲ ዴኢዴስ። 15 ኢዚኔ ኢዛ ኣዋይ ጾሳስ ዱማሲ ዎꬂዳ ቢራ፥ ዎርቃኔ ሃራ ሚሻታ ኤሂዲ ጎዳ ጾሳ ኬꬃ ጊዶን ዎꬂዴስ።
16 ዩሁዳ ካዎ ኣሲኔ ኢስራኤሌ ካዎ ባሼይ ባንታ ዴኦ ላይꬅ ኡባን ኦሌቲሼ ዴኢዳ። 17 ኢስራኤሌ ካዎ ባሼይ ዩሁዳ ቦላ ዎራጂዲ ዩሁዳ ካዎ ኣሳ ቢታ ጌሎንታ ማላኔ ኬኦንታ ማላ ቴቃናስ ኤራማ ካታማ ዩዪ ኣꬋናስ ሚጻ ሂስቲ ጊምቢዴስ።
18 ሄሳ ጋሶን ካዎ ኣሲ ጎዳ ጾሳ ኬꬃኒኔ ባ ካዎቴꬃ ኬꬃን ኣቲዳ ዎርቃኔ ቢራ ኡባ ኬሲዲ ባ ኦሳንቻታ ኩሼን ዎꬂዴስ። ሂስቲዲ ሄዚዮናሳ ና ጻብሪሞና ናዛስ ዳማስቆ ካታማን ዴኢዛ ኣራሜ ካዎ ቤኒ-ሃዳዴስ ኢሞታ ሂስቲ ዬዲዴስ። 19 ሂስቲዲ ኢዛስ፥ «ካሴ ታ ኣዋሲኔ ኔ ኣዋስ ኢስታ ጊዶን ጫቆ ቃላይ ዲዛ ማላ ሃኢ ታ ጊዶኒኔ ኔ ጊዶንካ ጫቆ ቃላይ ዴኦ፤ ሄኮ ቢራኔ ዎርቃ ታኒ ኔስ ኢሞታ ኢማናስ ዬዳዲስ። ኢስራኤሌ ካዎ ባሼይ ባ ኦላንቻታ ታ ቢታፌ ኬሳና ማላ ኔኒ ካሴ ኢዛራ ጫቄቲዳ ጫቆ ቃላ ላላ» ጊዴስ።
20 ቤኒ-ሃዳዴይ ካዎ ኣሲ ጊዳ ቃላ ኤኪዲ ባ ኦላ ጋዳዋታ ኢስራኤሌ ካታማታ ኦላናስ ዬዲዴስ፤ ኢስቲ ኢዮኔ፥ ዳኔ፥ ኣቤሊ-ቤቲ-ማኢካ ጌቴቲዛ ካታማታ፥ ቃሴ ኒፍታሌሜኔ ጌንሴሬጼ ኡባ ኦሊ ኦይኪዴስ። 21 ካዎ ባሼይ ሄሳ ሲዪዲ ኤራማ ካታማ ጊምቢዛይሳ ኣጊዲ ቲርጻ ጌቴቲዛ ካታማ ጉዬ ሲሚዴስ።
22 ሄሳፌ ጉዬ ካዎ ኣሲ ዩሁዳን ዴኢዛ ኣሳይ ኡባይ ኣቶንታ ኬዛና ማላ ኣዋጂሲዴስ፤ ባሼይ ካሴ ሄን ጎኤቲዛ ሹቻኔ ሚꬃ ኤራማፔ ሚዪዳ። ካዎ ኣሲ ሚጺጳኒኔ ቢኒያሜ ቢታን ዴኢዛ ጌባ ኢዛን ሚንꬂ ጊምቢዴስ።
23 ኣሲ ሃኒዳ ሃኖታቲ፥ ኢዛ ሚኖቴꬅ ኡባይ፥ ኢዚ ኦꬂዳ ኦሶቲኔ ኢዚ ኤሲዳ ካታማቲ ዩሁዳ ካዎታ ታሪኬ ማጻፋን ጻፌቲ ኡቲዳ። ጊዶ ኣቲን ኢዚ ጪሚዳ ዎዴ ቶሆ ሳኬቲዴስ። 24 ኣሲ ሃይቂዲ ባ ኣዋታን ጋይቲዴስ፤ ባ ማካኩሌ ዳዊቴ ካታማንካ ሞጌቲዴስ። ኢዛ ና ኢዮሳፊጼይ ኢዛሶሆን ካዎቲዴስ።
ኢስራኤሌ ካዎ ናዳቤ
25 ዩሁዳ ካዎ ኣሲ ካዎቲዳ ናምኣንꬆ ላይꬅ ኢዮርባኣሜ ና ናዳቤይ ኢስራኤሌን ካዎቲዴስ፤ ኢዚ ኢስራኤሌ ቢታ ናምኡ ላይꬅ ሃሪዴስ። 26 ናዳቤይ ካሴ ባ ኣዋይ ናጋራ ኦꬂዳ ኢስራኤሌ ኣሳይ ናጋራ ኦꬃና ማላ ካሌꬂዴስ።
27 ሄ ዎዴ ናዳቤይኔ ኢዛ ኦላንቻቲ ፊሊስጼሜን ዲዛ ጋባቶኔ ካታማ ዶዲ ዲሺን ዪሳኮሬ ዛሬ ጊዲዳ ኣካያ ና ባሼይ ናዳቤ ቦላ ዴንዲዲ ኢዛ ዎꬊዴስ። 28 ዩሁዳ ካዎ ኣሲ ካዎቲዳ ሄꬓንꬆ ላይꬃን ባሼይ ናዳቤ ዎꬊዲ ኢዛሶሆን ካዎቲዴስ። 29 ባሼይ ካዎቲዳ ማላ ኢዮርባኣሜ ሶ ኣሳ ኡባ ዎꬊ ዉርሲዴስ፤ ጎዳይ ሴሎፔ ዪዳ ባ ኣሽካራ ናቤ ኣካያ ባጋራ ዮቲዳ ማላ ኢዮርባኣሜ ኬꬃ ኣሳይ ኡባይ ሃይቂ ዉሪዴስ። 1ካዎ 14፡10 30 ሄሲ ሃኒዳይ ኢዮርባኣሜይ ባ ሁኤን ኦꬂዳ ናጋራ ጊሻስ፥ ኢስራኤሌ ኣሳ ኢዚ ኦሲሲዳ ናጋራ ጊሻሲኔ ጎዳ ኢስራኤሌ ጾሳ ሃንቄꬂዳ ጊሻሳ።
31 ናዳቤይ ሃኒዳ ሃኖታቲኔ ኢዚ ኦꬂዳ ኦሶቲ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዳ። 32 ዩሁዳ ካዎ ኣሲኔ ኢስራኤሌ ካዎ ባሼይ ባንታ ላይꬅ ኡባን ኦሌቲሼ ዴኢዳ።
ኢስራኤሌ ካዎ ባሼ
33 ዩሁዳ ካዎ ኣሲ ካዎቲዳ ሄꬓንꬆ ላይꬃን ኣካያ ና ባሼይ ኢስራኤሌ ኣሳ ኡባ ቦላ ካዎቲዴስ፤ ኢዚ ቲርጻ ካታማን 24 ላይꬅ ካዎቲዴስ። 34 ኢዮርባኣሜይ ኢስራኤሌ ኣሳ ኦሲሲዳ ናጋራ ኦꬂዲኔ ኢዛ ኦጌን ሄሜቲዲ ባሼይ ጎዳ ሲንꬃን ኢታ ሚሽ ኦꬂዴስ።