1 ሃናኒያ ና ኢዩ ባጋራ ጎዳ ቃላይ ባሼ ቦላ ሂዝጊሼ ዪዴስ፤ 2 «ታኒ ኔና ጉዱላፌ ዴንꬃዳ ታ ዴራ ኢስራኤሌ ቦላ ካዎሳዲስ፤ ጊዶ ኣቲን ኔኒ ኢዮርባኣሜይ ቢዳ ኦጌራ ባዳ ታ ዴሬ ኢስራኤሌ ናጋራ ኦሲሳዳሳ፤ ሂስታዳ ታ ኢስታ ናጋራን ሃንቄታና ማላ ታና ዴንꬄꬃዳሳ። 3 ሄሳ ጊሻስ ታኒ ባሼኔ ኢዛ ኬꬃ ኣሳ ሙሌራ ꬋይሳና፤ ታኒ ኔ ኬꬃ ኣሳ ናባጼ ና ኢዮርባኣሜ ኬꬃ ኣሳ ማላ ኦꬃና። 4 ባሼ ዛሬ ካታማን ሃይቂዛ ኦናካ ካናይ ማና፤ ቃሴ ጋጻሬን ሃይቂዛ ኦናካ ካፎይ ማና» ጊዴስ።

5 ባሼይ ሃኒዳ ሃኖታይ፥ ኢዚ ኦꬂዳ ኦሶይኔ ኢዛ ሚኖቴꬃይ ኢስራኤሌ ካዎታ ታሪኬ ማጻፋን ጻፌቲ ኡቲዴስ። 6 ባሼይ ሃይቂዲ ባ ኣዋታን ጋይቲዴስ፤ ቲርጻ ካታማን ሞጌቲዴስ። ኢዛ ና ኤላይ ኢዛሶሆን ካዎቲዴስ። 7 ጎዳይ ሃናኒያ ና ናቤ ኢዩ ባጋራ ባሼ ቦላኔ ኢዛ ሶ ኣሳ ቦላ ቲንቢቴ ዮቲዳ ጋሶይካ ባሼይ ኦꬂዳ ናጋራ ጊሻስ፥ ኢዮርባኣሜይኔ ኢዛ ሶ ኣሳይ ኦꬂዳ ኢታ ኦሶ ማላ ጎዳ ሲንꬃን ኦꬂዳ ጊሻሲኔ ኢዮርባኣሜ ሶ ኣሳ ኡባ ዎꬊ ꬋይሲዳ ጊሻሳ።

8 ዩሁዳ ካዎ ኣሲ ካዎቲዳ 26 ላይꬃን ባሼ ና ኤላይ ኢስራኤሌን ካዎቲዴስ። ቲርጻ ካታማን ኢዚ ናምኡ ላይꬅ ካዎቲዴስ። 9 ካዎ ሹሜኔ ኢዛ ፓራ-ጋሬታፔ ባጋ ኣዛዚዛ ዚሚሬይ ካዎ ቦላ ማካላቴꬃን ዴንዲዴስ። ሄ ዎዴ ካዎ ኤሊ ቲርጻን ዲዛ ካዎ ኬꬃስ ሹሜ ጊዲ ዲዛ ኣርጻሶን ማꬆቲ ዴስ። 10 ዩሁዳ ካዎ ኣሲ ካዎቲዳ 27 ላይꬃን ዚሚሬይ ኣርጻሶ ጌሊዲ ካዎ ኤላ ዎꬊዲ ኢዛሶሆን ካዎቲዴስ።

11 ዚሚሬይ ካዎቲዲ ካዎቴꬃ ኣራታን ኡቲዳ ማላ ባሼ ሶ ኣሳ ኡባ ዎꬊዴስ። ባሼስ ዳቦ ጊዲን ዎይኮ ላጌ ጊዲን ኢሳዴካ ኣሺቤና። 12 ናቤ ኢዩ ባጋራ ጎዳይ ባሼ ቦላ ሃሳይዳ ቃላ ማላ ዚሚሬይ ባሼ ሶ ኣሳ ኡባ ዎꬊዴስ። 13 ሄሲ ሃኒዳይ ባሼይኔ ኢዛ ና ኤላይ ባንታ ኤቃ ጾሳስ ጎይኖን ኦꬂዳ ናጋራ ኡባ ጋሶኒኔ ኢስራኤሌ ኣሳ ኦሲሲዳ ናጋራ ጋሶን ጎዳ ኢስራኤሌ ጾሳ ሃንቄꬂዳ ጊሻሳ።

14 ኤላይ ሃኒዳ ሃራ ሃኖታቲኔ ኢዚ ኦꬂዳ ኦሶቲ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዴስ።

15 ዩሁዳ ካዎ ኣሲ ካዎቲዳ 27 ላይꬃን ዚሚሬይ ቲርጻን ላፑን ጋላስ ጻላ ካዎቲዴስ። ሄ ዎዴ ኢስራኤሌ ኦላንቻቲ ጋባቶኔ ጌቴቲዛ ፊሊስጼሜ ካታማ ዶዲዲ ኡቲዳ። 16 ሄን ዶዲ ኡቲዳ ኢስራኤሌቲ ዚሚሬይ ካዎዛ ቦላ ዴንዲዲ ኢዛ ዎꬊዳይሳ ሲዪዳ ማላ ኦላ ጋዳዋ ኦሚሬ ሄ ጋላሲካ ሄ ሶሆን ኢስራኤሌ ቦላ ካዎꬂዳ። 17 ኦሚሬይኔ ኢዛራ ዲዛ ኢስራኤሌ ኣሳይ ኡባይ ጋባቶኔ ካታማፔ ፑዴ ኬዚዲ ቲርጻ ካታማ ዶዲዳ። 18 ካታማዚ ኦይኬቲዳይሳ ቤኢዳ ማላ ዚሚሬይ ካዎ ኬꬃ ጊዶን ዲዛ ሚጻን ጌሊዲ ካዎ ኬꬃን ታማ ኦይꬂዲ ሄን ኢዛን ሃይቂዴስ። 19 ሄሲ ሃኒዳይ ኢዮርባኣሜይ ኦꬂዳ ናጋራኔ ኢስራኤሌ ኣሳ ኦሲሲዳ ናጋራ ካሊዲ ዚሚሬይ ጎዳ ሲንꬃን ኢታ ሚሽ ኦꬂዳ ጊሻሳ።

20 ዚሚሬይ ሃኒዳ ሃራ ሃኖቲኔ ኢዚ ኦꬂዳ ማካላ ኦሶይ ኡባይ ኢስራኤሌ ካዎታ ታሪኬ ማጻፋን ጻፌቲ ኡቲዴስ።

21 ሄ ዎዴ ኢስራኤሌ ኣሳይ ናምኡ ኬዚ ሻኬቲዴስ። ኣሳፔ ባጋይ ጊናቴ ና ቲቢኔ ካዎꬃና ኮዪን ባጋይ ቃሴ ኦሚሬ ካዎꬃናስ ኮዪዴስ። 22 ኦሚሬ ማዲዛ ኣሳይ ጊናቴ ና ቲቢኔ ማዲዛ ኣሳፔ ሚኒዴስ። ሄሳ ጊሻስ ቲቢኔይ ሃይቂን ኦሚሬይ ካዎቲዴስ።

23 ዩሁዳ ካዎ ኣሲ ካዎቲዳ 31 ላይꬃን ኦሚሬይ ኢስራኤሌ ኣሳ ቦላ ካዎቲዲ 12 ላይꬅ ሃሪዴስ፤ ሂስቲዲ 6 ላይꬅ ቲርጻ ሃሪዴስ። 24 ኦሚሬይ ሳማሪያን ዲዛ ዙምቡላ ሼሜሬፔ 6,000 ሳቂሌ ቢራን ሻሚዲ ካታማ ኬጺዴስ። ሂስቲዲ ሄ ካታማዛ ካሴ ዙምቡላ ጎዳ ሱንꬃን ሳማሪያ ጊዲ ሱንꬂዴስ።

25 ጊዶ ኣቲን ኦሚሬይ ጎዳ ሲንꬃን ኢታ ሚሽ ኦꬂዴስ፤ ኢዚ ባፔ ካሴ ዴኢዳ ካዎታ ኡባታፔካ ኣꬊዳ ናጋራ ኦꬂዴስ። 26 ናባጼ ና ኢዮርባኣሜይ ኦꬂዳ ናጋራኔ ኢስራኤሌ ኣሳ ኦሲሲዳ ናጋራ ኦሚሬይ ካሊዴስ፤ ሄ ኤቃ ጾሳስ ጎይኒዛ ሃኖታይ ጎዳ ኢስራኤሌ ጾሳ ሃንቄꬂዴስ።

27 ኦሚሬይ ሃኒዳ ሃራ ሃኖታይ፥ ኢዚ ኦꬂዳ ኦሶቲኔ ኢዛ ሚኖቴꬃይ ኢስራኤሌ ካዎታ ታሪኬ ማጻፋን ጻፌቲ ኡቲዴስ። 28 ኦሚሬይ ሃይቂዲ ባ ኣዋታን ጋይቲዴስ፤ ሳማሪያ ካታማንካ ሞጌቲዴስ። ኢዛ ና ኣካቤይ ኢዛሶሆን ካዎቲዴስ።

29 ዩሁዳ ካዎ ኣሲ ካዎቲዳ 38 ላይꬃን ኦሚሬ ና ኣካቤይ ኢስራኤሌን ካዎቲዴስ፤ ኦሚሬ ና ኣካቤይ ሳማሪያ ካታማን ኢስራኤሌ ቦላ 22 ላይꬅ ካዎቲዴስ። 30 ኦሚሬ ና ኣካቤይ ባፔ ካሴ ዎዴ ዴኢዳ ካዎታ ኡባታይሳፌካ ኣꬊዳ ኢታ ሚሽ ጎዳ ሲንꬃን ኦꬂዴስ። 31 ናባጼ ና ኢዮርባኣሜይ ኦꬂዳ ናጋራ ላፋ ሚሽ ጊዲ ቆፎ ጻላ ጊዶንታ ሲዶናታ ካዎ ኤቲባኣሌ ናዮ ኤልዛቤሎ ባስ ማቾ ኤኪዲ ባኣሌ ጌቴቲዛ ኤቃ ጾሳስ ሃጋዚዴሲኔ ጎይኒዴስ። 32 ሳማሪያ ካታማን ኢዚ ኬጺሲዳ ኤቃ ጾሳ ባኣሌ ኬꬃን ያርሾ ያርሺዛሶ ኬጺዴስ። 33 ቃሴ ኣካቤይ ኣሼሮ ጌቴቲዛ ጾሳይ ሚስሌ ኤሲዲ ባፔ ካሴ ዴኢዳ ካዎታ ኡባታፔ ኣꬂዲ ጎዳ ኢስራኤሌ ጾሳ ሃንቄꬂሲዛ ናጋራ ኦꬂዴስ።

34 ኣካቤ ካዎቴꬃ ዎዴ ቤቴሌፔ ዪዳ ሂኤሌይ ኢያርኮ ካታማ ዛሪ ኤሲዴስ። ናዌ ና ኢያሶ ባጋራ ጎዳይ ዮቲዳ ማላ ሂኤሌይ ኢያርኮ ኬጻናስ ዮች ዬጊዛ ዎዴ ኣብራሜ ጌቴቲዛ ኢዛስ ባይራ ናዚ ሃይቂዴስ፤ ጊምቤ ፔንጌታ ጌልꬂዛ ዎዴ ሳጉቤ ጌቴቲዛ ኢዛስ ዉርሴꬃ ካሎ ናዚ ሃይቂዴስ።