1 ሄሳ ጊሻስ ኢታቴꬅ ዉርሲ፥ ባሌꬆ ዉርሲ፥ ቆꬌፔ ቆሞን ሃኖ፥ ቃናቴቴꬅ ኣይኮ ቆሞ ዚጊርስ ኢንቴፌ ዲጊቴ። 2 ሃኢ ዬሌቲዳ ጉꬃ ናይቲ ማꬅ ኣሞቲዛይሳ ማላ ኢንቴካ ኣታናስ፥ ኢዛን ዲጪ ዲጪ ባናስ ጌሻ ኣያና ቲሚርቴ ላሞቲቴ። 3 ኢንቴ ላሞታናስ ቤሲዛይ ጎዳይ ኪያ ጊዲዳይሳ ሻኪ ኤሪኮ። ማዛ 34፡8

4 ሄሳ ጊሻስ ጌዴ ዴኦ ሹች ጊዲዳ ዬሱሳኮ ሺቂቴ፤ ሄ ሹቻይ ኣሳይ ሌቂ ኣጊዳይሳ ሺን ጾሳ ኣቻን ጊዲኮ ዶሬቲዳይሳኔ ቦንቾ ዋጋይ ዲዛይሳ። 5 ኢንቴ ጎዳ ዬሱሳኮ ሺቃናይካ ዴኦ ሹቻ ማላ ጺሎ ኣያና ዱሳሶ ጊዳና ማላ ኦሴቴታ፤ ሄሳꬆካ ኢንቴ ዬሱስ ኪርስቶሳ ባጋራ ኡፋይሲዛ ኣያና ያርሾ ጾሳስ ሺሻናስ ጌሻ ቄሴታ ጊዳንዴታ። 6 ጌሻ ማጻፋን፥ «ሄኮ ዶሬቲዳ ቦንቾ ጊዲዳ ኬꬃስ ጉላን ኡቲዛ ሹች ታኒ ጺዮኔን ዎꬃና፤ ኢዛን ኣማኒዛዴይ ዬላቴና» ጊዛ ቃላይ ጻፌቲ ኡቲዴስ። ኢሳ 28፡16 7 ሄሳ ጊሻስ ኢንቴስ ኣማኒዛይታስ ሄ ሹቻይ ቦንቾ ሹቺኮ፤ ሂንኮ ኢዛን ኣማኖንታይታስ ጊዲኮ፥ «ሹቻን ኬጺዛ ኬꬃ ሂላቲ ሌቂ ዎራ ዬጊዳይሲ ኢዚ ኬꬃ ጉላስ ሁኤ ጊዲዴስ»ማዛ 118፡22 8 ቃሴካ፥ «ሄኮ ኣሴ ꬉጲዛ ሹቻይ ሃይሲች! ኣሳ ꬉጲ ኩንዲሲዛ ዛላ ሹቻይ ሃይሳኮ» ጌስ፤ ኢስቲ ቃላ ኣማኖንታ ኢጺዳ ጊሻስ ꬉጴቴቴስ፤ ካሴካ ኢስቲ ሄሳስ ዲዛይታ። ኢሳ 8፡14-15

9 ኢንቴ ጊዲኮ ꬉማፔ ጌዴ ዳሮ ማላሊሲዛ ኢዛ ፖኦኮ ጼይጊዳ ማላሊሲዛ ጾሳ ኦሶ ኣዋጃናስ ዶሬቲዳ ዬሌታታ፥ ካዎ ቄሴታ፥ ጾሲ ኢንቴና ባስ ሂስቲዳ ኢንቴ ዱማ ዴሬታ። ኬሳ 19፡5-6፤ ኢሳ 43፡20-21፤ ዛሬ 4፡20፤ 7፡6፤ 14፡2፤ ቲቶ 2፡14፤ ኢሳ 9፡2 10 ኢንቴ ካሴ ጾሳ ዴሬ ጊዴኬታ፤ ሃኢ ጊዲኮ ኢንቴ ጾሳ ዴሬታ፤ ኢንቴ ካሴ ጾሲ ኢንቴስ ቃꬌቶንታ ዴሬኮ ሺን ሃኢ ጊዲኮ ኢንቴስ ቃꬌቲዴስ።ሆሴ 2፡23

11 ታ ሲቆቶ! ኢንቴ ሃይሳ ኣላሜዛ ቦላ ኢማꬄኔ ቤቴ ኣስ ጊዲዳ ጊሻስ ሼምፖራ ኦሌቲዛ ኣሾ ኣሞቴꬃታፔ ሃካና ማላ ታ ኢንቴና ሃዳራ ጋይስ። 12 ኦኔ ኤሪዛይ፥ «ኢንቴና ኢስቲ ኢታ ኦꬄቴስ» ጊዲ ኣሳይ ዚጊርኮካ ጾሲ ኑና ቤያናስ ዪዛ ጋላስ ኣይዛቤቲ ኢንቴ ኦሶይ ሎኦ ጊዲዳይሳ ቤኢዲ ጾስ ጋላታና ማላ ኢንቴ ኢስታራ ዲዛ ዎዴ ኢንቴ ኣማሌይ ሎኦ ጊዶ።

13 ኢንቴ ጎዳ ዬሱሳ ጊሻስ ጊዲ ዴሬ ኣይሲዛይታስ ኣዛዜቲቴ። ካዎይ ቃሴ ኡባፌ ቦላራ ዲዛ ጊሻስ ካዎሲካ ኣዛዜቲቴ። 14 ዴሬ ኣይሲዛይታስ ኣዛዜቲቴ፤ ኢስቲ ኢታ ኦꬂዛይታ ቃጻያናሲኔ ሎኦ ኦꬂዛይታ ጋላታናስ ካዎፔ ኪቴቲዛይታ። 15 ኢንቴ ሎኦ ኦሶን ሃንኮ ኤራይ ባይንዳ ኤያቴꬃን ሃሳይዛይታ ጮኡ ሂስታና ማላ ሄሲካ ጾሳ ሼኔ። 16 ኢንቴ ጾሳስ ኦꬂዛ ኣሳታ ማላ ጊዲዲ ሂርጋይ ባይንዳ ዴኢቴ ኣቲን ኢንቴ ኢንቴ ሼኔ ማላ ዲዛ ዱሳ ኢታቴꬃ ካሚዛ ሚሽ ሂስቶፍቴ። 17 ኣስ ኡባካ ቦንቺቴ፤ ኣማኒዛይታ ሲቂቴ፤ ጾሳስ ባቢቴ፤ ካዎ ቦንቺቴ።

18 ኢንቴኖ ኣሳስ ኦꬂ ኣቂዛይቶ! ኢንቴና ኦሲሲዛ ጎዳታስ ቦንቾን ኣዛዜቲቴ፤ ኢንቴ ኣዛዜታናይ ሎኦታሲኔ ኣሽኬታስ ጻላ ጊዶንታ ሃንኮ ኢታታሳራኮ! 19 ኣሲ ጋላቴቲዛይ ጮ ቆሄቲሼ፤ ሄሲካ ጾሳ ጊሻስ ጊዲ ዳንዳያና። 20 ኢንቴ ኢታ ኦꬂዳ ጊሻስ ቃጻዬቲሼ ዳንዳይኮ ኢንቴስ ኣዛ ጋላታይ ዳኔ? ኢንቴ ሎኦ ኦꬂዲ ዋዬ ኤኪሼ ዳንዳይኮ ኢንቴ ጾሳፌ ጋላታ ኤካንዴታ። 21 ኢንቴ ጼይጌቲዳይካ ሄሳሳ፤ ኢንቴ ኢዛ ሌሚሶ ካላና ማላ ኪርስቶሲ ኢንቴ ጊሻስ ዋዬ ኤኪዲ ኢንቴስ ሌሚሶ ጊዲዴስ። 22 ኢዚ ኣይኮ ናጋራካ ኦꬂቤና፤ ኢዛ ዶናን ጌኔይ ቤቲቤና። ኢሳ 53፡9 23 ኣሳይ ኢዛ ጫዪሺን ኢዚ ዛሪ ጫዪቤና። ዋዬቲሼ ባና ቱሙ ፒርዲዛ ጎዳስ ሃዳራ ኣꬂ ኢሚዴስ ኣቲን ሃሎ ኬሳና ማንዲቤና። ኢሳ 53፡7 24 ኑኒ ናጋራፔ ሻኬቲዲ ጺሎቴꬃን ዳና ማላ ኢዚ ባርካ ባ ኣሾን ኑ ናጋራ ማስቃሌ ቦላ ቶኪዴስ፤ ኢንቴ ኢዛ ማዱንꬃን ፓጺዴታ። ኢሳ 53፡5 25 ኢንቴ ꬋይዳ ዶርሳታ ማላ ቶይላቲዴታ፤ ሃኢ ጊዲኮ ኢንቴ ሼምፖ ሄሚዛይሳኮኔ ናጊዛይሳኮ ሲሚዴታ።