ጴጽሮሲ
ጻፊዳ ኮይሮ ኪታ
ጊዶ ቆፋ
ሃዋሬ ጴጽሮሲ ጻፊዳ ኮይሮ ኪታዛ ጊዶን፥ «ጾሳስ ዶሬቲዳ ዴሬ» ጌቴቲ ጼይጌቲዛይታሲኔ ፑዴሃ ባጋራ ቄሪ ኢሲያ ዴሬን ላሌቲ ዲዛ ኣማኒዛይታሳ። ሄ ኪታስ ዋና ቆፋይ ኣማኖ ጋሶን ዳሮ ሜቶይኔ ጎዴቴꬂ ኢስታ ቦላ ጋኪዳይታ ሚንꬄꬃናሲኔ ዴንꬄꬃናስኮ። ጻፌዚ ሄሳꬆ ኦꬂዳይ ዬሱሳ ሃይቆ ጊሻስ፥ ሃይቆፔ ዴንꬃ ጊሻሲኔ ኢዚ ናምኣንꬆ ሃ ሲሚ ያና ዩሳ ሂዶታ ቆንጪሲዛ ዬሱስ ኪርስቶሳ ሚሺራቾ ቃላ ናባቢዛይታ ቆፍሳናሳ። ዬሱስ ኪርስቶሲ ካሴ ዴዪዳ ዱሳ ሌሚሶ ማላ ጼሊዲ ኢስቲካ ሜቶ ጌንጪ ኣꬃናስ ቤሲዛይሳ ቆፍሴስ። ሄይታራ ኡባ ጋꬂዲ ሜቶይ ኢስታ ኣማኖ ሚኖቴꬅ ፓጪዛይሳኔ ዬሱስ ኪርስቶሲ ቆንጪዛ ጋላስ ኢስቲ ባስ ቤሲዛ ዋጋ ኤካናይሳ ኢስታ ቆፍሴስ።
ጻፌዚ ኢስቲ ሜቶ ዳንዳያና ማላ ኢስታ ሚንꬄꬆፌካ ቦላራ ሄሳ ናባቢዛይቲ ኪርስቶሳ ካሊዛይቲ ዴኣናስ ቤሲዛ ዱስ ዳና ማላ ቆፍሴስ።
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1-2
ጾሲ ኣሺዛዴ ጊዲዳይሳ ኤሪሶ 1፡3-12
ጾሳስ ዱማቲ ዳና ማላ ኢሜቲዳ ዞሬ 1፡13—2፡10
ሜቶ ዎዴ ኣማኒዛይታ ኣላፌቴꬅ 2፡11—4፡19
ኣማኒዛይታ ኣሽኬቴꬂኔ ኢስታ ኦሶ 5፡1-11
ኩሻ ቆፋ 5፡12-14
1
1 ዬሱስ ኪርስቶሳ ሃዋሬ ጊዲዳ ጴጽሮሳፔ፥ ኣሳ ቢታን ቤቴን ዲዛይታስ ጳንጾሳን፥ ጋላቲያን፥ ቆጶዶቂያን፥ ኢሲያኒኔ ቢቲኒያ ቢታን ላሌቲ ዲዛ ኢንቴስ፥ 2 ኣዋይ ጾሲ ካሴ ኢንቴና ኤሪዳ ማላ ዶሬቲዳይታስ፥ ዬሱስ ኪርስቶሳስ ኣዛዜታናሲኔ ኢንቴ ኢዛ ሱꬃን ኣራጬቲዲ ጌያና ማላ ጺሎ ኣያናን ዱማቲዳ ኢንቴስ ኪያቴꬂኔ ሳሮቴꬂ ዳሮ።
ጊታ ሂዶታ
3 ዬሱስ ኪርስቶሲ ሃይቆፔ ዴንዲዳ ጊሻስ ኑስ ዴኦ ጊዲዳ ሂዶታ ኢሚዳይሲ ባ ጊታ ማሮቴꬃን ኑና ባስ ኦራꬃ ናይታ ሂስቲዳ ኑ ጎዳ ዬሱስ ኪርስቶሳ ኣዋይ ጾሲ ጋላቴቶ። 4 ኢዚ ꬋዮንታ፥ ሞሬቶንታኔ ጬጎንታ ላታሶ ኢንቴስ ሳሎን ጊግሲ ዎꬂዴስ። 5 ኢንቴካ ዉርሴꬃ ጋላሳን ቡሮ ቆንጫና ኣቶቴꬃስ ኣማኖ ጋሶን ጾሳ ዎልቃን ናጌቲዴታ።
6 ሃኢ ጉꬃ ዎዴስ ዱማ ዱማ ፓጬቲ ኢንቴና ዋዪሲኮካ ኢንቴ ሄሳን ኡፋዬቲቴ። 7 ሄሲ ሄ ፓጬዚ ኢንቴ ቦላ ጋኪዛይ ኢንቴ ኣማኖዚ ቱሙ ጊዲዳይሳ ቆንጪሳናሳ። ꬋያና ዎርቃይካ ታማን ፓጬቴስ፤ ዎርቃፌ ኣꬊ ቦንቾ ጊዲዳ ኢንቴ ኣማኖይካ ሄሳꬆ ፓጬታናስ ቤሴስ። ሄሲ ፓጬቲዳ ኢንቴ ኣማኖይ ዬሱስ ኪርስቶሲ ቆንጪዛ ጋላስ ጋላታስ፥ ቦንቾሲኔ ሳባስ ኢንቴና ጋꬃና። 8 ኢንቴ ዬሱስ ኪርስቶሳ ኣይፌራ ቤኦንታ ኣጊኮካ ኢንቴ ኢዛ ዶሴታ፤ ሃኢካ ኢንቴ ኢዛ ቤኦንታ ኣጊኮካ ኢዛ ኣማኔታ፤ ጮ ቃላን ቆንጪሳና ዳንዳዮንታ ጊታ ቦንቾ ኡፋይስ ኢንቴ ኡፋዬቴታ። 9 ኢንቴ ናጊዛ ኢንቴ ሼምፖይስ ኣቶቴꬅ ኢንቴ ኣማኖን ዴሚዴታ።
10 ሄ ኣቶቴꬃዛ ጊሻስ ኢንቴስ ኢሜታና ኪያቴꬃስ ካሴ ናቤቲ ሎኤꬂ ዎዚናፔ ፒልጊ ጼሊዳ። 11 ካሴ ኢስታን ዲዛ ኪርስቶሳ ኣያናይ ጾሳፌ ቲዬቲዳይሳ ቦላ ጋካና ዋዬዛኔ ሄ ዋዬዛፔ ጉዬ ኢዚ ዴማና ቦንቾዛ ጊሻስ ካሴ ባስ ዎꬂዴስ፤ ኢስቲ ቃሴ ሄሲ ዉሪካ ኣይዴ ዋኒ ሃናናኮ ዩሺ ቆፒዳ። 12 ሄ ካሴ ናቤቲ ኢንቴስ ኦꬂዳ ኣቲን ኢስቲ ባስ ኦꬆንታይሲ ኢስታስ ቆንጬን ኤሬቲዴስ። ኢስቲ ኢንቴስ ኦꬂዳይ ቦላ ሳሎፔ ኪቴቲዳ ጺሎ ኣያና ባጋራ ሃኢ ኢንቴስ ሚሺራቾ ቃላ ዮቲዳ ኣሳቲ ኢንቴስ ዮቲዳይሳ ቆንጪሳናሳ፤ ሄሳ ሄ ቃላ ኪታንቻቲካ ቤያናስ ኣሞቲዳ።
ጾሳስ ዱማቲ ዱስ
13 ሄሳ ጊሻስ ኢንቴ ኢንቴ ዎዚና ሱሪሲዲ ኦሶስ ጊጌቲቴ፤ ዎጋራ ዴኢቴ። ዬሱስ ኪርስቶሲ ቆንጪዛ ዎዴ ኢንቴ ኢዛ ኪያቴꬃ ዴማናስ ኢንቴስ ኩሜꬃ ሂዶታይ ዴኦ። 14 ኢንቴ ኣዛዜቲዛ ናይታ ጊዲዲ ኤሮንታ ዲሼ ኢንቴ ካሴ ኢዛን ዲዛ ኢታ ቆፋ ካሎፍቴ። 15 ኢንቴና ጼይጊዳ ጾሳይ ዱማ ጊዲዳ ማላ ኢንቴካ ኢንቴ ዱሳን ኡባን ዱማቲቴ። 16 ጋሶይካ፥ «ታኒ ጌሽ ጊዲዳ ጊሻስ ኢንቴካ ጌሽ ጊዲቴ» ጌቴቲ ጌሻ ማጻፋን ካሴ ጻፌቲዴስ። ሌዌ 11፡44-45፤ 19፡2
17 ኦናካ ዱማ ሻኪ ማዶንታ ኢሳስ ኢሳስ ኢዛዴ ኦሶ ማላ ፒርዲዛ ጾሳ፥ «ኢዚ ኑ ኣዋ» ጊዲ ኢንቴ ጼይጊኮ ሃይሳ ኣላሜዛን ኢንቴ ኢማꬄኔ ቤቴ ኣስ ጊዲዲ ዲዛ ዎዴ ኡባን ኢዛስ ባቢቴ። 18 ኢንቴ ካሴ ኢንቴ ኣዋታፔ ላቲዳ ሃዳ ዱሳፌ ዎዜቲዳይ ꬋይዛ ቢራን ዎይኮ ዎርቃን ጊዶንታይሳ ኢንቴ ኤሬታ። 19 ጊዶ ኣቲን ኢንቴ ዎዜቲዳይ ኢታይኔ ዎሶይ ኢዛ ቦላ ባይንዳ ጌሻ ዶርሳ ማላ ጊዲዳ ኪርስቶሳ ቦንቾ ሱꬃንኮ። 20 ኢዚ ኤሬቲዳይ ሃይሲ ኣላሜዚ ሜꬌታናፔ ካሴ ጊዲሺን ሃኢ ቃሴ ዉርሴꬃ ዎዴን ኢንቴስ ቆንጪዴስ። 21 ኢንቴስ ኣማኖይኔ ኢንቴ ሂዶታይ ጾሳን ጊዳና ማላ ዬሱስ ኪርስቶሳ ባጋራ ኢዛ ሃይቆፔ ዴንꬂዲ ኢዛስ ቦንቾ ኢሚዳ ጾሳን ኢንቴ ኣማኔቴታ።
22 ኢንቴ ኣማኒዛይታ ሱሬ ዎዚናፔ *ሱሬ ዎዚናፔ፡ ሱሬ ዎዚናፔ ጊዛይሳ ኢሲ ኢሲ ጌሻ ማጻፋቲ ኩሜꬃ ዎዚናፔ ጌቴስ። ሲቃና ማላ ቱማስ ኣዛዜቴꬃን ኢንቴ ኢንቴ ኣሳቴꬅ ጌሺዴታ፤ ሄሳ ጊሻስ ኢንቴ ኢንቴ ጊዶን ኢሶይ ኢሳራ ሎኤꬂ ሲቄቲቴ። 23 ኢንቴ ናምኣንꬆ ዬሌቲዳይ ሜርናስ ሚኒ ዲዛ ꬋዮንታ ዴኦ ጾሳ ቃላን ꬋዮንታ ዜሬꬃፌ ኣቲን ꬋይዛ ዜሬꬃፌ ጊዴና። 24 ጌሻ ማጻፋይ ጊዛ ማላ፥
«ኣሾ ማይኢዳይ ዉሪካ
ማታ ማላ፤
ኢዛ ቦንቾይካ ዉሪካ
ዎራ ጪሻ ማላ፤
ማታይካ ሜሌስ፤
ጪሻይካ ቆኬስ።
25 ጎዳ ቃላይ ጊዲኮ
ሜርናስ ኤቂ ዴስ።»
ኢንቴስ ሳባኬቲዳ ሚሺራቾ ቃላይካ ሄሳ።