1 ሂስቲኮ ኢንቴኖ ዱሬ ኣሳቶ! ኣኔ ሲዪቴ። ቡሮ ኢንቴ ቦላ ጋካና ሜቶዛ ጊሻስ ዬኪቴ፤ «ዉ! ዉይ» ጊ ዋሲቴ። 2 ኢንቴ ሃሮይ ቡቂዴስ፤ ኢንቴ ማይኦካ ቢላይ ሚዴስ። 3 ኢንቴ ዎርቃይኔ ኢንቴ ቢራይ ሺይዴስ፤ ሄ ሺይዳይሲካ ኢንቴ ቦላ ማርካቴሲኔ ኢንቴ ኣሾ ታማ ማላ ጹጌስ፤ ዎዴ ዉርሴꬃስ ሚሼ ኢንቴ ሺሺዴታ። 4 ኢንቴ ኢንቴ ዎዚናን ዎꬂቴ፤ ኢንቴ ካꬅ ማጺሼ ፔይዳይታስ ኢስታ ዎልቃ ዋጋ ኢንቴ ቃንጾንታ ኣጊዳ ጊሻስ ኢንቴ ቦላ ዋሲሼ ኢንቴ ኣቻን ዴቴስ። ካꬅ ማጺዛይታ ዋሶይ ኡባ ዳንዳይዛ ጎዳ ሃይꬃን ጋኪዴስ። ዛሬ 24፡14-15 5 ኢንቴ ቢታ ቦላ ኢሻሎኒኔ ኣልኤቴꬃን ዴኢዴታ፤ ኢንቴ ዎዚና ሹካስ ꬊኪዳ ሜሄ ማላ ሞꬊሲዴታ። 6 ኢንቴ ኢንቴናራ ኤቄቶንታ ጺሎ ኣሳታ ቦላ ዎርዶ ዎꬂዲ ዎꬊዴታ።

7 ሄሳ ጊሻስ ታ ኢሻቶ! ጎዳይ ሃ ያና ጋካናስ ዳንዳይቴ፤ ጎሼ ጎዪዛዴይ ቢታይ ሎኦ ካꬂ ካጻና ጋካናስ ዋኒ ዳንዳይዛኮ ኮይሮ ኢራኔ ዉርሴꬃ ኢራ ኢዚ ዎስቲ ናጊዛኮ ኣኔ ኣኬኪቴ። 8 ኢንቴካ ሄሳꬆ ዳንዳይቴ፤ ኢንቴ ዎዚና ሚንꬂቴ፤ ጋሶይካ ጎዳ ዩሳ ጋላሲ ማቲዴስ።

9 ታ ኢሻቶ! ኢንቴ ኢንቴ ጊዶን ዚጊሬቶፍቴ፤ ኢንቴ ዚጊሬቲኮ ኢንቴ ቦላ ፒርዴታና፤ ፒርዳናዴይ ሄኮ ኢንቴ ፔንጌ ቦላ ኤቂዴስ። 10 ታ ኢሻቶ! ጎዳ ሱንꬃን ኢንቴስ ዮቲዳ ናቤታ ዋዬቴꬂኔ ኢስታ ዳንዳያ ኢንቴስ ሌሚሶ ሂስቲ ጼሊቴ። 11 ዳንዳያን ጌንጪዳ ኣሳታ ኑ ኢስታ፥ «ኢስቲ ኣንጄቲዳይታ» ጊ ቆዲዛይሳ ኢንቴ ኤሬታ። ኢዮቢ ዋኒ ዳንዳይዳኮ ኢንቴ ኢዛ ጊሻስ ሲዪዴታ። ጎዳይ ኢዛ ዉርሴꬃን ኣይ ኦꬂዳኮ ኢንቴ ቤዪዴታ፤ ጎዳይ ኣሳስ ኬሂ ሚሼቲዛዴኔ ማሪዛዴ። ኢዮ 1፡21-22፤ 2፡10፤ ማዛ 103፡8

12 ሃራፔካ ታ ኢሻቶ! ሳሎን ጊዲን ዎይኮ ሳኣን ጊዲን ዎይኮ ኣይ ሚሻንካ ጫቆፍቴ፤ «ኤ» ጋናስ ቤሲዛ ሚሽ ጊዲኮ፥ «ኤ» ጊቴ። «ኣካይ» ጋናስ ጊዲኮ፥ «ኣካይ» ጊቴ፤ ሄሳፌ ሃራ ጊኮ ኢንቴ ቦላ ፒርዴታና። ማቶ 5፡34-37

13 ኢንቴ ጋርሳን ሜቶቲዛ ኣሲ ዲዜ? ዲዛ ጊዲኮ ኢዚ ዎሶ። ኡፋዬቲዛዴይ ዲዜ? ዲዛ ጊዲኮ ኡፋይሳ ማዛሙሬ ዬጾ። 14 ኢንቴ ጊዶን ሳኬቲዛ ኣሲ ዲዜ? ዲኮ ዎሳ ኬꬃ ጪማታ ጼይጎ፤ ኢስቲካ ጎዳ ሱንꬃን ዛይቴ ኢዛ ቦላ ቲይዲ ኢዛስ ዎሴቶ። ማር 6፡13 15 ኣማኖን ዎሲዳ ዎሳይ ሃርጊዳዴ ፓꬃና፤ ጎዳይካ ኢዛ ዴንꬃና፤ ኢዚ ናጋራ ኦꬂዳዴ ጊዲኮካ ጾሲ ኢዛ ማራና። 16 ሄሳ ጊሻስ ኢንቴካ ኢንቴ ጋርሳን ኢሶይ ኢሳራ ኢንቴ ናጋራ ፓጼቲቴ፤ ፓጻና ማላ ኢሶይ ኢሳስ ዎሲቴ፤ ጺሎ ኣሳ ዎሳይ ዎልቃራ ዴስ፤ ዎልቃማ ኦሶካ ኦꬄስ። 17 ኤላሲ ኑ ማላካ ኣሳ፤ ኢዚ ኢራይ ቡኮንታ ማላ ሚንꬂ ዎሲን ቢታ ቦላ ሄꬑ ላይꬂኔ ባጋ ጋካናስ ኢራይ ቡኪቤና። 1ካዎ 17፡1፤ 18፡1 18 ቃሴካ ዛሪ ዎሲን ኢራይ ሳሎፔ ቢታ ቦላ ቡኪዴስ፤ ቢታይካ ካꬅ ኢሚዴስ። 1ካዎ 18፡42-45

19-20 ታ ኢሻቶ! ኢንቴፌ ኢሳዴይ ቱማፔ ባሌቲን ሃራ ኣሲ ኢዛ ዛሪኮ ሄሳ ዎዚናን ዎꬂቴ፤ ናጋራንቻ ኢዚ ባሌቲዳ ኦጌፔ ዛሪዳዴይ ሄሳዴ ሼምፖ ሃይቆፔ ኣሼሲኔ ኢዛዴ ናጋራ ዳሮዛካ ካሜስ። ሌሚ 10፡12፤ 1ጴጽ 4፡8