ጳዉሎሲ
ጺምቶሳስ
ጻፊዳ ኮይሮ ኪታ
ጊዶ ቆፋ
ጺምቶሳ ጌቴቲዛ ኢሲ ናቴꬃ ናይ ኢዛስካ ዬሌታ ዴሬይ ቄሪ ኢሲያ ጊዲሺን፥ ኢዛ ኣዬያ ኣይሁዳ ኣስ፤ ኣዋይ ቃሴ ጊሪኬ ኣስ። ኢዚ ሚሺራቾ ቃላ ኦሶን ጳዉሎሳራ ኢሲፌ ኦꬂዛ ማታ ላጌ። (ሃዋ 16፡1-3) ጳዉሎሲ ጺምቶሳስ ኮይሮ ጻፊዳ ኪታዚ ሄꬑ ኣይፌ ዮኦታ ኦይኪዴስ።
ሄ ኪታዛን ኣይፌ ቆፋይ ሲንꬃቲዲ ዎሳ ኬꬃ ጋርሳን ዴንዲዳ ዎርዶ ቲሚርቴፌ ኣሳይ ናጌታና ማላሳ። ሃ ዎርዶ ቲሚርቴዚ ባጋይ ኣይሁዳታፔ ባጋይ ቃሴ ኣይዛቤታ ቆፋ ኦይኪዳዝ ጊዲሺን፥ «ሃይሲ ኣይፌን ቤቲዛ ኣላሜዚ ናጋራን ሞሬቲዳ ጊሻስ ኣሳስ ፓጼቴꬂ ቤታናይ ሃራ ዱማ ዱማ ጹራ ኤራቴꬃኒኔ ኢሲ ኢሲ ቁማታ ሞንታ ኣጎን፥ ኤኮንታኔ ጌሎንታ ኣጎንኮ» ጊዛ ቆፋ። ሄሳፌካ ቦላራ ኢዛ ኪታዚ ዎሳ ኬꬃ ኣይሶ ጊሻሲኔ ጾስ ጎይኖ ጊሻስ ታማርሲዛ ዎጋይ ሄሳꬆካ ዎሳ ኬꬃ ጪማቲኔ ኢስታ ማዲዛይታስ ዴኣናስ ቤሲዛይ ኣዛኮ ዮቴስ። ዉርሴꬃን ጺምቶሲ ዬሱስ ኪርስቶሳስ ሎኦ ኦሳንቻ ዋኒ ጊዳናስ ቤሲዛኮ ኢዛስ ዱማ ዱማ ኣማኒዛይታ ቦላ ዲዛ ኣላፌቴꬃ ጊሻስ ጳዉሎሲ ኢዛስ ኢሚዳ ዞሬ ቤዮስ።
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1-2
ዎሳ ኬꬃ ጊሻሲኔ ዎሳ ኬꬃ ጋርሳን ኦꬂዛይታ ጊሻስ 1፡3—3፡16
ጺምቶሳስ ኢዛ ኦሶ ጊሻስ ኢሜቲዳ ቲሚርቴ 4፡1—6፡21
1
1 ኑና ኣሺዳ ጾሳን፥ ኑስ ሂዶታ ጊዲዳ ዬሱስ ኪርስቶሳ ኣዛዞን ሃዋሬ ጊዲዳ ጳዉሎሳፔ 2 ኣማኖን ታስ ቱሙ ና ጊዲዳ ጺምቶሳስ ጾሳ ኑ ኣዋፔ ኑ ጎዳ ዬሱስ ኪርስቶሳፔ ኪያቴꬂ፥ ማሮቴꬂኔ ሳሮይ ኔስ ጊዶ። ሃዋ 16፡1
ዎርዶ ኣስታማሬታፔ ናጌታና ማላ ኢሜቲዳ ኣዛዞ
3 ታኒ ማቂዶኒያ ባሼ ኔና ሃዳራ ጊዳ ማላ ሃይሳፌ ሲንꬃን ኢሲ ኢሲ ኣሳቲ ዎርዶ ቲሚርቴ ታማርሶንታ ማላ ኔ ኣዛዛናስ ኤፌሶኔን ዳሻ። 4 ቃሴካ ኣሳይ ዮቲን ዉሮንታ ቤኒ ዎዴ ሃይሲኤን ባ ዎዴ ዉርሶንታ ማላ ኣዛዛ፤ ሄይታ ማላ ዮኦይ ፓላማ ዴንꬄꬄስ ኣቲን ኣማኖን ኦሴቲዛ ጾሳ ኦሶስ ኣይኮካ ጎኤና። 5 ሃ ኣዛዞዛስ ዋና ኣይፌ ዮኦይ ጊዲኮ ጌሻ ዎዚናፔ ሎኦ ቆፋራ ሄሳꬆካ ቱሙ ኣማኖፔ ቤቲዛ ሲቆ። 6 ኢሲ ኢሲ ኣሳይ ሃይታፔ ፖቂ ኤቂዲ ጎኣይ ባይንዳ ዮኦታኮ ሲሚዴስ። 7 ዎጋ ታማርሲዛይታ ጊዳና ማላ ኮዬቴስ፤ ጊዲኮካ ኢስቲ ባ ዮቲዛይሳ ዎይኮ ኬሂ ሞቴቲዛ ዮኦዛ ሎኤꬂ ኤሬቴና።
8 ጊዶ ኣቲን ኣሲ ማራን ጎኤቲዛኮ ዎጋይ ሎኦ ጊዲዳይሳ ኑ ኤሮስ። 9 ቃሴካ ዎጋይ ኢሜቲዳይ ጺሎ ኣሳስ ጊዶንታ ዎጋ ዬꬊ ኣꬊዛይታስ፥ ኣዛዜቶንታይታስ፥ ጾሳስ ባቦንታይታስ፥ ናጋራንቻታስ፥ ጌሻቴꬂ ባይንዳይታስ፥ ጾስ ሌቂዛይታስ፥ ባ ኣዮኔ ባ ኣዋ ዎꬊዛይታሲኔ ሼምፖ ዎꬊዛይታስ ጊዲዳይሳ ኑ ኤሮስ። 10 ሄሳꬆካ ላይማቲዛይታስ፥ ኣዴራ ኣቂዛ ኣዴታስ፥ ኣስ ባይዚዛይታሲኔ ሻሚዛይታስ፥ ዎርዳንቻታስ፥ ኣሳስ ዎርዶራ ጫቂዛይታስ፥ ሎኦ ቲሚርቴራ ኤቄቲዛ ኡባታሳ። 11 ሄ ሎኦ ቲሚርቴይ ኣንጄቲዳ ጾሲ ታስ ሃዳራ ኢሚዳ ቦንቾ ሚሺራቾ ቃላራ ጋጊዛይሳ።
ጳዉሎሳስ ኢሜቲዳ ጾሳ ኢሞታ
12 ታና ባ ኦሶስ ሹሚዲኔ ኣማኔቲዛዴ ሂስቲ ኤኪዲኔ ታስ ሚኖቴꬅ ኢሚዳ ኑ ጎዳ ዬሱስ ኪርስቶሳ ታ ጋላታይስ። 13 ሃይሳፌ ካሴ ታ ኣይ ማላ ኣስ ጫዪዛዴኔ ጎዴꬂዛዴ፥ ቃሴ ማካላ ኣስ ጊዲኮካ ሄሳ ታ ኤሮንታኔ ኣማኖንታ ዳሼ ኦꬂዳ ጊሻስ ጾሲ ታና ማሪዴስ። ሃዋ 8፡3፤ 9፡4-5 14 ዬሱስ ኪርስቶሳፔ ጊዲዳ ኣማኖራኔ ሲቆራ ኑ ጎዳ ኪያቴꬂ ታስ ኬሂ ዳሪዴስ።
15 ዬሱስ ኪርስቶሲ ናጋራንቻታ ኣሻናስ ዱጌ ሃይሳ ሃ ኣላሜ ዪዴስ ጊዛ ቃላይ ቱማኔ ኣሲ ዉሪካ ኤካናስ ቤሲዛይሳ። ናጋራንቻታፔካ ኣꬊዛ ናጋራንቻይ ታና። 16 ጊዶ ኣቲን ታ ማሬቲዳይካ ዬሱስ ኪርስቶሲ ዛዋይ ባይንዳ ባ ዳንዳያ፥ ኡባፌ ኣꬊዳ ናጋራንቻ ጊዲዳ ታ ቦላ ቤሲዳይ ኢዛን ኣማናናይታሲኔ ሜርና ዴኦ ዴማናይታስ ሌሚሶ ጊዳና ማላሳ። 17 ሄሳ ጊሻስ ሜርናስ ሃይቂ ኤሮንታ፥ ኣይፌን ቤቲ ኤሮንታ ባርካ ጻላ ጾስ ጊዲዳ ካዎስ ሜርናፔ ሜርና ጋካናስ ኢዛስ ቦንቾይኔ ጋላታይ ጊዶ። ኣሚን።
18 ታ ና ጺምቶሳ! ኔ ጊሻስ ካሴቲዲ ዮቴቲዳ ማላ ሃይሳ ኣዛዞዛ ታ ኔስ ኢማዲስ፤ ሄሲካ ኔ ሄ ቃላ ካላሼ ሎኦ ባጼ ባጼታናሳ። 19 ኣማኖይኔ ሎኦ ቆፋይ ኔስ ዴኦ፤ ኢሲ ኢሲ ኣሳቲ ባ ሎኦ ቆፋ ዬꬊ ኣꬊዲ ኣባ ቦላ ሜቶይ ኢዛ ቦላ ጋኪን ዋዬቲዛ ማርካቤ ማላ ባ ኣማኖ ꬋይሲዳ። 20 ኢስታ ጊዶን ጾሳ ጫሽ ኣጊዲ ታማራና ማላ ታኒ ጻላኤስ ኣꬃ ኢሚዳይቲ ሄሜኔዎሲኔ ኢስኪንዲሮሲ ዴቴስ።