1 ሄሳ ጊሻስ ኡባፌ ኮይሮ ሃራ ኣሳስ ሾቤꬃ ዎሳ፥ ጋናቴꬃ ዎሳኔ ጋላታ ዎሳ ኣሳ ኡባስ ካዎታሲኔ ዴሬ ኣይሲዛይታስ ኡባስ ዎሳና ማላ ታ ኔና ቆፍሳይስ። 2 ሄሲካ ቱሙ ኣያና ዱሳኒኔ ጌሻቴꬅ ኡባን ኑኒ ሳሮቴꬃኒኔ ዎጋን ዳና ማላሳ። 3 ሃይሲ ኑና ኣሺዛ ጾሳ ኣቻን ሎኦኔ ኡፋይሲዛዛ። 4 ኢዚ ኣሲ ዉሪ ኣታና ማላኔ ቱማ ኤራና ማላ ኮዬስ። 5 ኢሲ ጾሲ ጻላ ዴስ፤ ቃሴካ ጾሳሲኔ ኣሳስ ጊዶን ኢሲ ጊግሲዛ ጋናይ ዴስ፤ ኢዚካ ኣስ ጊዲዳ ዬሱስ ኪርስቶሳ። 6 ኢዚ ባና ኣሳ ኡባስ ኣꬂ ኢሚዴስ፤ ሄሲካ ሄራካ ዎዴይ ኣꬎንታ ኢዛስ ማርካቲዴስ። 7 ታኒካ ሃይሳስ ሚሺራቾ ቃላ ዮታናስ ኪቴቲዳዴ፤ ቃሴካ ዴሬታስ ቱሙ ኣማኖ ኣስታማሬ ጊዳዳ ሹሜታዲስ፤ ሄሳካ ታ ዎርዶቶንታ ቱሙ ዮታናሳ። 2ጺም 1፡11

8 ሄሳ ጊሻስ ኣቱማ ኣሳይ ኡባሶን ሃንቆይ ባይንዳኔ ፓላማይ ባይንዳ ባ ጌሻ ኩሼታ ፑዴ ꬎቁ ሂስቲዲ ዎሳና ማላ ታ ኮያይስ። 9 ሄሳꬆካ ማጫሳቲ ቦንቾራ ባና ሺሺ ኤኪዲ ቤሲዛ ማይኦ ማይኤቶ ኣቲን ባ ሁኤ ዳዲ ኤኪዲ ዎይኮ ኣልኦ ማይኦ፥ ዎርቃኔ ኢንቁ ኣꬂዲ ዋልቂ ዋልቂ ጎፔቶ። 1ጴጽ 3፡3 10 ጊዶ ኣቲን ጾስ ዎሶስ ጊዛ ማጫሳቲ ኢስታስ ኦꬃና ቤሲዛ ሎኦ ኦሶን ሎኤቶ።

11 ማጫሲ ጮኡ ጋዳ ኩሜꬃራ ኣዛዜቴꬅ ታማሩ። 12 ማጫሲ ጮኡ ጋናፔ ኣቲን ኢዛ ታማርሳና ማላ ዎይኮ ኣዴ ቦላ ጎዳታና ማላ ታ ኮይኬ። 13 ጋሶይካ ኮይሮ ኣዳሜይ ሜꬌቲዴስ፤ ካላዳ ሄዋና ሜꬌታዱስ።ሜꬌ 2፡7፥21-22 14 ቃሴካ ኮይሮ ባሌቲዳይ ኣዳሜ ጊዴና፤ ባሌታዳ ጾሳ ዎጋፔ ኣꬊዳይ ማጫሳዮ። ሜꬌ 3፡1-6 15 ጊዲኮካ ማጫሲ ኣማኖኒኔ ሲቆን ጌሻቴꬃን ባርካ ባና ሃሮን ሚኒኮ ና ዬሎን ኣታና።