1 «ኦኒካ ዎሳ ኬꬃ ጪማ ጊዳና ኮይኮ ሎኦ ኦሶ ኣሞቴስ» ጊዛ ቃላይ ቱማ። 2 ሄሳ ጊዲኮ ዎሳ ኬꬄ ካሌꬂዛዴይ ቦሬይ ባይንዳዴ፥ ኢሲ ማቻ ዲዛ ኣዴ፥ ጊናራ ዲዛዴ፥ ባና ሃሪዛዴ፥ ዎጋራ ኣቂዛዴ፥ ኢማꬅ ሞኪዛዴ፥ ታማርሳናስ ዳንዳይዛዴ፥ 3 ማꬆቶንታዴ፥ ኦሽ ኦዬቶንታዴ፥ ቃሴ ማራጌ ኣስ፥ ኣሳራ ፓላሜቶንታዴ፥ ሚሽ ጎዶንታዴ ጊዳናስ ቤሴስ። 4 ባ ናይታ ኣዛዜቲዛይታኔ ኣስ ቦንቺዛይታ ሂስቲ ዲቺዲ ባ ኬꬃ ኣሳ ዎጋራ ኣይሲዛዴ ጊዳናስ ቤሴስ። 5 ኢሳዴይ ባ ኬꬃ ኣሳ ዎጋራ ኣይሶ ኤሮንታ ኣጊኮ ጾሳ ዎሳ ኬꬄ ዎስቲ ናጋና ዳንዳይዜ? 6 ኦቶሬቴꬃን ፑሪዲ ጻላኤይ ኩንዲዳ ፒርዳን ኢዚ ኩንዶንታ ማላ ኦራꬅ ኣማኒዛዴ ጊዶፖ። 7 ቃሴካ ኢዛ ሱንꬃን ቦሬቶንታ ማላኔ ጻላኤ ናርጻን ኢዚ ጌሎንታ ማላ ኣማኖንታ ኣሳ ኣቻን ሎኦ ማርካቴꬂ ዳናስ ኮሼስ።

8 ዳቆኔቲካ ሄሳꬆ ቦንቼቲዳይታኔ ባ ጊዳ ቃላ ላሚ ላሚ ዬጎንታይታ፥ ዳሮ ዎይኔ ኡሻስ ኣሞቶንታይታ፥ ኦጌይ ባይንዳ ጎኣ ጎዶንታይታ ጊዳናስ ቤሴስ። 9 ኣማኖ ጹራ፥ ሎኦ ቆፋራ ናጋናስ ቤሴስ። 10 ሃይታንቲካ ኮይሮቲ ፓጬቴቶ፤ ኢሲ ኢታይ ኢስታ ቦላ ቤቶንታ ኣጊኮ ሄሳፌ ጉዬ ዳቆኔቴꬃን ኦꬄቶ። 11 ማጫ ዳቆኔቲካ ቦንቼቲዳይታ፥ ዚጊሮንታይታ፥ ቃሴ ዎጋራ ዲዛይታ፥ ሃኖ ኡባን ኣማኔቲዳይታ ጊዳናስ ቤሴስ። 12 ዳቆኔቲ ኢሲ ማቺ ኣዚና ጊዳናስ ቤሴስ፤ ቃሴካ ባ ናይታኔ ባ ኬꬃ ኣሳ ዎጋራ ኣይሲዛይታ ጊዳናስ ቤሴስ። 13 ዎጋራ ኦꬂዳይቲ ባስ ጊታ ቦንቾኔ ዬሱስ ኪርስቶሳን ኢስታስ ዲዛ ኣማኖን ዳሮ ጻላቴꬅ ዴማና።

14 ታ ኔኮ ኤሌ ባና ኮይኮካ ሃይታ ኣዛዞታ ኔስ ጻፋይስ። 15 ታ ሃኖ ኔስ ጻፊዛይ ታ ጋምኢዛ ጊዲኮካ ኣሳይ ጾሳ ኬꬃን ዋኒ ዳናኮ ኔ ኤራና ማላ ጋዳኮ! ኬꬃይ ዴኦ ጾሳ ዎሳ ኬꬃ፤ ሄሲካ ቱሙ ቱሲኔ ጻጶ። 16 ቱሙ ኣያና ዱሳ ጹራይ ሲꬌይ ባይንዳ ጊታ፤ ኢዚካ፥