1 ዎዴ ዉርሴꬃ ቦላ ኢሲ ኢሲ ኣሳይ ኣማኖ ኣጊዲ ባሌꬂዛ ኣያናታኔ ኢታ ኣያና ቲሚርቴ ካላናይሳ ጺሎ ኣያናይ ቆንጬራ ዮቴስ። 2 ሄሳ ማላ ቲሚርቴይ ኢስታ ቆፋይ ቦንቆ ቢራታን ጹጌቲዳ ማላ ጌላቴꬃን ዶጪዳ ቆꬌፔ ቆሞን ሃኒዛ ዎርዳንቻ ኣሳታፔ ያና። 3 ሄ ኣሳቲ ኣሳይ ኤኮንታ ማላኔ ጌሎንታ ማላ ዲጋና፤ ኣማኒዛይቲኔ ቱማ ሻኪ ኤሪዛ ኣሳይ ጾሲ ሜꬊዳ ካꬅ ጋላታራካ ኤኪዛይቲ ሞንታ ማላ ዲጋናኔ ኣዛዛና። 4 ጾሲ ሜꬊዳይ ዉሪካ ሎኦ፤ ኣሲ ጋላታራ ኤኪኮ ዎራ ዎꬊዛይ ኢሲናካ ዴና። 5 ዉሪካ ጾሳ ቃላኒኔ ዎሳን ጌያና።

6 ሃይሳ ሃ ኣዛዞዛ ኣማኒዛ ኣሳ ኔ ቆፍሲኮ፥ ኣማኖ ቃላኒኔ ኔ ኤኪዳ ሎኦ ቲሚርቴዛን ሚናዳ ዬሱስ ኪርስቶሳስ ሎኦ ኦሳንቻ ጊዳንዳሳ። 7 ጾስ ቦንቺሶንታ ጎኣይ ባይንዳ ሃይሲኤፔኔ ጪማ ማጫሳታ ሃይሲኤፔ ሃካዳ ቱማ ኣያና ኦሶስ ኔ ኣሳቴꬅ ጊጊሳ።

8 ኣሳቴꬃ ኣሾ ኦጌን ዶሲሶይ ጉꬃ ዎዴስ ጎኤስ ሺን ቱሙ ኣያና ዱሳስ ባና ታማርሶይ ጊዲኮ ሃይሳ ሃ ኣላሜዛሲኔ ቡሮ ያና ዱሳስ ሂዶታይ ዲዛ ጊሻስ ኡባስ ጎኤስ። 9 ሃይሲ ሃ ቃላይ ኣማኔቲዳይሳኔ ኡባይ ኤካናስ ቤሲዛ ቃላ። 10 ኑ ሄሳስ ጊዲ ዳፌቶሲኔ *ዳፌቶስ፡ ዳፌቶስ ጊዛይሳ ኢሲ ኢሲ ቢርሼꬃ ማጻፋቲ፥ «ባጼቶስ» ጊሺን ኢሲ ኢሲኔቲ፥ «ጫዬቶስ» ጊዲ ቢርሺዳ። ዳቡሮስ፤ ሄሲካ ኣሳ ኡባስ ሃራፔካ ኣማኒዛይታስ ኣሺዛ ዴኦ ጾሳን ኑ ሂዶታ ኦꬂዛ ጊሻሳ።

11 ሃይታ ዮኦታ ኣዛዛኔ ታማርሳ። 12 ኔ ዬላጋቴꬃ ኦኒካ ሌቆፎ፤ ጊዶ ኣቲን ኔኒ ሃሳያን፥ ዱሳን፥ ሲቆን፥ ኣማኖኒኔ ጌሻቴꬃን ኣማኒዛይታስ ሎኦ ሌሚሶ ጊዳ። 13 ታ ሄ ባና ጋካናስ ቃላ ናባባናስ፥ ዞራናሲኔ ታማርሳናስ ሚና። 14 ጪማቲ ኔ ቦላ ባ ኩሼ ዎꬂ ዎሲሺን፥ ኔስ ኢሜቲዳ ቲንቢቴ ኢሞቴꬃ ሌፒ ሂስታ ኣጎፋ። 15 ኣሲ ዉሪ ኔ ዲቻ ቤያና ማላ ሃ ዮኦታ ሎኤꬃ ሚንꬃዳ ዳንዳያን ፖላ። 16 ኔ ዱሳ ጊሻሲኔ ኔ ታማርሲዛ ቲሚርቴዛስ ናጌታ፤ ሃይታን ሚና፤ ኔ ሄሳ ኦꬂኮ ኔናኔ ኔ ጊዛይሳ ሲዪዛይታ ኣሻና።