1 ሄሳፌ ጉዬ ሄ ቢታ ኣሳይ ኢዮሲያሳ ና ኢዮኣካዜ ዶሪዲ ኢዛ ኣዋ ሶሆን ዬሩሳላሜን ካዎꬂዳ። 2 ኢዮኣካዚ ካዎቲዛ ዎዴ ኢዛስ ላይꬃይ 23፤ ኢዚ ዬሩሳላሜን ሄꬑ ኣጊና ካዎቲዴስ። 3 ሄሳፌ ጉዬ ጊብጼ ካዎይ ዮኣካዜ ዬሩሳላሜን ኢዛ ካዎቴꬃ ኣራታፔ ዎꬂዴስ፤ 3,400 ኪሎ ጊዲዛ ሳቂሌ ቢራኔ 34 ኪሎ ጊዲዛ ዎርቃ ዩሁዳ ኣሳ ጊሪሲዴስ። 4 ጊብጼ ካዎይ ኢዮኣካዜ ኢሻ ኤልያቄሜ ዩሁዳ ቦላኔ ዬሩሳላሜ ቦላ ካዎꬂዴስ፤ ኢዛ ሱንꬃካ ላሚዲ ኢዮኣቄሜ ጊ ሱንꬂዴስ፤ ሂስቲዲ ኢዮኣቄሜ ኢሻ ኢዮኣካዜ ጊብጼ ኤፊዴስ። ኤር 22፡11-12

5 ኢዮኣቄሜይ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ታማኔ ኢሲ ላይꬅ ካዎቲዴስ፤ ጎዳ ባ ጾሳ ሲንꬃን ኢታ ሚሽ ኦꬂዴስ።ኤር 22፡18-19፤ 26፡1-6፤ 35፡1-19 6 ባቢሎኔ ካዎ ናቡካዳናጾሬይ ኢዛ ኦሊ ኦይኪዲ ባቢሎኔ ኤፋናስ ጻርቂማላ ሳንሳላታን ቃቺዴስ። ኤር 25፡1-38፤ 36፡1-32፤ 45፡1-5፤ ዳኔ 1፡1-2 7 ናቡካዳናጾሬይ ቃሴ ጾሳ ኬꬃ ሚሻ ኤኪ ባቢሎኔ ኤፊዲ ባ ካዎቴꬃ ኬꬃን ዎꬂዴስ።

8 ኢዮኣቄሜ ካዎቴꬃ ላይꬃን ኦሴቲዳ ሃራሲዛ ኦሶቲኔ ኢታ ኦሶቲ ኡባይ፥ ኢስራኤሌ ካዎታኔ ዩሁዳ ካዎታ ታሪኬ ማጻፋን ጻፌቲ ኡቲዴስ፤ ኢዛ ና ኢዮኣኪኔይ ኢዛሶሆን ካዎቲዴስ።

9 ኢዮኣኪኔይ ካዎቲዛ ዎዴ ኢዛስ ላይꬃይ ታማኔ ኦስፑና፤ *ታማኔ ኦስፑና ዎይኮ ኦስፑና። 2ካዎ 24፡8 ቦላ ጼላ። ኢዚ ዬሩሳላሜን ሄꬑ ኣጊናኔ ታሙ ጋላስ ካዎቲዴስ። ኢዚ ጎዳ ሲንꬃን ኢታ ሚሽ ኦꬂዴስ። 10 ኦፊንꬃ ዎዴ ካዎ ናቡካዳናጾሬይ ኣስ ኪቲዲ ኢዮኣኪኔኔ ጎዳ ኬꬃን ዲዛ ኣልኦ ሚሻታ ኢዛራ ኢሲፌ ባቢሎኔ ኤፊሲዴስ፤ ሂስቲዲ ኢዛ ኣዋ ኢሻ ሴዴቂያሳ ዩሁዳ ቦላኔ ዬሩሳላሜ ቦላ ካዎꬂዴስ።†ኢዛ ኣዋ ኢሻ ጊዛይሳ ኢሲ ኢሲ ጌሻ ማጻፋቲ ኢዛ ኢሻ፥ ኢዛ ዳቦ ጌቴስ

11 ሴዴቂያሲ ካዎቲዛ ዎዴ ኢዛስ ላይꬃይ 21፤ ኢዚ ዬሩሳላሜን ታማኔ ኢሲ ላይꬅ ካዎቲዴስ። ኤር 27፡1-22፤ 28፡1-17 12 ጎዳ ባ ጾሳ ሲንꬃን ኢዚ ኢታ ሚሽ ኦꬂዴስ፤ ቃሴ ጎዳ ቃላ ዮቲዳ ናቤ ኤርማሳ ሲንꬃን ባና ካዉሺቤና።

13 ቃሴ ባስ ኣማኔታና ማላ ጾሳ ሱንꬃን ጫቄꬂዳ ካዎ ናቡካዳናጾሬ ቦላ ማካሊዴስ፤ ጎዳ ኢስራኤሌ ጾሳኮ ሲሞንታ ኢጺዲ ባ ዎዚና ሙሚሲዲ ባ ሞርጌ ሚንꬂዴስ።ሂዚ 17፡15 14 ሄሳፌ ቦላራካ ቄሴቲኔ ዴራ ካሌꬂዛ ኣሳቲ ሙሌካ ኣማኔቶንታ ኢጺዲ ጌዴ ኢቲ ኢቲ ቢዳ፤ ኢስቲ ሃራ ካዎቴꬃቲ ኦꬂዛ ሃራሲዛ ሎሴታ ካሊሼ ጎዳ ኬꬃ ዬሩሳላሜን ዲዛ ጌሻ ቱኒሲዳ።

15 ጎዳይ ኢስታ ኣዋታ ጾሳይ ባ ኣሳሲኔ ባ ዲዛሶስ ቃꬌቲዛ ጊሻስ ባ ናቤታ ኢስታስ ዛሪ ዛሪ ኪቲዴስ። 16 ጊዶ ኣቲን ጾሳ ሃንቆይ ኢስታ ቦላ ዪን ፓጻቴꬂ ኢስታስ ቤቶንታ ኢጻናሼ ጋካናስ ኢስቲ ጎዳይ ኪቲዳይታ ቂꬊዳ፤ ኢዛ ቃላ ካꬊዳኔ ናቤታካ ካዉሺዳ።

17 ሄሳ ጊሻስ ጎዳይ ባቢሎኔ ካዎ ኢስታ ቦላ ዴንꬂዲ ኤሂዴስ፤ ሂስቲን ጾሳ ኬꬃ ጊዶን ኢዚ ኢስታ ዬላጋ ኣቱማ ናይታ ማሻን ሱፑ ሂስቲዴስ፤ ዬላጋ ኣቱማ ናይታ፥ ዎይኮ ጌላኦታ፥ ዎይኮ ጪማታ፥ ዎይኮ ጬጋታ ጾሲ ኢስታ ኡባ ናቡካዳናጾሬ ኩሼን ኣꬂ ኢሚዴስ። ኤር 21፡1-10፤ 34፡1-5 18 ባቢሎኔ ካዎይ ጾሳ ኬꬃን ዲዛ ጊታኔ ጉꬃ ሚሻታ ኡባ፥ ጎዳ ኬꬃን ዲዛ ኣቆታ፥ ካዎ ኣቆታኔ ኢዛ ሹሜታ ኣቆታ ኡባ ዲኢ ኤኪዲ ባቢሎኔ ኤፊዴስ። 19 ሄሳፌ ጉዬ ባቢሎኔ ኦላንቻቲ ጾሳ ኬꬃ ታማን ጹጊዳ፤ ዬሩሳላሜ ዲርሳ ጊምቤዛካ ላሊዳ፤ ካዎቴꬃ ኬꬃታ ታማን ጹጊዳ፤ ሄን ዴኢዛ ኣልኦ ሚሻታ ኡባካ ꬋይሲዳ።

20 ማሻፌ ኣቲዳይታ ካዎዚ ዲኢ ኤኪዲ ባቢሎኔ ኤፊዴስ፤ ፓሪሴ ካዎቴꬃይ ሚናና ጋካናስ ኢስቲ ኢዛሲኔ ኢዛ ናይታስ ኣይሌ ጊዲዳ። 21 ሄሳን ጎዳይ ናቤ ኤርማሳ ባጋራ ዮቲዳ ቃላይ ፖሌታና ማላ ቢታይ 70 ላይꬅ ኩሜꬅ ኣሲ ባይንዳ ሶሆ ጊዲዳ ጊሻስ ሼምፒዴስ፤ ሂስቲን ቢታይ ሳምባታ ሼምፖ ዴሚዴስ። ኤር 25፡11፤ 29፡10

22 ፓሪሴ ካዎ ቂሮሲ ካዎቲዳ ኮይሮ ላይꬃን ናቤ ኤርማሳ ባጋራ ጎዳይ ሃሳይዳይሳ ፖሊዴስ። ፓሪሴ ካዎ ቂሮሲ ባ ካዎቴꬃ ጊዶን ኡባሶን ኣዋጃይ ኣዋጄቲዲ ጻፌቲ ኡታና ማላ ጎዳይ ኢዛ ኣያና ዴንꬄꬂዴስ። 23 ኢዚካ፥ «ፓሪሴ ካዎ ቂሮሲ፥ ‹ጎዳይ ሳሎ ጾሳይ ሃ ሳኣ ካዎቴꬃታ ኡባ ታስ ኢሚዴስ፤ ቃሴ ዩሁዳን ዴኢዛ ዬሩሳላሜን ታኒ ኢዛስ ኬꬃ ኬጻና ማላ ታና ኣዛዚዴስ፤ ጾሳ ኣስ ጊዲዳ ኦኒኔ ኢንቴ ጊዶን ዲኮ ሄ ቦ፤ ጎዳይ ኢዛ ጾሲ ኢዛራ ጊዶ!› » ጊ ኣዋጂዴስ። ኢሳ 44፡28