1 ቂሮሲ ፓሪሴ ዴሬን ካዎቲዳ ኮይሮ ላይꬅ ጾሳይ ቂሮሳ ኣያና ዴንꬄꬂዲ ኢዚ ባ ካዎቴꬃ ኡባን ኣዋጃ ኣዋጂዲኔ ሄ ኣዋጃ ጻፊ ዎꬃና ማላ ኦꬂዴስ፤ ሄሲካ ሃኒዳይ ካሴ ናቤ ኤርማሳ ባጋራ ጾሲ ዮቲዳ ቃላይ ፖሌታና ማላሳ። ኤር 25፡11፤ 29፡10

2 ፓሪሴ ካዎ ቂሮሲ ኣዋጃን ኬሲዳ ኣዛዞይ፥ «ጎዳ ሳሎ ጾሳይ ታና ቢታ ካዎቴꬃታ ኡባ ኣይሳና ማታ ታስ ኢሚዴስ፤ ዩሁዳ ቢታን ዲዛ ጾሳ ኬꬅ ዬሩሳላሜን ታ ኢዛስ ኬጻና ማላ ኣዛዚዴስ። ኢሳ 44፡28 3 ኢንቴ ጊዶፌ ጾሳ ኣስ ጊዲዳይሳራ ጾሲ ጊዶ፤ ዩሁዳ ዴሬን ዲዛ ዬሩሳላሜ ካታማ ቢዲ ጎዳ ኢስራኤሌ ጾሳ ኬꬃ ኬጾ። 4 ሃይቆፔ ኣቲዲ ባ ዴሬ ሲሚዛይታስ ሄን ባ ዲዛሶን ኣቲዛይቲ ዬሩሳላሜን ዲዛ ጾሳ ኬꬃ ኬጾስ ኢሚዛ ኢሞታፔ ቦላራ ቢራ፥ ዎርቃ፥ ሜሄታኔ ሃራ ሚሻታ ጉጂ ኢሞን ማዴቶ፤ ሄሲካ ኢስቲ ባንታ ዶሳን ኢሚዛ ኢሞታ ጊዶ» ጌስ።

5 ሄሳፌ ጉዬ ዩሁዳኔ ቢኒያሜ ዜሬꬃታ ዳናቲ፥ ቄሴቲ፥ ሌዌቲኔ ጾሳይ ዎዚና ዴንꬄꬂዳ ኣሳይ ዉሪ ሲሚ ባናሲኔ ዬሩሳላሜን ዲዛ ጾሳ ኬꬃ ዛሪ ኬጻና ጊጌቲ ዴንዲዳ። 6 ዶꬃቲካ*ዶꬃቲካ፡ ዶꬃቲካ ጊዛይሲ ኣይሁዳፔ ዎይኮ ፓሪሴ ዴሬ ኣስ ጊዳና ዳንዳዬቴስ። ዉሪ ባ ኪያቴꬃን ኢሚዳ ኢሞታ ቦላ ጉጂዲ ቢራፔኔ ዎርቃፌ ኦሴቲዳ ሚሻታ፥ ዱማ ዱማ ሶ ጊዶን ጎኤቲዛ ሚሻታኔ ሜሄታ ጾሳ ኬꬃን ሙጹዋታ ጊዲዛ ሃራ ጎኢዛ ሚሻታ ኢሚ ማዲዳ።

7 ካዎ ቂሮሲ ካሴ ካዎ ናቡካዳናጾሬይ ዬሩሳላሜን ዲዛ ጾሳ ኬꬃፌ ቦንቂ ኤኪ ኤፊዲ ባ ኤቃ ጾሳ ኬꬃን ዎꬂዳ ጾሳ ሚሻ ኡባ ዛሪ ኢሚዴስ። 8 ፓሪሴ ካዎ ቂሮሲ ሚንጃ ኬꬃ ዳና ሚቲራዳጹ ባጋራ ጾሳ ኬꬃ ሚሻቲ ያና ማላኔ ዩሁዳ ዴሬ ኣይሲዛ ሴሳቢሳሬስ ሼꬊዴስ። 9 ሲሚዳ ሚሻቲ ሃይሳፌ ካሊ ዲዛይታ፤ ዎርቃፌ ኦሴቲዳ ሳኔቲ 30፥ ቢራፔ ኦሴቲዳ ሳኔቲ 1,000 ሃራ ዱማ ዱማ ሳኔቲ 29፤ 10 ዎርቃፌ ኦሴቲዳ ጉቃ ሳኔቲ 30 ቢራፔ ኦሴቲዳ ቄሪ ሳኔቲ 410 ጎኢዛ ሃራ ሚሻቲ 1,000። 11 ሴሳቢሳሬይ ዲኤቲዳ ኣሳታራ ጊዲዲ ባቢሎኔፔ ዬሩሳላሜ ሲሚ ዪሼ ኤኪ ኬዚዳ ሚሻ ቆዳይ ኢሲ ቦላ 5,440።